អគ្គិឆាបឆេះផ្ទះមួយកន្លែងនៅក្នុងបុរីម៉នដានី សង្ស័យឆ្លងចរន្តអគ្គិសនី
រាជធានីភ្នំពេញ ៖ ផ្ទះមួយកន្លែង ដែលមានទីតាំងស្ថិតនៅក្នុងបុរី ម៉ន ដានី គម្រោងទី២៥ ភូមិស្រែរាជ្ជះ សង្កាត់សំរោងក្រោម ខណ្ឌពោធិ៍សែនជ័យ…
រាជធានីភ្នំពេញ ៖ ផ្ទះមួយកន្លែង ដែលមានទីតាំងស្ថិតនៅក្នុងបុរី ម៉ន ដានី គម្រោងទី២៥ ភូមិស្រែរាជ្ជះ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ត្រូវបានភ្លើងឆេះ បង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទីព្រឹកថ្ងៃទី១០ ខែកម្ភៈ ឆ្នាំ២០២៦ ។ មូលហេតុដែលនាំឲ្យមានការឆាបឆេះនោះ ពុំទាន់ត្រូវបានគេដឹងនៅឡើយទេ ប៉ុន្តែជំហានដំបូងត្រូវបានសង្ស័យថា ឆេះដោយសារហេតុការណ៍ឆ្លងចរន្តអគ្គិសនី ហើយសមត្ថកិច្ចកំពុងធ្វើការស្រាវជ្រាវបន្តហើយដែរ ។
ប្រជាពលរដ្ឋ ដែលនៅរស់នៅជិតទីតាំងកើតហេតុនោះបាននិយាយថា នៅវេលាកើតហេតុខាងលើ ខណៈដែលពួកគាត់កំពុងស្ថិតនៅក្នុងផ្ទះបានធំក្លិនឈ្ងៀមយ៉ាងខ្លាំង ហើយក៏នាំគ្នារកមើលនៅក្នុងផ្ទះរៀងៗខ្លួន ព្រោះខ្លាចឆ្លងចរន្តអគ្គិសនី បង្កជាអណ្ដាតភ្លើងឆេះផ្ទះ។ ប៉ុន្តែរកមើលមិនឃើញមានអ្វីនៅក្នុងផ្ទះគាត់ឡើយ បន្ទាប់មក គាត់ក៏បានចេញទៅមើលខាងក្រៅ ស្រាប់តែឃើញភ្លើងកំពុងឆេះផ្ទះខាងលើនោះមានផ្សែងខ្មៅខ្មួលខ្មាញ់ ហុយចេញពីជាន់ទី១ បាត់ទៅហើយ ។ ពេលនោះ ពួកគាត់បាននាំគ្នាយកបំពង់ពន្លត់អគ្គិភ័យ ជួយបាញ់ពន្លត់ ប៉ុន្តែមិនអាចទៅរួចឡើយ ព្រោះភ្លើងឆេះខ្លាំងពេក ហើយក៏បានរាយការណ៍ទៅសមត្ថកិច្ច ដើម្បីសុំឲ្យជួយអន្តរាគមន៍ និងយករថយន្តពន្លត់អគ្គិភ័យទៅបាញ់ពន្លត់ ។
នគរបាលបានប្រាប់ថា ក្រោយពេលទទួលបានដំណឹងនោះហើយ កម្លាំងនគរបាលប៉ុស្តិ៍សំរោងក្រោម និងនគរបាលខណ្ឌពោធិ៍សែនជ័យ រួមជាមួយអាជ្ញាធរសង្កាត់ និងខណ្ឌបានចេញអន្តរាគមន៍ភ្លាមៗដែរ និងបានផ្ដល់ដំណឹងដល់នគរបាលពន្លត់អគ្គិភ័យឲ្យជួយ។ បន្ទាប់មក ក៏មានរថយន្តពន្លត់អគ្គិភ័យទៅដល់ច្រើនគ្រឿង ជាបន្តបន្ទាប់ បាញ់ទឹកពន្លត់រលត់ទៅវិញទាំងស្រុង មិនបានឆេះរាលនៅក្នុងផ្ទះទាំងមូលឡើយ ហើយក៏មិនបានបណ្ដាលឲ្យម្ចាស់ផ្ទះរងរបួសនោះដែរ ដោយគ្រាន់តែខូចខាតសម្ភារៈក្នុងផ្ទះ និងខូចខាតបន្ទប់ជាន់ទី១ផ្ទះនោះប៉ុណ្ណោះ ៕
ចែករំលែកព័តមាននេះ