ទីក្រុងស៊ីដនី៖ ថ្នាក់ដឹកនាំអូស្ត្រាលីនៅថ្ងៃនេះបានអំពាវនាវឱ្យប្រជាជនរក្សាភាពស្ងប់ស្ងាត់ និងហែបាតុកម្មដោយសន្តិវិធី។ ការអំពាវនាវនេះធ្វើឡើងបន្ទាប់ពីមានការប៉ះទង្គិចគ្នារវាងនគរបាល និងក្រុមបាតុករដែលប្រឆាំងនឹងដំណើរទស្សនកិច្ចរបស់ប្រធានាធិបតីអ៊ីស្រាអែល លោកអ៊ីសាក់ ហឺហ្សក់ (Isaac Herzog) ទៅប្រទេសអូស្ត្រាលី។…
ទីក្រុងស៊ីដនី៖ ថ្នាក់ដឹកនាំអូស្ត្រាលីនៅថ្ងៃនេះបានអំពាវនាវឱ្យប្រជាជនរក្សាភាពស្ងប់ស្ងាត់ និងហែបាតុកម្មដោយសន្តិវិធី។ ការអំពាវនាវនេះធ្វើឡើងបន្ទាប់ពីមានការប៉ះទង្គិចគ្នារវាងនគរបាល និងក្រុមបាតុករដែលប្រឆាំងនឹងដំណើរទស្សនកិច្ចរបស់ប្រធានាធិបតីអ៊ីស្រាអែល លោកអ៊ីសាក់ ហឺហ្សក់ (Isaac Herzog) ទៅប្រទេសអូស្ត្រាលី។ នគរបាលប្រាប់ថាមនុស្ស២៧នាក់ត្រូវបានចាប់ខ្លួន។ ក្នុងនោះដប់នាក់ជាប់ចោទពីបទបង្កហិង្សាលើសមត្ថកិច្ច។
ការចាប់ខ្លួននេះកើតឡើងបន្ទាប់ពីនគរបាលចាប់ផ្ដើមបណ្ដេញបាតុកររាប់ពាន់នាក់ដែលប្រមូលផ្ដុំគ្នាក្បែរសាលាក្រុងស៊ីដនី។ នៅក្នុងចំណោមក្រុមបាតុករទាំងនោះក៏មានអ្នកតំណាងរាស្ត្ររបស់គណបក្សប្រឆាំងម្នាក់ផងដែរ។ នាយករដ្ឋមន្ត្រីអូស្ត្រាលីថ្លែងថាលោកមានចិត្តរន្ធត់យ៉ាងខ្លាំងបន្ទាប់ពីមានអំពើហិង្សាដូច្នេះ។ លោកសូមជំរុញឱ្យក្រុមបាតុករសម្ដែងមតិដោយសន្តិវិធី។
លោកថ្លែងថាប្រជាជនអូស្ត្រាលីចង់បានរបស់២យ៉ាងគឺពួកគេមិនចង់បានជម្លោះទេ ហើយពួកគេចង់ឱ្យបិទបញ្ចប់អំពើកាប់សម្លាប់ មិនថាការកាប់សម្លាប់ទៅលើអ៊ីស្រាអែល ឬប៉ាឡេស្ទីននោះទេ។ ពួកគេមិនចង់ឃើញជម្លោះកើតមាននៅអូស្ត្រាលីឡើយ។ យោងតាមការចេញសេចក្ដីប្រកាសរបស់នគរបាលប្រចាំរដ្ឋញូសោសវេល គេមិនទានបានបទទួលរបាយការណ៍ថាមានករណីអ្នករងរបួសធ្ងន់ធ្ងរនោះទេ។
នគរបាលទទួលសិទ្ធិអំណាចកាន់តែទូលាយជាងមុន
មនុស្សរាប់ពាន់នាក់ប្រមូលផ្ដុំគ្នានៅទីក្រុងស៊ីដនីភាគកណ្ដាលដើម្បីប្រឆាំងនឹងទស្សនកិច្ចរបស់ប្រធានាធិបតីអ៊ីស្រាអែល។ ទស្សនកិច្ចនេះធ្វើឡើងក្រោយហេតុការណ៍បាញ់ប្រហារទៅលើសហគមន៍ជនជាតិជ្វីបរស់នៅតំបន់ឆ្នេរសមុទ្របនដាយ (Bondi) កាលពីខែធ្នូ ឆ្នាំ២០២៥បណ្ដាលឱ្យស្លាប់មនុស្ស១៥នាក់។ នគរបាលត្រូវបានផ្ដល់សិទ្ធិអំណាចដ៏កម្រមួយដើម្បីចាត់ការក្រុមបាតុករដែលប្រើហិង្សា។
នគរបាលមានសិទ្ធិបញ្ជាឱ្យមនុស្សដែលប្រមូលផ្ដុំគ្នាត្រូវបំបែកហ្វូង, មានសិទ្ធិដាក់កំហិតលើការចេញចូលទីតាំងខ្លះ និងមានសិទ្ធិឆែកឆេរយានជំនិះដែលគួរឱ្យសង្ស័យ។ ទូរទស្សន៍អូស្ត្រាលីបានចាក់ផ្សាយរូបវីឌីអូបង្ហាញក្រុមបាតុករខ្លះព្យាយាមទាញរនាំង ឬបារ៉ាស់ដែលខណ្ឌផ្លូវ និងឃើញនគរបាលរុញច្រានពួកគេឱ្យថយក្រោយវិញ។ អភិបាលរដ្ឋញូសោសវេលបាននិយាយការពារចំណាត់ការរបស់នគរបាល។ លោកថានគរបាលត្រូវតែសម្រេចចិត្តឱ្យបានឆាប់រហ័សនៅក្នុងស្ថានភាពដ៏តឹងតែង និងបត់បែនឆាប់រហ័សបែបនេះ៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ