ទីក្រុងមូស្គូ ៖ ប្រទេសរុស្ស៊ី កាលពីថ្ងៃទី៩ ខែកុម្ភៈ ឆ្នាំ២០២៦ បានប្រកាសថា ស្ថានភាពខ្វះខាតប្រេងឥន្ធនៈនៅក្នុងប្រទេសគុយបាធ្ងន់ធ្ងរណាស់ ហើយកិច្ចខិតខំប្រឹងប្រែងរបស់សហរដ្ឋអាមេរិក ដើម្បីដាក់សម្ពាធសេដ្ឋកិច្ចលើប្រទេសដីកោះនៅសមុទ្រការ៉ាប៊ីនមួយនេះ…
ទីក្រុងមូស្គូ ៖ ប្រទេសរុស្ស៊ី កាលពីថ្ងៃទី៩ ខែកុម្ភៈ ឆ្នាំ២០២៦ បានប្រកាសថា ស្ថានភាពខ្វះខាតប្រេងឥន្ធនៈនៅក្នុងប្រទេសគុយបាធ្ងន់ធ្ងរណាស់ ហើយកិច្ចខិតខំប្រឹងប្រែងរបស់សហរដ្ឋអាមេរិក ដើម្បីដាក់សម្ពាធសេដ្ឋកិច្ចលើប្រទេសដីកោះនៅសមុទ្រការ៉ាប៊ីនមួយនេះ កំពុងបង្កការលំបាកជាច្រើន។ ទីក្រុងមូស្គូបានសន្យាថានឹងធ្វើសកម្មភាពប្រឆាំងនឹងអន្តរាគមន៍យោធាគ្រប់ប្រភេទ និងបង្ហាញពីសាមគ្គីភាពរបស់ខ្លួនជាមួយប្រទេសគុយបា និងវ៉េណេស៊ុយអេឡា។ នេះបើតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
រដ្ឋបាលប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសថា ប្រទេសគុយបាជាការគំរាមកំហែងមិនធម្មតា ចំពោះសន្តិសុខជាតិអាមេរិក ហើយបន្តថា គុយបានឹងលែងទទួលបានប្រេងពីប្រទេសវ៉េណេស៊ុយអេឡាតទៅទៀតហើយ បន្ទាប់ពីប្រតិបត្តិការរបស់សហរដ្ឋអាមេរិក ដើម្បីចាប់ខ្លួនលោកប្រធានាធិបតី នីកូឡាស ម៉ាឌូរ៉ូ (Nicolas Maduro) កាលពីខែមុន។ មិនត្រឹមតែប៉ុណ្ណោះ អាមេរិកបានគំរាមដាក់ពន្ធលើប្រទេសផ្គត់ផ្គង់ផ្សេងទៀតដូចជា ម៉ិកស៊ិក ប្រសិនបើបន្តដឹកជញ្ជូនប្រេងឥន្ធនៈទៅកាន់ប្រទេសគុយបា។
រុស្ស៊ីកំពុងព្យាយាមស្តារទំនាក់ទំនងដែលបែកបាក់របស់ខ្លួនជាមួយនឹងសហរដ្ឋអាមេរិក ខណៈដែលលោកប្រធានាធិបតី ត្រាំ កំពុងស្វែងរកការសម្របសម្រួលបញ្ចប់ជម្លោះនៅ អ៊ុយក្រែន។ ប៉ុន្តែទោះយ៉ាងណាក៏ដោយ វិមានក្រឹមឡាំងបានបញ្ជាក់យ៉ាងច្បាស់ថា រុស្ស៊ីមិនពេញចិត្តនឹងការប្រព្រឹត្តរបស់ទីក្រុងវ៉ាស៊ីនតោន ចំពោះប្រទេសគុយបា។
អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានថា ស្ថានភាពក្នុងប្រទេសគុយបាពិតជាមានសារៈសំខាន់ណាស់។ យើងដឹងអំពីរឿងនេះ។ យើងកំពុងរក្សាទំនាក់ទំនងយ៉ាងជិតស្និទ្ធជាមួយមិត្តគុយបារបស់យើងតាមរយៈបណ្តាញការទូត និងបណ្តាញផ្សេងៗទៀត»។ លោកបន្តថា «យុទ្ធសាស្ត្រខ្ទប់ដង្ហើមដែលប្រើដោយសហរដ្ឋអាមេរិក ពិតជាបង្កការលំបាកជាច្រើនសម្រាប់គុយបា។ យើងកំពុងពិភាក្សាជាមួយមិត្តគុយបារបស់យើងអំពីវិធីដែលអាចធ្វើទៅបាន ដើម្បីដោះស្រាយបញ្ហាទាំងនេះ ឬយ៉ាងហោចណាស់ផ្តល់ជំនួយដែលអាចធ្វើទៅបានទាំងអស់»។
ប្រទេសគុយបាបានព្រមានបណ្តាក្រុមហ៊ុនអាកាសចរណ៍អន្តរជាតិថា ប្រេងឥន្ធនៈយន្តហោះនឹងលែងមានតទៅទៀតហើយ ដោយចាប់ផ្តើមនៅថ្ងៃទី១០ ខែកុម្ភៈ តទៅ។ ជាហេតុនាំឱ្យក្រុមហ៊ុនអាកាសចរណ៍កាណាដា Air Canada បានប្រកាសកាលពីថ្ងៃចន្ទថា ខ្លួនកំពុងផ្អាកជើងហោះហើរទៅកាន់ប្រទេសគុយបា។
ឯកអគ្គរដ្ឋទូតរុស្ស៊ីប្រចាំប្រទេសគុយបា លោក Viktor Coronelli បានប្រាប់ទីភ្នាក់ងារសារព័ត៌មានរដ្ឋ RIA កាលពីសប្តាហ៍មុនថា ទីក្រុងមូស្គូបានផ្គត់ផ្គង់ប្រេងម្តងហើយម្តងទៀតដល់ប្រទេសគុយបាក្នុងប៉ុន្មានឆ្នាំថ្មីៗនេះ ហើយនឹងបន្តធ្វើដូច្នេះថែមទៀត៕
ចែករំលែកព័តមាននេះ