រាជធានីភ្នំពេញ ៖ នៅអំឡុងចុងខែមរា ឆ្នាំ២០២៦ រដ្ឋបាលខណ្ឌកំបូល និងរដ្ឋបាលខណ្ឌពោធិ៍សែនជ័យ បានចេញសេចក្ដីជូនដំណឹងដាច់ដោយឡែកពីគ្នាមួយ ទៅកាន់ក្រុមអាជីវករលក់ដូរនៅលើចិញ្ចើមផ្លូវបេតុងលេខ១៣៤KP ហៅផ្លូវម៉ែ ននោង…
រាជធានីភ្នំពេញ ៖ នៅអំឡុងចុងខែមរា ឆ្នាំ២០២៦ រដ្ឋបាលខណ្ឌកំបូល និងរដ្ឋបាលខណ្ឌពោធិ៍សែនជ័យ បានចេញសេចក្ដីជូនដំណឹងដាច់ដោយឡែកពីគ្នាមួយ ទៅកាន់ក្រុមអាជីវករលក់ដូរនៅលើចិញ្ចើមផ្លូវបេតុងលេខ១៣៤KP ហៅផ្លូវម៉ែ ននោង ដោយទុករយៈពេលឲ្យធ្វើការរុះរើជិត១០ថ្ងៃ ប៉ុន្តែដល់ថ្ងៃកំណត់ មានអាជីវករមួយចំនួន បានអនុវត្តន៍តាមធ្វើការរុះរើចេញដោយខ្លួនឯង ចំណែកមួយចំនួនទៀត មិនព្រមអនុវត្តន៍ទាល់តែសោះ ទើបនៅវេលារសៀលថ្ងៃទី៩ ខែមករា ឆ្នាំ២០២៦ ខាងរដ្ឋបាលខណ្ឌកំបូល ដឹកនាំដោយលោកលោក ទ្រី ណារ៉េត អភិបាលរងខណ្ឌកំបូល ចុះទៅធ្វើការរុះរើតែម្ដង ចំណែកខាងរដ្ឋបាលខណ្ឌពោធិ៍សែជ័យ និងចុះរុះនៅថ្ងៃបន្ទាប់ដែរ ។
អាជ្ញាធរខាងលើបាននិយាយថា ផ្លូវបេតុងលេខ១៣៤KP អតីតផ្លូវ«ម៉ែ ននោង»ខាងលើនេះ មានព្រំប្រទល់រវាងខណ្ឌ២ ដោយមួយចំហៀងខាងលិច ស្ថិតនៅក្នុងភូមិត្រពាំងទួល សង្កាត់កំបូល ខណ្ឌកំបូល និងមួយចំហៀងខាងកើត ស្ថិតនៅក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។ នៅតំបន់ខាងលើនោះ មានរោងចក្រច្រើន និងមានផ្ទះសម្បែងរាប់ពាន់ខ្នង ព្រមទាំងមានផ្លូវនានាតភ្ជាប់ជាមួយផ្លូវនេះផងនោះ បានធ្វើឲ្យមានម៉ូតូ និងរថយន្តធ្វើចរាចរចេញចូលទៅមកមមាញឹកខ្លាំង ជាពិសេសកម្មករ កម្មការិនីបានដើរទៅធ្វើការតាមផ្លូវនោះផងដែរ ។
អាជ្ញាធរបាននិយាយបន្តថា ដោយឡែកបងប្អូនប្រជាពលរដ្ឋនាំគ្នាលក់ដូរលើចិញ្ចើមផ្លូវនេះទាំងសងខាង បិទអស់ហើយដែលមិនអាចឲ្យអ្នកដំណើរថ្មើរជើងដើរលើចិញ្ចើមផ្លូវបាននោះទេ អ្នកថ្មើរជើងបានបង្ខំចិត្តដើរលើផ្លូវម៉ូតូ ឬរថយន្ត ដែលប្រឈមនិងហានីភ័យគ្រោះថ្នាក់គ្រប់ពេល ។ ដើម្បីធានាបាននូវសណ្តាប់ធ្នាប់ របៀបរៀបរយសាធារណៈ អនាម័យ និង បរិស្ថានល្អប្រសើរ ចៀសវាងការកកស្ទះចរាចរណ៍ ដែលប៉ះពាល់ដល់សោភ័ណភាព និងសុវត្ថិភាពសាធារណៈ ទើបអាជ្ញាធរខណ្ឌទាំង២ចេញសេចក្តីជូនដំណឹងឲ្យក្រុមអាជីវករទាំងនោះរុះរើតូបលក់ដូរ និងកាត់សំយ៉ាបផ្ទះ ឬរុះរើផ្ទាំងស្លាកប៉ាណូចេញឲ្យអស់ពីលើចិញ្ចើមផ្លូវនោះ ។
ប្រភពខាងលើបានបញ្ជាក់ថា រដ្ឋបាលខណ្ឌទាំង២បានទុកត្រឹមរយៈពេល១អាទិត្យ ដើម្បីឲ្យពួកគាត់រុះរើដោយខ្លួនឯង ប៉ុន្តែគិតរហូតមកត្រឹមថ្ងៃទី៩ ខែកុម្ភៈ នេះមានអ្នកខ្លះបានស្ម័គ្រចិត្តរុះរើដោយខ្លួនឯងរួចហើយ ។ ចំណែកអ្នកខ្លះទៀតមិនព្រមរុះរើឡើយ ទើបរដ្ឋបាលខណ្ឌកំបូលដាក់កម្លាំងចុះរុះរើ នៅតាមចិញ្ចើមផ្លូវដែលស្ថិតនៅក្រោមការគ្រប់គ្រងរបស់ខ្លួន ។ ខណៈពេលកម្លាំងខាងលើចុះទៅដល់ ទើបអាជីវករខ្លះរុះរើដោយខ្លួនឯង ដោយឡែករដ្ឋបាលខណ្ឌពោធិ៍សែនជ័យ បានត្រៀមគ្រឿងចក្រ ដើម្បីចុះទៅធ្វើការរុះរើ និងឈូស ឆាយសម្អាតនៅថ្ងៃទី១០ ខែកុម្ភៈ ឆ្នាំ២០២៦ ៕
ចែករំលែកព័តមាននេះ