ខេត្តព្រៃវែង ៖ ប្រជាពលរដ្ឋជាង ២០០គ្រួសារ នៅលើកោះពាមរាំង ក្នុងឃុំកោះចេក ស្រុកពាមជរ ខេត្តព្រៃវែង បាននិយាយថា ពេលនេះពួកគាត់ដូចត្រូវឆ្នោតរង្វាន់ធំ…
ខេត្តព្រៃវែង ៖ ប្រជាពលរដ្ឋជាង ២០០គ្រួសារ នៅលើកោះពាមរាំង ក្នុងឃុំកោះចេក ស្រុកពាមជរ ខេត្តព្រៃវែង បាននិយាយថា ពេលនេះពួកគាត់ដូចត្រូវឆ្នោតរង្វាន់ធំ ព្រោះទទួលបានផ្លូវបេតុងដ៏ថ្មីស្រឡាងមួយខ្សែ ដែលពីមុនមក ពួកគាត់មិនដែលនឹកស្មានថា អាចបានផ្លូវល្អធ្វើដំណើរបែបនេះទេ ។
អ្នកភូមិទាំងនេះ បាននិយាយថា ដែនដីកោះពាមរាំងនេះ មិនធ្លាប់មានផ្លូវធំល្អ ធ្វើដំណើរនោះទេ មិនថា រដូវប្រាំង ឬរដូវវស្សា មានតែផ្លូវជង្ហុកភក់ល្បាប់ ពិបាកធ្វើដំណើរណាស់។ ប៉ុន្តែពេលនេះ លែងលំបាកហើយ ព្រោះក្រសួងរ៉ែ និងថាមពល បានផ្ដល់នូវផ្លូវបេតុងដ៏ថ្មីស្រឡាង១ខ្សែ ប្រវែងជាង ៥,០០០ម៉ែត្រ សណ្ដូកខ្លួនពីដើមកោះដល់ចុងកោះ អាចឱ្យប្រជាពលរដ្ឋធ្វើដំណើរបានយ៉ាងស្រួល ពិសេសការដឹកជញ្ជូនកសិផលទៅកាន់ទីផ្សារ ។
ថ្លៃក្នុងពិធីសម្ពោធដាក់ឱ្យប្រើប្រាស់ផ្លូវបេតុងថ្មីនេះ ដែលធ្វើឡើងកាលពីព្រឹកថ្ងៃទី៨ កុម្ភៈ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានមានប្រសាសន៍ថា ផ្លូវបេតុងនេះមានទទឹង ៤ម៉ែត្រ បណ្ដោយ ៥,០៩២ម៉ែត្រ និងកម្រាស់ ០,១៥ម៉ែត្រ សាងសង់ឡើងដោយប្រើប្រាស់ថវិកា មូលនិធិរ៉ែទ្រទ្រង់កិច្ចអភិវឌ្ឍន៍សហគមន៍មូលដ្ឋានរបស់ក្រសួងរ៉ែនិងថាមពល ។
ឯកឧត្តម កែវ រតនៈ បានបន្តថា កោះពាមរាំងនេះ នៅសល់ផ្លូវប្រវែងជិត ២,០០០ម៉ែត្រទៀត ដែលមិនទាន់បានសាងសង់ តែឯកឧត្តមនិងស្វែងរកថវិកា យកមកសាងសង់បង្ហើយក្នុងពេលឆាប់ៗ ធ្វើយ៉ាងណាឱ្យកោះពាមរាំងទាំងមូល មានផ្លូវបេតុងស្រស់ស្អាត និងងាយស្រួលដល់ប្រជាពលរដ្ឋធ្វើដំណើរឆ្លងកាត់ ពិសេសការដឹកកសិផលទៅកាន់ទីផ្សារ។
ជាមួយគ្នានេះឯកឧត្តម កែវ រតនៈ ក៏បានសន្យាជាមួយអ្នកភូមិកោះពាមរាំងថា នឹងចាត់ឱ្យមន្ត្រីជំនាញផ្នែកអគ្គិសនី ចុះមកសិក្សាពីលទ្ធភាពក្នុងការតបណ្ដាញអគ្គិសនី ចូលមកលើកោះពាមរាំងនេះ ដើម្បីឱ្យអ្នកភូមិនៅលើកោះនេះ មានភ្លើងអគ្គិសនីប្រើប្រាស់ទាំងអស់គ្នា ខណៈដែលពេលបច្ចុប្បន្ន នៅលើកោះពាមរាំងនេះ មិនទាន់មានភ្លើងអគ្គិសនីចូលដល់នោះទេ ៕
ចែករំលែកព័តមាននេះ