ខេត្តមណ្ឌលគិរី ៖ ដើម្បីទាក់ទាញភ្ញៀវទេសចរ និងការដឹកជញ្ជូនងាយស្រួល ហេដ្ឋារចនាសម្ព័ន្ធផ្លូវថ្នល់ដែលជាសរសៃឈាមសេដ្ឋកិច្ចដ៏សំខាន់ឆ្ពោះទៅកាន់តំបន់ទេសចរណ៍ល្បីៗក្នុងខេត្ត នាព្រឹកថ្ងៃទី៩ ខែកុម្ភៈ ឆ្នាំ២០២៦ អាជ្ញាធរខេត្តបានរៀបចំពិធីបើកការដ្ឋានកាត់ជួសជុលផ្លូវខេត្តលេខ ៣៧៦៤…
ខេត្តមណ្ឌលគិរី ៖ ដើម្បីទាក់ទាញភ្ញៀវទេសចរ និងការដឹកជញ្ជូនងាយស្រួល ហេដ្ឋារចនាសម្ព័ន្ធផ្លូវថ្នល់ដែលជាសរសៃឈាមសេដ្ឋកិច្ចដ៏សំខាន់ឆ្ពោះទៅកាន់តំបន់ទេសចរណ៍ល្បីៗក្នុងខេត្ត នាព្រឹកថ្ងៃទី៩ ខែកុម្ភៈ ឆ្នាំ២០២៦ អាជ្ញាធរខេត្តបានរៀបចំពិធីបើកការដ្ឋានកាត់ជួសជុលផ្លូវខេត្តលេខ ៣៧៦៤ (ផ្លូវប៊ូស្រា) ក្រោមវត្តមាន លោក ជាក់ ម៉េងហ៊ាង អភិបាលរងខេត្ត តំណាងឯកឧត្តម ថង សាវុន អភិបាលខេត្តមណ្ឌលគិរី ដោយមានការអញ្ជើញចូលរួមពីលោក រស់ គីមធន ប្រធានមន្ទីរសាធារណការ និងដឹកជញ្ជូនខេត្ត ព្រមទាំងមន្ត្រីរាជការពាក់ព័ន្ធជាច្រើនរូប។
លោក រស់ គីមធន ប្រធានមន្ទីរសាធារណការ និងដឹកជញ្ជូនខេត្ត បានឲ្យដឹងថា ផ្លូវខេត្តលេខ ៣៧៦៤ គឺជាខ្សែផ្លូវដ៏មានសក្ដានុពលបំផុត ដែលតភ្ជាប់ពីក្រុងសែនមនោរម្យ ទៅកាន់តំបន់ទេសចរណ៍ធម្មជាតិដ៏ល្បីល្បាញ គឺទឹកជ្រោះប៊ូស្រា និងតំបន់ភ្នំណាំលៀ។
លោកប្រធានមន្ទីរបានបញ្ជាក់ថា «គម្រោងជួសជុលនាពេលនេះ មានប្រវែងសរុប ១,៦០០ ម៉ែត្រ ដោយប្រើប្រាស់បច្ចេកទេសក្រាលកៅស៊ូពីរជាន់ (DBST) ដើម្បីធានាឱ្យបាននូវភាពរឹងមាំ និងឆ្លើយតបទៅនឹងទម្ងន់ដឹកជញ្ជូនកសិផលរបស់បងប្អូនកសិករក្នុងមូលដ្ឋាន ក៏ដូចជាសម្រួលដល់ការធ្វើដំណើររបស់ភ្ញៀវទេសចរជាតិ និងអន្តរជាតិឱ្យបានកាន់តែមានភាពងាយស្រួល និងសុវត្ថិភាព»។
ក្នុងពិធីនោះ លោក ជាក់ ម៉េងហ៊ាង អភិបាលរងខេត្តមណ្ឌលគិរី បានថ្លែងនូវការកោតសរសើរដល់មន្ទីរជំនាញដែលបានខិតខំយកចិត្តទុកដាក់លើការថែទាំ និងជួសជុលហេដ្ឋារចនាសម្ព័ន្ធក្នុងខេត្ត។ លោកបានជំរុញឱ្យក្រុមកាងារបច្ចេកទេស ត្រូវយកចិត្តទុកដាក់ខ្ពស់លើគុណភាពសំណង់ ដោយត្រូវអនុវត្តឱ្យត្រឹមត្រូវតាមស្ដង់ដារបច្ចេកទេស ដើម្បីឱ្យផ្លូវនេះមានភាពធន់ ប្រើប្រាស់បានយូរអង្វែង មិនមែនជួសជុលហើយឆាប់ខូចវិញនោះទេ។
លោកអភិបាលរងខេត្ត បានអំពាវនាវដល់បងប្អូនប្រជាពលរដ្ឋ ជាពិសេសអ្នកដឹកជញ្ជូនកសិផល សូមកុំដឹកលើសទម្ងន់កំណត់ ដែលជាដើមហេតុចម្បងធ្វើឱ្យផ្លូវឆាប់ខូច។ លោកថា៖ «ផ្លូវគឺជាសម្បត្តិរួម ដូច្នេះយើងត្រូវរួមគ្នាថែរក្សា ដើម្បីផលប្រយោជន៍រួមក្នុងសហគមន៍យើង»។ហើយនៅពេលផ្លូវស្អាត លោកបានក្រើនរំលឹកដល់អ្នកធ្វើដំណើរទាំងអស់ ត្រូវបង្កើនការប្រុងប្រយ័ត្ន និងគោរពច្បាប់ចរាចរណ៍ឱ្យបានខ្ជាប់ខ្ជួន ដើម្បីជៀសវាងគ្រោះថ្នាក់ជាយថាហេតុ៕
ចែករំលែកព័តមាននេះ