ខេត្តសៀមរាប ៖ ទិដ្ឋភាពដ៏រស់រវើក និងពោរពេញដោយស្នាមញញឹមបានកើតឡើងនៅភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប ។ អ្នកភូមិបង្កោងយ៉ាងច្រើនកុះករ បាននាំគ្នាចាប់ត្រីរួមគ្នា…
ខេត្តសៀមរាប ៖ ទិដ្ឋភាពដ៏រស់រវើក និងពោរពេញដោយស្នាមញញឹមបានកើតឡើងនៅភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប ។
អ្នកភូមិបង្កោងយ៉ាងច្រើនកុះករ បាននាំគ្នាចាប់ត្រីរួមគ្នា ក្នុងពិធីឡើងមាឃ ឬឡើងអ្នកតា
នៅខេត្តសៀមរាប ។ នេះបើយោងតាមផេក ភ្នាក់ងារសារព័ត៌មានកម្ពុជា – AKP បានប្រកាសនារសៀលថ្ងៃទី៨ ខែកុម្ភៈ ឆ្នាំ២០២៦ ។
ទិដ្ឋភាពប្រជាពលរដ្ឋយ៉ាងច្រើនកុះករ ចូលរួមក្នុងកម្មវិធីចាប់ត្រីរួមគ្នា សម្រាប់ធ្វើម្ហូបអាហារពិធីឡើងមាឃ ឬឡើងអ្នកតា ទៅតាមទម្លាប់ពីបុរាណរបស់អ្នកភូមិនៅព្រឹកថ្ងៃទី០៨ ខែកុម្ភៈ ឆ្នាំ២០២៦ ក្នុងបឹងបុរាណមួយដែលអ្នកភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប រួមគ្នាអភិរក្សត្រីមិនឱ្យមានការនេសាទផ្តេសផ្តាស គឺទុកសម្រាប់តែធ្វើពិធីឡើងមាឃ ឬឡើងអ្នកតាប៉ុណ្ណោះ ។
សូមបញ្ជាក់ថា ពិធីនេះមិនមែនគ្រាន់តែជាការចាប់ត្រីធម្មតានោះទេ ប៉ុន្តែវាគឺជាសក្ខីភាពនៃការគោរពប្រតិបត្តិតាមគន្លងដូនតា។ ជាដៀងរាល់ឆ្នាំ អ្នកភូមិបង្កោងតែងតែរួមគ្នារក្សាទំនៀមទម្លាប់នេះ ដើម្បីបួងសួងសុំសេចក្តីសុខសប្បាយ និងអរគុណដល់ម្ចាស់ទឹកម្ចាស់ដី (អ្នកតា) ដែលបានថែរក្សាភូមិករឱ្យមានភាពត្រជាក់ត្រជុំ និងទទួលបានទិន្នផលកសិកម្មល្អប្រសើរ។
ពិធីចាប់ត្រីនៅភូមិបង្កោង មិនត្រឹមតែជាការកម្សាន្ត ឬការស្វែងរកអាហារប៉ុណ្ណោះទេ ប៉ុន្តែវាគឺជាដួងព្រលឹងនៃវប្បធម៌មូលដ្ឋាន ដែលជួយពង្រឹងចំណងមិត្តភាពរវាងអ្នកភូមិ និងជួយឱ្យយុវជនជំនាន់ក្រោយបានស្គាល់ និងស្រឡាញ់កេរដំណែលដូនតារបស់ខ្លួនកាន់តែខ្លាំងឡើង។
ចែករំលែកព័តមាននេះ