ទីក្រុងតូក្យូ៖ គណបក្សប្រជាធិបតេយ្យសេរី (LDP) ដែលជាគណបក្សកំពុងដឹកនាំប្រទេសជប៉ុនសព្វថ្ងៃនេះរំពឹងថានឹងទទួលបានអាសនៈភាគច្រើនដាច់ខាតដែលអាចបង្កើតរដ្ឋាភិបាលនៅអាណត្តិថ្មីដោយមិនពិបាក។ នេះបើយោងតាមលទ្ធផលស្ទង់មតិរបស់ប្រជាជនជប៉ុនដែលបានទៅបោះឆ្នោត និងចាកចេញពីមណ្ឌលបោះឆ្នោតត្រឡប់ទៅផ្ទះវិញ (exit poll)។ យោងតាមលទ្ធផលនេះ គេអាចវាយតម្លៃថាគណបក្សដែលមានលោកស្រីតាកាអ៊ីឈិជាបេក្ខជននាយករដ្ឋមន្ត្រីនោះនឹងឈ្នះឆ្នោតយ៉ាងភ្លូកទឹកភ្លូកដី។
គេព្យាករថាគណបក្សប្រជាធិបតេយ្យសេរីអាចនឹងទទួលបានចន្លោះពី២៧៤ទៅ៣២៨អាសនៈនៅក្នុងចំណោមអាសនៈសរុបចំនួន៤៦៥។ នេះបើយោងតាមការស្ទង់មតិប្រជាជនដែលទើបតែចាកចេញពីមណ្ឌលបោះឆ្នោត និងផ្សព្វផ្សាយដោយទូរទស្សន៍អឹនអេចខេ (NHK) របស់ជប៉ុន។ គណបក្សប្រជាធិបតេយ្យសេរី រួមគ្នាជាមួយគណបក្សសម្ព័ន្ធភាព (អ៊ីស៊ីន) អាចដណ្ដើមបានចន្លោះពី៣០២ទៅ៣៦៦អាសនៈ។
ការបោះឆ្នោតលើកនេះរាងប្លែកពីសព្វមួយដងព្រោះរៀបចំនៅរដូវរងាធ្លាក់ទឹកកកខ្លាំងស្ទើរតែគ្រប់ទីកន្លែង។ លោកស្រីតាកាអ៊ីឈិប្រហែលជាមានទំនុកចិត្តថាតំណែងនាយករដ្ឋមន្ត្រីមុខជាធ្លាក់ទៅលើដៃរបស់លោកស្រីជាមិនខាន។ លោកស្រីហ៊ានសន្យាយ៉ាងប្រាកដប្រជាថាបើសិនគណបក្សរបស់លោកស្រីសហការជាមួយគណបក្សសម្ព័ន្ធភាពមិនអាចរកបានសំឡេងភាគច្រើនដាច់ខាតនៅក្នុងសភាទេ លោកស្រីសុខចុះចេញពីតំណែងជាប្រធានគណបក្ស។
ថ្វីដ្បិតលោកស្រីនៅតែអាចរក្សាតំណែងនាយករដ្ឋមន្ត្រី ប៉ុន្តែគេមិនទាន់ដឹងថាតើលោកស្រីអាចនឹងរក្សាតំណែងនេះបានយូរប៉ុណ្ណាទេព្រោះមានឧបសគ្គមួយចំនួនដែលលោកស្រីត្រូវប្រឈមមុខដោះស្រាយ។ ឧទាហរណ៍ គេកំពុងបារម្ភថាមិនដឹងលោកស្រីអាចគ្រប់គ្រងហិរញ្ញវត្ថុសាធារណៈបាន ឬមិនបាន? និងចំណុចមួយទៀតមិនដឹងថាតើលោកស្រីអាចដោះស្រាយជម្លោះការទូតជាមួយប្រទេសបានដែរឬទេពាក់ព័ន្ធនឹងបញ្ហាកោះតៃវ៉ាន់?
លោកស្រីតាកាអ៊ីឈិប្រើវិធីទាក់ទាញសន្លឹកឆ្នោតតាមរយៈការសន្យាបញ្ចេញកញ្ចប់ថវិកាជាតិ១៣៥ពាន់លានដុល្លារដើម្បីកាត់បន្ថយថ្លៃចំណាយលើជីវភាពរស់នៅរបស់ប្រជាជន។ ក្រោយមក លោកស្រីសន្យាថានឹងព្យួរទុកការយកពន្ធ៨%លើគ្រឿងឧបភោគបរិភោគរយៈ ពេល២ឆ្នាំ។ មានន័យថាទឹកប្រាក់៣០ពាន់លានដុល្លារក្នុងមួយឆ្នាំៗដែលត្រូវចូលទៅក្នុងថវិកាជាតិនោះនឹងត្រូវលើកលែង។
យុទ្ធសាស្ត្រទាក់ទាញសន្លឹកឆ្នោតរបស់លោកស្រីតាកាអ៊ីឈិមួយទៀតគឺការបំផុសគំនិតជាតិនិយម។ គេនៅចាំបានថាបន្ទាប់ពីជួបលោកដូណាល់ត្រាំ និងលោកស៊ីជីនពីងរួចមក លោកស្រីតាកាអ៊ីឈិបានឡើងថ្លែងនៅក្នុងរដ្ឋសភានិយាយអំពីការត្រៀមធ្វើអន្តរាគមន៍យោធានៅតៃវ៉ាន់។ ពាក្យសម្ដីនេះធ្វើឱ្យប្រទេសចិនបញ្ចេញប្រតិកម្មជាបន្តបន្ទាប់ និងហាមឃាត់ប្រជាជនខ្លួនមិនឱ្យធ្វើដំណើរទៅជប៉ុនដោយសារមូលហេតុសុវត្ថិភាព និងសន្តិសុខ។
ទោះបីចិនទាមទារឱ្យដកពាក្យសម្ដីនោះត្រឡប់មកវិញដើម្បីបញ្ចប់ជម្លោះការទូត ប៉ុន្តែលោកស្រីតាកាអ៊ីឈិនៅតែប្រកាន់ជំហរដដែល។ ពាក្យសម្ដីដែលនិយាយចេញមកហើយមិនអាចលេបវិញទេ។ ការប្រកាន់ជំហរដាច់ណាត់របស់នារីបេះដូងដែករបស់ជប៉ុនរូបនេះធ្វើឱ្យក្រុមអ្នកជាតិនិយមនៅជប៉ុនគាំទ្រយ៉ាងពេញទំហឹង។ ថ្វីដ្បិតពាក្យសម្ដីរបស់លោកស្រីធ្វើឱ្យប្រទេសចិនខឹងសម្បារ ប៉ុន្តែក៏ធ្វើឱ្យលោកស្រីចំណេញនយោបាយមិនស្ទើរដែរ។
អ្នកវិភាគម្នាក់ឈ្មោះម៉ាការីតា អេស្តាវេស អាបេ (Margarita Estevez-Abe) ជាគ្រូបង្រៀននៅសាកលវិទ្យាល័យស៊ីរ៉ាគូសេ (Syracuse University) យល់ថាបើសិនលោកស្រីតាកាអ៊ីឈិឈ្នះឆ្នោតលើកនេះ លោកស្រីនឹងមានឱកាសកែសម្រួលទំនាក់ទំនងការទូតរវាងចិន និងជប៉ុនឡើងវិញ។ អ្នកវិភាគរូបនេះយល់ថាបើឈ្នះឆ្នោតនៅថ្ងៃនេះ លោកស្រីតាកាអ៊ីឈិអាចសម្រាកយកកម្លាំងបានហើយ ហើយមិនចាំបាច់ខ្វាយខ្វល់អំពីការបោះឆ្នោតទៀតទេ។ រហូតដល់ឆ្នាំ២០២៨ចាំគិតគ្នាទៀត។ ពេលនោះ ប្រទេសជប៉ុននឹងរៀបចំការបោះឆ្នោតព្រឹទ្ធសភា៕ ប្រភព៖ ដឹ ហ្កាឌាន (The Guardian) និងប្រភពដទៃទៀត
ចែករំលែកព័តមាននេះ