ទីក្រុងប៉េកាំង ៖ បើយោងតាមទិន្នន័យពីធនាគារប្រជាជនចិន (PBOC) ដែលជាធនាគារកណ្តាលរបស់ប្រទេស កាលពីថ្ងៃទី៧ ខែកុម្ភៈ ឆ្នាំ២០២៦ បានបង្ហាញថា ខ្លួនបានបន្តទិញមាសចូលសម្រាប់ខែទី…
ទីក្រុងប៉េកាំង ៖ បើយោងតាមទិន្នន័យពីធនាគារប្រជាជនចិន (PBOC) ដែលជាធនាគារកណ្តាលរបស់ប្រទេស កាលពីថ្ងៃទី៧ ខែកុម្ភៈ ឆ្នាំ២០២៦ បានបង្ហាញថា ខ្លួនបានបន្តទិញមាសចូលសម្រាប់ខែទី ១៥ ជាប់គ្នា គិតត្រឹមខែមករា ឆ្នាំ២០២៦។ នេះបើតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
តាមទិន្នន័យរបស់ PBOC បានបង្ហាញថា ការកាន់កាប់មាសរបស់ប្រទេសចិន បានកើនឡើងដល់ ៧៤,១៩ លានត្រយអោន (Troy Ounce) ឬ ២ ៥៤៣ តោន នៅចុងខែមករា ឆ្នាំ២០២៦ កើនឡើងពី ៧៤,១៥ លានត្រយអោន កាលពីខែធ្នូ។ តម្លៃទុនបម្រុងមាសរបស់ចិនបានកើនឡើងដល់ ៣៦៩,៥៨ ពាន់លានដុល្លារ នៅចុងខែមករា ពោលកើនពី ៣១៩,៤៥ ពាន់លានដុល្លារ កាលពីខែធ្នូ។
មាស ដែលត្រូវបានចាត់ទុកជាទ្រព្យសកម្មដ៏មានសុវត្ថិភាពបំផុត ដើម្បីការពារហានិភ័យភូមិសាស្ត្រនយោបាយ និងសេដ្ឋកិច្ចនោះ បានឃើញការទិញកើនឡើងយ៉ាងខ្លាំងដោយប្រថុយប្រថានក្នុងខែមករា ដោយបានរុញច្រានតម្លៃជិតដល់កំណត់ត្រា ៥ ៦០០ ដុល្លារក្នុង១អោន ឬ ៦ ៧៤៦ ដុល្លារក្នុង១តម្លឹង។ ប៉ុន្តែការកើនឡើងតម្លៃមាសភ្លាមៗបានធ្លាក់ចុះយ៉ាងឆាប់រហ័ស បន្ទាប់ពីការតែងតាំងលោក Kevin Warsh ក្លាយជាប្រធានបន្ទាប់នៃធនាគារសហព័ន្ធអាមេរិកនៅចុងខែមករា ដោយតម្លៃបានធ្លាក់ចុះដល់ ៤ ៤០៣ ដុល្លារ/អោន ឬ ៥ ៣០៤ ដុល្លារ/តម្លឹង។
ទោះយ៉ាងណាក៏ដោយ តម្លៃមាសអន្តរជាតិបានស្ទុះងើបឡើងវិញ ដោយបានរក្សាតម្លៃនៅ ៤ ៩៦៦ ដុល្លារ/អោន ឬ ៥ ៩៨៣ ដុល្លារ/តម្លឹង គិតត្រឹមម៉ោង ៣ រសៀលថ្ងៃទី៨ ខែកុម្ភៈ ឆ្នាំ២០២៦ (ម៉ោងនៅកម្ពុជា) ជំរុញដោយការព្រួយបារម្ភជាបន្តបន្ទាប់អំពីបញ្ហារវាងសហរដ្ឋអាមេរិក និងប្រទេសអ៊ីរ៉ង់៕
ចែករំលែកព័តមាននេះ