អាមេរិកចង់ឱ្យរុស្ស៊ី និងអ៊ុយក្រែន បញ្ចប់សង្គ្រាមត្រឹមពាក់កណ្តាលឆ្នាំនេះ
ទីក្រុងកៀវ ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី (Volodymyr Zelensky) បានថ្លែងថា សហរដ្ឋអាមេរិកចង់ឱ្យសង្គ្រាមរុស្ស៊ី…
ទីក្រុងកៀវ ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី (Volodymyr Zelensky) បានថ្លែងថា សហរដ្ឋអាមេរិកចង់ឱ្យសង្គ្រាមរុស្ស៊ី និងអ៊ុយក្រែនបញ្ចប់នៅខែមិថុនា ខាងមុខនេះ ដោយបន្ថែមថា ទាំងអ៊ុយក្រែន និងរុស្ស៊ី ត្រូវបានអញ្ជើញឱ្យទៅសហរដ្ឋអាមេរិក សម្រាប់ការចរចាសប្តាហ៍ក្រោយ ដើម្បីបើកផ្លូវឈានទៅដល់កិច្ចព្រមព្រៀងបញ្ចប់សង្គ្រាមរយៈពេលជិត ៤ ឆ្នាំមួយនេះ។ នេះបើយោងតាមប្រភពពី BBC, The Guardian និង Aljazeera បានចេញផ្សាយកាលពីថ្ងៃទី៧ ខែកុម្ភៈ ឆ្នាំ២០២៦។
លោក ហ្សេឡេនស្គី បានប្រាប់អ្នកយកព័ត៌មាននៅទីក្រុងក្កៀវ កាលពីថ្ងៃទី៦ ខែកុម្ភៈ និងត្រូវបានចេញផ្សាយកាលពីថ្ងៃទី៧ ខែកុម្ភៈ ថា សហរដ្ឋអាមេរិកកំពុងស្នើឱ្យភាគីទាំងពីរបញ្ចប់សង្គ្រាមនៅដើមរដូវក្តៅនេះ ហើយទំនងនឹងដាក់សម្ពាធលើភាគីទាំងពីរយ៉ាងជាក់លាក់ស្របទៅតាមកាលវិភាគនេះ។
លោកបានបន្ថែមថា រដ្ឋបាលលោកប្រធានាធិបតី ដូណាល់ ត្រាំ (Donald Trump) បានទទូចលើពេលវេលាច្បាស់លាស់សម្រាប់ព្រឹត្តិការណ៍ទាំងអស់ ហើយបានស្នើឱ្យមានការរៀបចំកិច្ចចរចាត្រីភាគីជុំបន្ទាប់នៅសប្តាហ៍ក្រោយនៅសហរដ្ឋអាមេរិកផ្ទាល់តែម្តង ដែលទំនងជានៅទីក្រុងម៉ៃអាមី (Miami)។ ប្រទេសអ៊ុយក្រែនក៏បានបញ្ជាក់ថា ខ្លួននឹងចូលរួមកិច្ចចរចាមួយនេះ។
បើតាមប្រភពពី BBC បានរាយការណ៍ថា មិនទាន់មានការអត្ថាធិប្បាយភ្លាមៗពីសហរដ្ឋអាមេរិក និងរុស្ស៊ីនៅឡើយទេ ប៉ុន្តែលោកប្រធានាធិបតី ដូណាល់ ត្រាំ បានជំរុញឱ្យភាគីទាំងពីរបញ្ចប់សង្គ្រាមចាប់តាំងពីលោកបានឡើងកាន់តំណែងម្តងទៀត កាលពីជាងមួយឆ្នាំមុន។ ទន្ទឹមនឹងនេះ រុស្ស៊ីបានបន្តការវាយប្រហាររបស់ខ្លួនទៅលើហេដ្ឋារចនាសម្ព័ន្ធថាមពលរបស់អ៊ុយក្រែន ដែលបណ្តាលឱ្យមានការដាច់ចរន្តអគ្គិសនីបន្ថែមទៀត អំឡុងពេលអាកាសធាតុចុះត្រជាក់ខ្លាំង។
នៅក្នុងមតិយោបល់ដែលបានចេញផ្សាយនៅថ្ងៃទី៧ ខែកុម្ភៈនោះ លោក ហ្សេឡេនស្គីបានប្រាប់អ្នកយកព័ត៌មានអំពីអ្វីដែលបានកើតឡើង អំឡុងជុំទី ២ នៃកិច្ចចរចាសន្តិភាពដែលសម្របសម្រួលដោយអាមេរិកនៅទីក្រុងអាប៊ុយដាប៊ី (Abu Dhabi) ប្រទេសអារ៉ាប់រួម ដែលបានបញ្ចប់កាលថ្ងៃទី៦ ខែកុម្ភៈ ដោយគ្មានរបាយការណ៍ពីការទម្លាយភាពទាល់ច្រកនោះថា បញ្ហាលំបាកនៅតែមាន រួមទាំងសម្បទានទឹកដីអ៊ុយក្រែន៕
ចែករំលែកព័តមាននេះ