ទីក្រុងបវ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានចុះហត្ថលេខាលើបទបញ្ជាប្រតិបត្តិមួយ ដែលគំរាមដាក់ពន្ធគយបន្ថែមលើប្រទេសណាដែលបន្តធ្វើពាណិជ្ជកម្មជាមួយប្រទេសអ៊ីរ៉ង់។…
ទីក្រុងបវ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានចុះហត្ថលេខាលើបទបញ្ជាប្រតិបត្តិមួយ ដែលគំរាមដាក់ពន្ធគយបន្ថែមលើប្រទេសណាដែលបន្តធ្វើពាណិជ្ជកម្មជាមួយប្រទេសអ៊ីរ៉ង់។ បទបញ្ជានេះ ដែលចេញផ្សាយនៅថ្ងៃទី៦ ខែកុម្ភៈ ឆ្នាំ២០២៦ (ម៉ោងនៅសហរដ្ឋអាមេរិក) មិនបានបញ្ជាក់ពីអត្រាណាមួយនោះទេ ប៉ុន្តែ ២៥% គឺជាឧទាហរណ៍ដែលមានស្រាប់។ នេះបើតាមប្រភពពី BBC ចេញផ្សាយកាលពីថ្ងៃទី៧ ខែកុម្ភៈ ឆ្នាំ២០២៦។
ពន្ធគយអាចអនុវត្តចំពោះទំនិញនាំចូលទៅសហរដ្ឋអាមេរិកពីប្រទេសណាដែលទិញ នាំចូល ឬទទួលទំនិញ ឬសេវាកម្មណាមួយពីប្រទេសអ៊ីរ៉ង់ដោយផ្ទាល់ ឬដោយប្រយោល។ លោក ត្រាំ មិនបានអត្ថាធិប្បាយដោយផ្ទាល់លើបទបញ្ជានេះទេ ប៉ុន្តែបានបញ្ជាក់ជាថ្មីថា អាវុធនុយក្លេអ៊ែរគ្មានសម្រាប់អ៊ីរ៉ង់ នៅពេលលោកថ្លែងសុន្ទរកថាពីយន្តហោះ Air Force One កាលពីយប់ថ្ងៃទី៦ ខែកុម្ភៈ ឆ្នាំ២០២៦។ ការផ្លាស់ប្តូរថ្មីៗនេះ បានកើតឡើងបន្ទាប់ពីការចរចារវាងមន្ត្រីជាន់ខ្ពស់អាមេរិក និងអ៊ីរ៉ង់នៅប្រទេសអូម៉ង់ បន្ទាប់ពីការគំរាមកំហែងជាច្រើនសប្តាហ៍ពីភាគីទាំងពីរ។
លោក ត្រាំ បានគំរាមដាក់ពន្ធ ២៥% លើបណ្តាប្រទេសដែលធ្វើពាណិជ្ជកម្មជាមួយអ៊ីរ៉ង់ កាលពីដើមឆ្នាំនេះ នៅក្នុងបង្ហោះសារមួយលើបណ្តាញសង្គម Truth Social។ នៅថ្ងៃទី ១២ ខែមករា លោកបានសរសេរថា៖ «ចាប់ពីពេលនេះតទៅ ប្រទេសណាមួយដែលធ្វើអាជីវកម្មជាមួយសាធារណរដ្ឋអ៊ីស្លាមអ៊ីរ៉ង់នឹងត្រូវបង់ពន្ធ ២៥% លើអាជីវកម្មណាមួយ និងទាំងអស់ដែលកំពុងធ្វើជាមួយសហរដ្ឋអាមេរិក»។ ទោះយ៉ាងណាក៏ដោយ នៅពេលនោះ មិនមានព័ត៌មានលម្អិតបន្ថែមណាមួយត្រូវបានផ្តល់ជូនអំពីរបៀបនៃអនុវត្តពន្ធនឹងដំណើរការនោះទេ។
ដោយឡែក ក្រសួងការបរទេសអាមេរិកបានប្រកាសនៅថ្ងៃទី៦ ខែកុម្ភៈ បានប្រកាសថា ខ្លួនកំពុងដាក់ទណ្ឌកម្មលើអង្គភាពចំនួន ១៥ ដែលបានជួញដូរប្រេងឆៅ ផលិតផលប្រេងកាត ឬផលិតផលគីមីឥន្ធនៈដែលមានប្រភពដើមពីអ៊ីរ៉ង់។
យ៉ាងណាមិញ មិនមានការអត្ថាធិប្បាយភ្លាមៗណាមួយ ចំពោះការប្រកាសទាំងពីររបស់សហរដ្ឋអាមេរិកពីប្រទេសអ៊ីរ៉ង់នោះទេ ខណៈដែលប្រទេសនេះកំពុងទទួលរងទណ្ឌកម្មយ៉ាងធ្ងន់ធ្ងរដែលដាក់ដោយសហរដ្ឋអាមេរិក និងមហាអំណាចលោកខាងលិចផ្សេងទៀតលើកម្មវិធីអភិវឌ្ឍអាវុធនុយក្លេអ៊ែររបស់ខ្លួន៕
ចែករំលែកព័តមាននេះ