ទីក្រុងបាងកក៖ ថ្ងៃនេះ ប្រជាជនថៃធ្វើដំណើរទៅបោះឆ្នោតនៅតាមមណ្ឌលរៀងៗខ្លួន។ គេសម្លឹងឃើញគណបក្សនយោបាយចំនួនបីដែលមាននិន្នាការខុសៗគ្នានឹងក្លាយជាគូប្រជែងគ្នា ហើយនឹងទទួលបានសំឡេងគាំទ្រច្រើនជាងគេ។ ក្នុងនោះគឺគណបក្សប្រជាជនដែលមាននិន្នាការចម្រើននិយម, គណបក្សភឿថៃដែលមាននិន្នាការប្រជានិយម និងគណបក្សភូមិចៃថៃដែលមាននិនា្នការអភិរក្សនិយម។
លទ្ធផលស្ទង់មតិបង្ហាញថាគណបក្សប្រជាជនដែលសន្យាផ្លាស់ប្ដូររបៀបដឹកនាំរដ្ឋ និងធ្វើកំណែទម្រង់សេដ្ឋកិច្ចនឹងទទួលបានសំឡេងគាំទ្រច្រើនជាងគេ។ គណបក្សនេះទទួលបានការគាំទ្រពីអ្នកបោះឆ្នោតវ័យក្មេង។ ទោះជាយ៉ាងណាក្ដី គេមិនរំពឹងថាគណបក្សប្រជាជនដែលមានលោកណាត់ថាផុង រឿងផាន់យ៉ាវុធជាបេក្ខជននាយករដ្ឋមន្ត្រីនោះអាចនឹងទទួលបានអាសនៈច្រើនគ្រប់គ្រាន់ដើម្បីបង្កើតរដ្ឋាភិបាលម្នាក់ឯងបានឡើយ។
ហេតុនេះ គណបក្សប្រជាជនបើទុកជាបានអាសនៈច្រើនជាងគេ បើសិនជាត្រូវបង្កើតរដ្ឋាភិបាលក៏ត្រូវតែដើរកៀរគរគណបក្សដទៃទៀតដើម្បីបង្រ្គប់សំឡេង និងបង្កើតរដ្ឋាភិបាលចម្រុះ។ គណបក្សប្រជាជនកំពុងឈរតទល់គ្នាជាមួយគណបក្សភូមិចៃថៃដឹកនាំដោយនាយករដ្ឋមន្ត្រីចាំផ្ទះថៃ លោកអនុទីន ចាន់វីរៈគុល និងគណបក្សភឿថៃដែលមានក្មួយប្រុសលោកថាក់ស៊ីនជាបេក្ខជននាយករដ្ឋមន្ត្រី។
លោកណាត់ថាផុង រឿងផាន់យ៉ាវុធ (Natthaphong Ruengpanyawut) ជាបេក្ខជននាយករដ្ឋមន្ត្រីរបស់គណបក្សប្រជាជនការបោះឆ្នោតលើកនេះរៀបចំឡើងនៅក្នុងស្ថានភាពដែលសេដ្ឋកិច្ចរបស់ប្រទេសថៃកំពុងមានបញ្ហាដោយសារអស្ថិរភាពនយោបាយ។ ប្រទេសថៃមាននយោបាយមិននឹងននោះទេ ហើយធ្លាប់មានប្រវត្តិមនុស្សហែបាតុកម្មនៅតាមដងផ្លូវ និងការធ្វើរដ្ឋប្រហារយោធាជាហូរហែ។ ចំណែកតុលាការធម្មនុញ្ញ និងស្ថាប័នដ៏មានឥទ្ធិពលដទៃទៀតដែលគេចាត់ទុកថាអព្យាក្រឹតនោះតែងតែជ្រៀតជ្រែកនៅក្នុងកិច្ចការនយោបាយ។
លោកយុទ្ធឆាណាន វង្សសាវ៉ាត (Yodchanan Wongsawat) ជាក្មួយប្រុសលោកថាក់ស៊ីន បានចេញទៅបោះឆ្នោតកាលពីព្រឹកមិញគណបក្សប្រជាជនសព្វថ្ងៃនេះទទួលរងសម្ពាធមិនតិចនោះទេ។ ពួកគេត្រូវតែបង្ខំចិត្តបោះបង់ចោលគោលនយោបាយដែលចង់កែប្រែច្បាប់ស្ដីពីការប្រមាថព្រះមហាក្សត្រ។ ប៉ុន្តែគណបក្សនេះក៏សន្យាធ្វើកំណែទម្រង់របៀបដឹកនាំរដ្ឋ យោធា ដោះស្រាយការរកស៊ីផ្ដាច់មុខ និងតាក់តែងរដ្ឋធម្មនុញ្ញឡើងវិញដើម្បីឱ្យប្រទេសជាតិមានលក្ខណៈប្រជាធិបតេយ្យជាងពេលបច្ចុប្បន្ន។ គណបក្សនេះក៏ផ្ដល់អាទិភាពលើការកម្ចាត់អំពីពុករលួយផងដែរ។
បេក្ខជនរបស់គណបក្សភូមិចៃថៃ លោកអនុទីន ចាត់ទុកខ្លួនលោកជាមេដឹកនាំដែលអាចការពារបូរណភាពទឹកដី។ លោកក៏ត្រូវគេមើលឃើញថាជាបេក្ខជនសំណព្វចិត្តរបស់ក្រុមអ្នកយោធានិយម និងរាជានិយមផងដែរ។ ចំណែកគណបក្សភឿថៃសន្យាថានឹងបន្តអនុវត្តនយោបាយប្រជានិយមរបស់ខ្លួន។ ក្នុងនោះក៏មានកម្មវិធីចែកលុយជូនប្រជាជន១លានបាតសម្រាប់ប្រជាជន៩នាក់ជារៀងរាល់ថ្ងៃផងដែរ។
គួរកត់សម្គាល់ថាការបោះឆ្នោតលើកនេះក៏រួមបញ្ចូលទាំងការបោះឆ្នោតប្រជាមតិដើម្បីចង់ដឹងមតិផ្ទាល់ពីប្រជាជនថាតើពួកគេគិតថាគួរតែផ្លាស់ប្ដូររដ្ឋធម្មនុញ្ញបច្ចុប្បន្នដែលតាក់តែងឡើងដោយក្រុមយោធាតាំងពីឆ្នាំ២០១៧ដែរឬទេ? រហូតមកដល់ពេលនេះ គេមិនបានដឹងសេចក្ដីលម្អិតអំពីសេចក្ដីព្រាងរដ្ឋធម្មនុញ្ញនៅឡើយទេ។ ប្រជាជនគ្រាន់តែបញ្ជាក់មតិរបស់ខ្លួនថាតើគួរ ឬមិនគួរតែប៉ុណ្ណោះ។ ក្រុមអ្នកគាំទ្រលទ្ធិប្រជាធិបតេយ្យជឿជាក់ថារដ្ឋធម្មនុញ្ញបច្ចុប្បន្ននេះត្រូវតែសរសេរឡើងវិញដើម្បីឱ្យប្រទេសជាតិមានលក្ខណៈប្រជាធិបតេយ្យជាងមុន និងកាត់បន្ថយអំណាចរបស់ស្ថាប័នដែលកកើតឡើងមិនតាមរយៈការបោះឆ្នោតផ្ទាល់ពីប្រជាជនតួយ៉ាងដូចជាស្ថាប័នយោធា និងតុលាការជាដើម៕ ប្រភព៖ ដឹហ្កាឌាន (The Guardian) និងប្រភពដទៃទៀត
ចែករំលែកព័តមាននេះ