ខេត្តពោធិ៍សាត់ ៖ ទិដ្ឋភាពនៃការខូចខាតទាំងស្រុងស្ពានជ័យជម្នះ (ស្ពានមេទឹក) ដែលស្ថិតក្នុងឃុំថ្មដា ស្រុកវាលវែង ខេត្តពោធិ៍សាត់ ដែលត្រូវបានទាហានឈ្លានពានថៃ ទម្លាក់គ្រាប់បែកដោយប្រើយន្តហោះ F-16 កម្ទេចចោល កាលពីថ្ងៃទី១៣ ខែធ្នូ ឆ្នាំ២០២៥ ។ នេះបើយោងតាមផេកទីភ្នាក់ងារសារព័ត៌មានកម្ពុជា – AKP បានប្រកាសនាថ្ងៃទី៧ ខែកុម្ភៈ ឆ្នាំ២០២៦ ។
នៅថ្ងៃទី០៧ ខែកុម្ភៈ ឆ្នាំ២០២៦នេះ ក្រុមការងារទីភ្នាក់ងារសារព័ត៌មានកម្ពុជា AKP រួមជាមួយអង្គភាពព័ត៌មាន ចំនួន១១ផ្សេងទៀត ដែលដឹកនាំដោយក្រសួងព័ត៌មានបានចុះមកផ្តិតយកទិដ្ឋភាពដោយផ្ទាល់នៅទីនោះជាថ្មី ដើម្បីបង្ហាញឱ្យឃើញច្បាស់ពីទង្វើឈ្លានពាន ការបាញ់ផ្លោង និងទម្លាក់គ្រាប់បែក មិនរើសមុខ មិនរើសទីតាំងរបស់ទាហានថៃ មកលើដែនអធិបតេយ្យភាពកម្ពុជា ។
សូមបញ្ជាក់ថា ៖ ស្ពានជ័យជំនះ(ស្ពានមេទឹក)ត្រូវបានស្ថាបនាជាស្ពានបេតុង (ប្រេកុងត្រាំង) ដែលតភ្ជាប់ពីពីត្រើយម្ខាងទៅម្ខាងទៀតនៃស្ទឹងមេទឺក ស្ថិតលើផ្លូវជាតិលេខ៥៥ ត្រង់គីឡូម៉ែត្រលេខ ១៦៩+៤០០ មានប្រវែង ១៨០ម៉ែត្រ ទទឹង ១០ម៉ែត្រ ។
ស្ពាននេះស្ថាបនារួចក្នុងឆ្នាំ២០១៨ ដោយក្រុមហុនចិន CRBC ។ ស្ពាននេះ មានចំងាយពីព្រំដែនប្រហែល ៨,៥គីឡូម៉ែត្រ ដែលជាច្រកងាយស្រួលតែមួយគត់ ភ្ជាប់ទៅប្រជុំជនថ្មដា ស្រុកវាលវែង។
បច្ចុប្បន្នដើម្បីសម្រួលដល់ចរាចរណ៍ទៅមករបស់ប្រជាពលរដ្ឋក្នុងមូលដ្ឋាន ក្រសួងសាធារណការ និងដឹកជញ្ជូន ព្រមទាំងមន្ទីរសាធារណការនិងដឹកជញ្ជូនខេត្តពោធិ៍សាត់ និងអាជ្ញាធរ បានជួសជុលផ្លូវក្រួសក្រហមដើម្បីធ្វើដំណើររបស់ប្រជាពលរដ្ឋ។
ចែករំលែកព័តមាននេះ