ទីក្រុងវ៉ាស៊ីនតោន៖ អតីតអ្នកការទូតជើងចាស់អាមេរិកយល់ថាអ៊ីរ៉ង់គ្រាន់តែចង់ទិញពេលវេលាតែប៉ុណ្ណោះ។ មានន័យថាចរចាចេះតែចរចាទៅ ប៉ុន្តែរកដំណោះស្រាយមិនឃើញ។ ការថ្លែងដូច្នេះចំពេលដែលបណ្ដាប្រទេសសំខាន់ៗនៅមជ្ឈិមបូព៌ាកំពុងតែខិតខំថ្នាក់ថ្នមសភាពការណ៍ និងធ្វើនយោបាយការទូតយ៉ាងដុតដៃដុតជើងដើម្បីបញ្ចៀសសង្គ្រាមព្រោះមានសញ្ញាស្ទង់ៗថាបើការចរចាគ្នាបរាជ័យ លោកត្រាំអាចនឹងបញ្ជាឱ្យវាយប្រហារ។
អាមេរិក និងអ៊ីរ៉ង់ទើបតែបិទបញ្ចប់ការចរចាគ្នាដោយប្រយោល (មានអន្តរការីជាអ្នកសម្របសម្រួល)។ រដ្ឋមន្ត្រីការបរទេសអ៊ីរ៉ង់ចាត់ទុកថាទោះបីមិនទាន់បានទទួលលទ្ធផលជាដុំកំភួន ប៉ុន្តែនេះជាការចាប់ផ្ដើមដ៏ល្អមួយ។ ទោះជាយ៉ាងណាក្ដី អតីតអ្នកការទូតអាមេរិក លោកចនបូលតុន (John Bolton) ដែលធ្លាប់ធ្វើជាទីប្រឹក្សាសន្តិសុខជាតិអាមេរិកតាំងពីជំនាន់លោកដូណាល់ត្រាំកាន់តំណែងអាណត្តិទីមួយ មិនគិតដូច្នេះទេ។
លោកបូលតុនយល់ថានេះជាសញ្ញាបង្ហាញថារដ្ឋាភិបាលទីក្រុងតេអេរ៉ង់គ្មានចិត្តចង់បោះបង់ចោលកម្មវិធីនុយក្លេអ៊ែររបស់ខ្លួននោះទេ។ លោកថាអ៊ីរ៉ង់មិននិយាយហ្មត់ចត់ទេនៅក្នុងរឿងនេះ ហើយក៏មិនផ្លាស់ប្ដូរឥរិយាបថរបស់ខ្លួនឡើយ។ លោកថាអ៊ីរ៉ង់កំពុងប្រើវិធីពន្យារពេលដើម្បីលួចផលិតអាវុធនុយក្លេអ៊ែរស្ងាត់ៗ។ លោកបូលតុនថារបបដឹកនាំនៅអ៊ីរ៉ង់នៅតែបង្កការគំរាមកំហែងធំបំផុតចំពោះសន្តិភាព និងសន្តិសុខនៅមជ្ឈិមបូព៌ា។ លោកបូលតុនយល់ថាបើដូច្នេះទេមានតែដំណោះស្រាយមួយគត់គឺផ្លាស់ប្ដូររបបដឹកនាំនៅអ៊ីរ៉ង់។
ការថ្លែងរបស់អតីតទីប្រឹក្សាសន្តិសុខជាតិរូបនេះធ្វើឡើងចំពេលដែលអាមេរិកកំពុងកសាងកម្លាំងយោធាកាន់តែច្រើនឡើងៗនៅតំបន់មជ្ឈិមបូព៌ា។ កាលពីមុននេះ ប្រមុខការទូតអ៊ីរ៉ង់ថ្លែងថាដំណើរការចរចានុយក្លេអ៊ែរជាមួយអាមេរិកក្រោមការសម្របសម្រួលរបស់ប្រទេសអូម៉ង់ (Oman) នោះចាប់ផ្ដើមឡើងពីចំណុចល្អ។ លោកអះអាងថាភាគីទាំង២យល់ព្រមជួបគ្នានៅពេលក្រោយទៀត។
រដ្ឋមន្ត្រីការបរទេសអ៊ីរ៉ង់ដែលបានជួបប្រេសិតពិសេសរបស់អាមេរិក លោកស្ទីវវីតខូស និងកូនប្រសាលោកត្រាំ ថ្លែងថាដើម្បីឱ្យការសន្ទនាគ្នាប្រព្រឹត្តទៅដោយរលូនលុះត្រាតែអាមេរិកមិនប្រើប្រាស់វិធីគំរាមកំហែង និងដាក់សម្ពាធ។ លោកថ្លែងបន្ថែមទៀតថាអ៊ីរ៉ង់ចង់ចរចាគ្នាតែអំពីបញ្ហានុយក្លេអ៊ែរប៉ុណ្ណោះ។ យើងមិនចង់ជជែកគ្នាអំពីបញ្ហាអ្វីផ្សេងនោះទេ។
ឥឡូវនេះ គេសង្កេតឃើញថាបញ្ហារាងរញ៉េរញ៉ៃបន្តិចដោយសារអាមេរិកនៅសុខៗចង់ដាក់បញ្ចូលបញ្ហាដទៃទៀតចូលក្នុងកញ្ចប់នៃការចរចាគ្នា។ ក្នុងនោះមានកម្មវិធីមីស៊ីលផ្លោងរបស់អ៊ីរ៉ង់, ការគាំទ្ររបស់អ៊ីរ៉ង់ចំពោះចលនាប្រដាប់អាវុធនៅមជ្ឈិមបូព៌ា និងបញ្ហាសិទ្ធិមនុស្សនៅអ៊ីរ៉ង់។ នេះបើយោងតាមការបញ្ជាក់របស់រដ្ឋមន្ត្រីការបរទេសអាមេរិក លោករូប៊ីអូ (Rubio)។ អ្នកការទូតម្នាក់លួចបង្ហើបប្រាប់អ្នកសារព័ត៌មានថានៅក្នុងពេលចរចាគ្នានោះ អ៊ីរ៉ង់នៅតែទាមទារយ៉ាងទទូចថាខ្លួនត្រូវតែមានសិទ្ធិចម្រាញ់សារធាតុអ៊ុយរ៉ាញ៉ូម។ អ្នកការទូតរូបនេះថ្លែងបន្ថែមទៀតថាកម្មវិធីមីស៊ីលផ្លោងរបស់អ៊ីរ៉ង់មិនត្រូវបានគេយកទៅនិយាយនៅក្នុងការចរចាគ្នានោះទេ៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ