រាជធានីភ្នំពេញ ៖ ប្ដីប្រពន្ធជនជាតិវៀតណាម ១គូ បានជិះម៉ូតូ១គ្រឿង ឌុបគ្នា ស្រាប់តែមានម៉ូតូ ១គ្រឿងទៀត បើកបរដោយយុវជនអ្នកដឹកជញ្ជូនអីវ៉ាន់ម្នាក់ បត់ឆ្លងផ្លូវបំពានភ្លើងស្តុប…
រាជធានីភ្នំពេញ ៖ ប្ដីប្រពន្ធជនជាតិវៀតណាម ១គូ បានជិះម៉ូតូ១គ្រឿង ឌុបគ្នា ស្រាប់តែមានម៉ូតូ ១គ្រឿងទៀត បើកបរដោយយុវជនអ្នកដឹកជញ្ជូនអីវ៉ាន់ម្នាក់ បត់ឆ្លងផ្លូវបំពានភ្លើងស្តុប ទៅដល់បុកបណ្ដាលឲ្យដួលខ្ទាតស្ត្រីជាប្រពន្ធចូលរថយន្តស្ទូច ១គ្រឿង ដែលកំពុងបើកស្របគ្នា ហើយក៏ត្រូវរថយន្តនោះកិនស្លាប់ភ្លាមៗ។ ចំណែកបុរសជាប្ដី បានរងរបួសស្រាល បន្ទាប់មកអ្នកបើកបររថយន្តខាងលើ បានរត់គេចខ្លួនបាត់ស្រមោល ចោលរថយន្ត ហើយយុវជន ដែលជាអ្នកបើកបរម៉ូតូដឹកជញ្ជូនបង្កហេតុនោះ ក៏ត្រូវបាននគរបាលឃាត់ខ្លួនបានរួចនាំទៅសាកសួរ និងចាត់ការតាមច្បាប់ ។
ឧប្បត្តិហេតុនោះបានកើតឡើងកាលពីវេលាម៉ោង៣រសៀល ថ្ងៃទី០៧ ខែកុម្ភៈ ឆ្នាំ២០២៦ នៅតាមផ្លូវ២០០៤ ត្រង់ចំណុចភ្លើងស្តុបវត្តអង្គតាមិញ ស្ថិតនៅភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ស្ត្រីដែលស្លាប់ឈ្មោះ វិន ធីហ្វាង អាយុ៥៧ឆ្នាំ ជនជាតិវៀតណាម និងប្ដីឈ្មោះ ចាន់ សាម៉ុន អាយុ៦១ឆ្នាំ ជនជាតិវៀតណាម មុខរបរជាងសំណង់ រងរបួសស្រាល។ អ្នកទាំង២ស្នាក់នៅផ្ទះលេខ១៥ ភូមិដើមមក្លឿ សង្កាត់ច្បាអំពៅទី១ ខណ្ឌច្បារអំពៅ រាជធានីភ្នំពេញ ពួកគាត់ជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ1FP 8154 ។
ដោយឡែកភាគីម្ខាងទៀត ឈ្មោះ អាន ផានិត ភេទប្រុស អាយុ២២ ឆ្នាំមុខរបរ ដឹកជញ្ជូនអីវ៉ាន់ មានទីលំនៅបច្ចុប្បន្ន ភូមិប្រាសាទ ឃុំប្រាសាទ ស្រុកសន្ទុក ខេត្តកំពង់ធំ។ យុវជនរូបនេះ ជិះម៉ូតូ១គ្រឿង ម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ ភ្នំពេញ 1JS- 1470 ។
រីឯ រថយន្ត ដែលបើកកិនស្ត្រីរងគ្រោះខាងលើ ជាប្រភេទរថយន្តស្ទូច ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3D -9496 បើកបរដោយបុរសពុំស្គាល់អត្តសញ្ញាណម្នាក់ និងបានរត់គេចខ្លួនបាត់ស្រមោលចោលរថយន្ត ។
សមត្ថកិច្ច បាននិយសយថា នៅមុនពេលកើតហេតុជនរងគ្រោះទាំង២នាក់ ប្ដីប្រពន្ធខាងលើ បានជិះម៉ូតូឌុបគ្នាធ្វើដំណើរតាមផ្លូវ២០០៤ ក្នុងទិសដៅពីលិចទៅកើតស្របគ្នាជាមួយរថយន្តស្ទូច ១គ្រឿងខាងលើ។ លុះពេលទៅដល់ត្រង់ចំណុចកើតហេតុ ភ្លើងស្តុបបានលោតពណ៌ក្រហម អ្នកទាំង២ ក៏បានឈប់រង់ចាំភ្លើងស្តុបក្រហម នៅខាងមុខរថយន្តស្ទូចនោះ ហើយមួយសន្ទុះក្រោយមក ភ្លើងស្តុបបានលោតពណ៌ប៉ៃតង ជនរងគ្រោះ ក៏បានជិះម៉ូតូចេញបន្តដំណើរទៅមុខទៀត ។
សមត្ថកិច្ចដដែល បានប្រាប់ឲ្យដឹងបន្តទៀតថា ខណៈនោះ ស្រាប់តែយុវជនអ្នកដឹកជញ្ជូនម្នាក់ បានជិះម៉ូតូម៉ាកស៊ុយហ្ស៊ុយគីនិច ធ្វើដំណើរតាមផ្លូវ២០០៤ ក្នុងទិសដៅពីកើតទៅលិច ទៅដល់អត់បន្ថយល្បឿន ឬឈប់សិនទេ ក៏បានបត់ឆ្វេងឆ្លងផ្លូវទាំងបំពានភ្លើងស្តុប ក៏ជ្រុលទៅបុកម៉ូតូជនរងគ្រោះបណ្តាលឲ្យដួល។ ពេលនោះខ្ទាតស្ត្រីជាប្រពន្ធទៅលើផ្លូវ ហើយក៏ត្រូវរថយន្តស្ទូច ១គ្រឿង ខាងលើទៅពីក្រោយកិន បណ្ដាលឲ្យស្លាប់បាត់បង់ជីវិតភ្លាមៗនៅនឹងកន្លែងតែម្តង ចំណែកប្ដីរងរបួសស្រាល បន្ទាប់មកអ្នកបើកបររថយន្តបានរត់គេចខ្លួនបាត់ចោលរថយន្ត ។
សមត្ថកិច្ច បានបញ្ជាក់ប្រាប់បន្ថែមផងដែរថា ក្រោយពេលកើតហេតុ យុវជនដែលជាអ្នកបើកបរម៉ូតូម៉ាកស៊ុយហ្ស៊ុយគីនិច ដឹកជញ្ជូនអីវ៉ាន់រូបនោះ ក៏ត្រូវបាននគរបាលឃាត់ខ្លួនបាន។ បន្ទាប់មកនគរបាលបានបញ្ជូនយុវជននោះ ព្រមទាំងម៉ូតូទាំង២គ្រឿង និងរថយន្តទៅកាន់ការិយាល័យនគរបាលចរាចរណ៍ផ្លូវគោក នៃស្នងការរាជធានីភ្នំពេញ ដើម្បីចាត់ការតាមច្បាប់ ព្រមទាំងប្រគល់សពឲ្យក្រុមគ្រួសារនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ