ទីក្រុងឥស្លាមម៉ាបាត៖ ពាក់ព័ន្ធនឹងសំណុំរឿងផ្ទុះគ្រាប់បែកអត្តឃាតនៅប្រទេសប៉ាគីស្ថានបណ្ដាលឱ្យស្លាប់មនុស្សរាប់សិបនាក់ និងរបួសជាង១០០នាក់នោះ ក្រុមរដ្ឋឥស្លាមអាយស៊ីសប្រកាសថានេះជាស្នាដៃរបស់ខ្លួន។ នេះជាការវាយប្រហារបែបភេរវកម្មដ៏ធំមិនធ្លាប់មាននៅក្នុងរដ្ឋធានីរបស់ប៉ាគីស្ថានចាប់តាំងពីក្រោយការវាយប្រហារទៅលើសណ្ឋាគារម៉ារីយ៉ូត (Marriott hotel) កាលពីឆ្នាំ២០០៨។
មន្ត្រីរដ្ឋបាលក្រុងឥស្លាមម៉ាបាតបញ្ជាក់ថាមនុស្ស៣១នាក់បានស្លាប់នៅក្នុងហេតុការណ៍ផ្ទុះគ្រាប់បែកនៅវិហារឥស្លាមនិកាយស៊ីអាយ (Shiite) នៃតំបន់ជាយក្រុង។ គេគិតថាចំនួនអ្នកស្លាប់នឹងកើនឡើងបន្ថែមទៀតព្រោះនៅក្នុងចំណោមជនរងគ្រោះដែលត្រូវរបួសទាំងនោះ អ្នកខ្លះរបួសធ្ងន់ធ្ងរ។ សូមរំលឹកថាហេតុការណ៍ផ្ទុះគ្រាប់បែកនោះកើតឡើងកាលពីល្ងាចម្សិលមិញនៅពេលសាសនិកឥស្លាមកំពុងសូត្រធម៌។
ក្រុមអាយស៊ីសប្រកាសថាជនប្រដាប់អាវុធរបស់ខ្លួនម្នាក់ (នៅក្នុងចំណោមជាច្រើននាក់ទៀត) តម្រង់គោលដៅទៅរកកន្លែងប្រមូលផ្ដុំគ្នាច្រើន រួចក៏ចុចបំផ្ទុះគ្រាប់បែកដែលបង្កប់នៅក្នុងអាវរបស់គាត់បណ្ដាលឱ្យស្លាប់ និងរបួសមួយចំនួនធំ។ នាយករដ្ឋមន្ត្រីប៉ាគីស្ថានប្ដេជ្ញាថានឹងតាមចាប់អ្នកនៅពីក្រោយរឿងនេះយកទៅផ្ដន្ទាទោសឱ្យខាងតែបាន។
ក្រោយហេតុការណ៍នេះ ប្រទេសមួយចំនួនបញ្ចេញប្រតិកម្មជាបន្តបន្ទាប់។ ប្រធានាធិបតីរុស្ស៊ី លោកពូទីន បានផ្ញើសាររំលែកទុក្ខជូនប្រធានាធិបតីប៉ាគីស្ថាន។ លោកចាត់ទុកថានេះជា «ទង្វើអនារិយធម៌»។ លោកថ្លែងថាប្រទេសរុស្ស៊ីត្រៀមខ្លួនដើម្បីពង្រីកកិច្ចសហការជាមួយប៉ាគីស្ថានក្នុងការប្រយុទ្ធប្រឆាំងនឹងអំពើភេរវកម្ម។ អគ្គលេខាធិការអង្គការសហប្រជាជាតិក៏ប្រកាសថ្កោលទោសការវាយប្រហារនេះផងដែរ។
លោកហ្គូតេរ៉េសចាត់ទុកថាការវាយប្រហារទៅលើជនស៊ីវិល និងទៅលើកន្លែងសក្ការៈសាសនាដូច្នេះជាករណីដែលលោកមិនអាចទទួលយកបានជាដាច់ខាត។ លោកសូមចូលរួមរំលែកមរណទុក្ខដ៏ក្រៀមក្រំបំផុតជាមួយក្រុមគ្រួសារសព។ លោកក៏សូមជូនពរឱ្យអ្នកដែលកំពុងត្រូវរបួសឆាប់ជាសះស្បើយឡើងវិញផងដែរ។ ក្រៅពីនេះ ថ្នាក់ដឹកនាំប្រទេសដទៃទៀតដូចជាកាណាដា អាល្លឺម៉ង់ អ៊ីតាលី បារាំង អេស្ប៉ាញ ចិន។ល។ បានផ្ញើលិខិតរំលែកទុក្ខ។
ប្រទេសឥណ្ឌាសូមចេញមុខបដិសេធជាដាច់ខាតថាខ្លួនគ្មានជាប់ពាក់ព័ន្ធនឹងការវាយប្រហារដោយគ្រាប់បែកអត្តឃាតនោះទេ។ ក្រសួងការបរទេសឥណ្ឌាចេញសេចក្ដីប្រកាសថានេះជាករណីដែលត្រូវតែថ្កោលទោសជាដាច់ខាត។ ឥណ្ឌាសូមចូលរួមសោកស្ដាយ និងចូលរួមរំលែកទុក្ខចំពោះរឿងនេះ៕ ប្រភព៖ សារព័ត៌មានឡឺម៉ុង (Le Monde) និងប្រភពដទៃទៀត
ចែករំលែកព័តមាននេះ