ខេត្តបាត់ដំបង ៖ អគ្គិភ័យដ៏មហន្តរាយ ដែលគេមិនទាន់ដឹងពីមូលហេតុជាក់លាក់ បានឆេះរាលដាលចូលដល់ទីតាំងស្ដុកទុយោរំដោះទឹកស្អុយរបស់ក្រុមហ៊ុនមួយ ធ្វើឲ្យខូចខាតអស់ទាំងស្រុង កាលពីវេលាម៉ោង៥ល្ងាចថ្ងៃទី០៦ កុម្ភៈ នៅក្នុងភូមិចំំការសំរោង១ សង្កាត់ចំការសំរោង…
ខេត្តបាត់ដំបង ៖ អគ្គិភ័យដ៏មហន្តរាយ ដែលគេមិនទាន់ដឹងពីមូលហេតុជាក់លាក់ បានឆេះរាលដាលចូលដល់ទីតាំងស្ដុកទុយោរំដោះទឹកស្អុយរបស់ក្រុមហ៊ុនមួយ ធ្វើឲ្យខូចខាតអស់ទាំងស្រុង កាលពីវេលាម៉ោង៥ល្ងាចថ្ងៃទី០៦ កុម្ភៈ នៅក្នុងភូមិចំំការសំរោង១ សង្កាត់ចំការសំរោង ក្រុងបាត់ដំបង ដែលខាតបង់គិតជាទឹកប្រាក់ប្រមាណ០២លានដុល្លារអាមេរិក។ នេះបើយោងតាមរបាយការណ៍បឋមរបស់សមត្ថកិច្ច ។
របាយការណ៍បឋបមដដែលបានឲ្យដឹងថា ទីតាំងស្ដុកទុយោរាប់ម៉ឺនដើមនោះ ជារបស់ក្រុមហ៊ុន
«គិរីដងរែក» ដែលទទួលម៉ៅការរៀបប្រព័ន្ធរំដោះទឹកស្អុយនៅក្នុងក្រុងបាត់ដំបង ។ ទុយោរាប់ម៉ឺនដើមបានដឹកទៅស្ដុកទុកនៅលើដីទួលកណ្ដាលវាល នៅខាងជើងភូមិ ដែលឃ្លាតឆ្ងាយពីផ្ទះសម្បែងរបស់ប្រជាពលរដ្ឋ ត្រឹមប៉ុន្មានរយម៉ែត្រប៉ុណ្ណោះ។ សមត្ថកិច្ចដែលបានចុះជួយអន្តរាគមន៍ បាននិយាយថា អគ្គិភ័យនោះទំនងផ្ដើមចេញពីផ្នែកខាងក្រៅរបងនៃទីតាំងស្ដុកទុយោ។
យោងតាមសាក្សីឃើញដំបូង អគ្គិភ័យនោះបានឆេះផ្នែកខាងក្រៅរបង រួចរាលដល់រ៉បតាមរបងស័ង្កសីឆ្លងចូលដល់ទីតាំងស្ដុកទុយោដែលគេដាក់ត្រួតលើគ្នាដូចកូនភ្នំ។ ដំបូងញគេឃើញរថយន្តដឹកទឹកស៊ីវិលបានចូលបាញ់ទឹកពន្លត់ភ្លើងដ៏សន្ធោសន្ធៅនោះ មុនពេលរថយន្តពន្លត់អគ្គិភ័យរបស់សមត្ថកិច្ចទៅដល់ ប៉ុន្តែមិនអាចធ្វើឲ្យអណ្ដាតភ្លើងថមថយបន្តិចឡើយ។
ផ្ទុយទៅវិញ អគ្គិភ័យឆេះរាលដាលកាន់តែខ្លាំង ហើយកាន់រាលដាលពេញទំហឹងឆ្ពោះទៅកាន់កន្លែងគំនរទុយោគរដូចកូនភ្នំ រហូតមន្ត្រីជំនាញគ្រប់គ្រងលែងបាន ធ្វើឲ្យអគ្គិភ័យនេះលេបត្របាក់យកគំនរទុយោរាប់ម៉ឺនដើមតាមទំនើងចិត្ត បើទោះជាភ្លាមៗរថយន្តពន្លត់អគ្គិភ័យរបស់សមត្ថកិច្ចជាច្រើនគ្រឿង បានចូលទៅបាញ់ទឹកសង្គ្រប់លើព្រះអគ្គីដ៏សន្ធោសន្ធៅនោះក្ដី។
ពាក់ព័ន្ធនឹងគ្រោះអគ្គិភ័យដ៏មហន្តរាយនេះ ស្នងការរងទទួលផែនអគ្គិភ័យ លោក លឹម ពុទ្ធីឡា ក៏មិនទាន់បង្ហាញនូវរបាយការណ៍ជាក់លាក់អំពីគ្រោះអគ្គិភ័យនេះដែរ ដោយលោកគ្រាន់តែនិយាយពីមហន្តរាយបឋមដែលបានកើតឡើងជាក់ស្តែងប៉ុណ្ណោះ ។ លោកស្នងការរងបានប្រាប់ថា មន្ត្រីជំនាញមិនទាន់អាចសន្និដ្ឋានបានអំពីដើមចមដែលនាំឲ្យមានអគ្គិភ័យនេះកើតឡើងនៅឡើយទេ ប៉ុន្តែបើតាមការស្រាវជ្រាវ និងស៊ើបបឋមនៅចំណុចកើតហេតុ អគ្គិភ័យដ៏មហន្តរាយនេះទំនងអាចផ្ដើមចេញពីខាងក្រៅរបង តែយើងមិនអាចសន្មត់ថា ជនណាម្នាក់ជាអ្នកបង្កឡើងទេ។
លោក លឹម ពុទ្ធីឡា បានបញ្ជាក់ដែរថា អគ្គិភ័យមានសន្ទុះខ្លាំងក្លាដោយឆេះគំនរទុយោជ័ររាប់ម៉ឺនដើម ទើបមិនអាចគ្រប់គ្រងបាន បើទោះជាលោកស្នងការខេត្ត បានបញ្ជាឲ្យបញ្ជូនរថយន្តពន្លត់អគ្គិភ័យបន្ថែមពីតាមបណ្ដាស្រុកក្បែរៗនោះ មកជួយអន្តរាគមន៍ក្ដី ក៏នៅតែមិនអាចទប់ស្កាត់ ឬធ្វើឲ្យអគ្គិភ័យដ៏សាហាវនេះថមថយដែរ ។ បើតាមរបាយការណ៍បឋមរបស់សមត្ថកិច្ច គំនរទុយោរាប់ម៉ឺនដើម ត្រូវព្រះអគ្គីចំណាយពេលជាច្រើនម៉ោងប្រឹងលេបយកអស់ទាំងស្រុង។ បើនិយាយពីការខាតបង់គិតជាទឹកប្រាក់អស់ប្រមាណ០២លានដុល្លាអាមេរិក។
យ៉ាងណា បើតាមលោក លឹម ពុទ្ធីឡា ស្នងការរងដែលបានដឹកនាំការិយាល័យជំនាញ ចុះទៅជួយអន្តរាគមន៍ផ្ទាល់ បានបំភ្លឺដែរថា ចំនួនទឹកប្រាក់ខាតបង់នេះ គ្រាន់តែជាការវាយតំលៃស្មានៗតែប៉ុណ្ណោះ តុល្យការខូចខាតជាក់លាក់ ទាល់តែយើងជួបជាមួយម្ចាស់ក្រុមហ៊ុនផ្ទាល់សិន។ ព្រោះពេលនេះយើងកំពុងរង់ចាំជួបខាងក្រុមហ៊ុនដើម្បីសួរនាំ ប៉ុន្តែយ៉ាងណាក្ដី លោក លឹម ពុទ្ធីឡា បានបញ្ជាក់ថា ពេលនេះ មន្ត្រីជំនាញបាននិងកំពុងធ្វើការស្រាវជ្រាវរកមូលហេតុ ដែលនាំឲ្យមានគ្រោះមហន្តរាយនេះហើយ។
បើតាមការពិនិត្យជាក់ស្ដែង ទុយោដែលមានតំលៃថ្លៃរាប់ម៉ឺនដើម រួមទាំងសម្ភារនានា ដែលនៅលើទីតាំងស្ដុកទុយោខាងលើនេះ បានក្លាយជាផេះទាំងអស់ តែពុំមានគ្រោះថ្នាក់ដល់មនុស្សទេ ៕
ចែករំលែកព័តមាននេះ