សហរដ្ឋអាមេរិក ៖ ស្ថានទូតនិម្មិតនៅលើប្រព័ន្ធអ៊ីនធឺណិតរបស់សហរដ្ឋអាមេរិក ដែលទទួលបន្ទុកលើកិច្ចការប្រទេសអ៊ីរ៉ង់ បានចេញសេចក្តីជូនដំណឹងសន្តិសុខ កាលពីព្រឹកថ្ងៃទី៦ ខែកុម្ភៈ ឆ្នាំ២០២៦ ដោយជំរុញឱ្យពលរដ្ឋអាមេរិកចាកចេញពីប្រទេសអ៊ីរ៉ង់ជាបន្ទាន់ និងរៀបចំផែនការចាកចេញដែលមិនពឹងផ្អែកលើជំនួយរបស់រដ្ឋាភិបាល។…
សហរដ្ឋអាមេរិក ៖ ស្ថានទូតនិម្មិតនៅលើប្រព័ន្ធអ៊ីនធឺណិតរបស់សហរដ្ឋអាមេរិក ដែលទទួលបន្ទុកលើកិច្ចការប្រទេសអ៊ីរ៉ង់ បានចេញសេចក្តីជូនដំណឹងសន្តិសុខ កាលពីព្រឹកថ្ងៃទី៦ ខែកុម្ភៈ ឆ្នាំ២០២៦ ដោយជំរុញឱ្យពលរដ្ឋអាមេរិកចាកចេញពីប្រទេសអ៊ីរ៉ង់ជាបន្ទាន់ និងរៀបចំផែនការចាកចេញដែលមិនពឹងផ្អែកលើជំនួយរបស់រដ្ឋាភិបាល។ សេចក្តីជូនដំណឹងនេះធ្វើឡើងមុនការចរចាដែលបានគ្រោងទុករបស់សហរដ្ឋអាមេរិក និងអ៊ីរ៉ង់ នៅប្រទេសអូម៉ង់នៅថ្ងៃទី៦ ខែកុម្ភៈ ដោយមានការបង្ហាញលទ្ធភាពតិចតួចណាស់ថា ភាគីទាំងពីរបានរកឃើញចំណុចរួមលើរបៀបវារៈនៃកិច្ចប្រជុំមួយនេះ។ នេះបើតាមប្រភពពីសារព័ត៌មាន CNBC របស់អាមេរិកបានចេញផ្សាយ។
យោងតាមមន្ត្រីអាមេរិក និងអ៊ីរ៉ង់ លោក Steve Witkoff បេសកជនពិសេសអាមេរិក និងលោក Jared Kushner កូនប្រសាររបស់ប្រធានាធិបតីអាមេរិក លោក ដូណាល់ ត្រាំ (Donald Trump) គ្រោងនឹងចូលរួមក្នុងកិច្ចប្រជុំជាមួយក្រុមពិសេសដឹកនាំដោយរដ្ឋមន្ត្រីការបរទេសអ៊ីរ៉ង់ លោក Abbas Araghchi។
នេះមិនមែនជាការចេញសេចក្តីជូនជាលើកទី១នោះទេ ដ្បិតសហរដ្ឋអាមេរិកបានចេញសេចក្តីជូនដំណឹងសន្តិសុខស្រដៀងគ្នានេះជាច្រើនក្នុងរយៈពេល១ខែកន្លងមកនេះ។ តួយ៉ាង ស្ថានទូតបានជំរុញឱ្យពលរដ្ឋអាមេរិកចាកចេញពីប្រទេសអ៊ីរ៉ង់ នៅក្នុងការព្រមានមួយ កាលពីថ្ងៃទី១៤ ខែមករា ខណៈពេលដែលលោក ត្រាំ កំពុងតែថ្លឹងថ្លែងជម្រើសសម្រាប់អន្តរាគមន៍ដែលអាចកើតមាននៅក្នុងប្រទេសអ៊ីរ៉ង់ រួមទាំងការប្រើប្រាស់កម្លាំងយោធាផងដែរ។
ការចរចានៅថ្ងៃសុក្រនេះ នឹងក្លាយជាកិច្ចប្រជុំផ្លូវការជាលើកដំបូងរវាងអ៊ីរ៉ង់ និងសហរដ្ឋអាមេរិក ចាប់តាំងពីភាពតានតឹងបានផ្ទុះឡើងក្នុងខែមិថុនា ឆ្នាំ ២០២៥ នៅពេលដែលសង្គ្រាមរយៈពេល ១២ ថ្ងៃជាមួយអ៊ីស្រាអែលបាននាំឱ្យមានការវាយប្រហារតាមអាកាសពីសហរដ្ឋអាមេរិក ដែលបានបំផ្លាញយ៉ាងធ្ងន់ធ្ងរដល់រោងចក្រនុយក្លេអ៊ែរសំខាន់ៗចំនួន ៣ របស់អ៊ីរ៉ង់។
សូមជម្រាបថា រដ្ឋាភិបាលសហរដ្ឋអាមេរិកត្រូវបានគេរាយការណ៍ថាបានទាមទារឱ្យអ៊ីរ៉ង់ បោះបង់ចោលឃ្លាំងស្តុកអ៊ុយរ៉ាញ៉ូមចម្រាញ់របស់ខ្លួន ដាក់កម្រិតលើកម្មវិធីមីស៊ីលបាលីស្ទីករបស់អ៊ីរ៉ង់ និងបញ្ឈប់ការផ្តល់អាវុធ និងមូលនិធិដល់ក្រុមសកម្មប្រយុទ្ធនៅក្នុងតំបន់មជ្ឈិមបូព៌ា។ លោក ត្រាំ បានគំរាមវាយប្រហារយោធាប្រឆាំងនឹងអ៊ីរ៉ង់ ប្រសិនបើប្រទេសនេះ មិនយល់ព្រមតាមការទាមទាររបស់សហរដ្ឋអាមេរិក។
ទោះយ៉ាងណា អ៊ីរ៉ង់បានរុញច្រានវិញ ដោយបានលើកឡើងថា ការទាមទាររបស់សហរដ្ឋអាមេរិក គឺជាការរំលោភបំពានដែលមិនអាចទទួលយកបានលើអធិបតេយ្យភាពរបស់ខ្លួន ហើយបានគំរាមកំហែងឆ្លើយតបយ៉ាងខ្លាំងក្លាចំពោះការវាយប្រហារណាមួយដោយការវាយប្រហារគោលដៅយោធារបស់អាមេរិកនៅក្នុងតំបន់ និងនៅអ៊ីស្រាអែល៕
ចែករំលែកព័តមាននេះ