អន្តរជាតិ ៖ មេដឹកនាំអូស្ត្រាលី និងឥណ្ឌូណេស៊ី បានចុះហត្ថលេខាលើកិច្ចព្រមព្រៀងសន្តិសុខមួយ នៅថ្ងៃទី៦ ខែកុម្ភៈ ឆ្នាំ២០២៦ ជាកិច្ចព្រមព្រៀងមួយនៅក្នុងចំណោមកិច្ចព្រមព្រៀងជាបន្តបន្ទាប់ ដែលទីក្រុងកង់បេរ៉ាបានធានាជាមួយប្រទេសជិតខាង…
អន្តរជាតិ ៖ មេដឹកនាំអូស្ត្រាលី និងឥណ្ឌូណេស៊ី បានចុះហត្ថលេខាលើកិច្ចព្រមព្រៀងសន្តិសុខមួយ នៅថ្ងៃទី៦ ខែកុម្ភៈ ឆ្នាំ២០២៦ ជាកិច្ចព្រមព្រៀងមួយនៅក្នុងចំណោមកិច្ចព្រមព្រៀងជាបន្តបន្ទាប់ ដែលទីក្រុងកង់បេរ៉ាបានធានាជាមួយប្រទេសជិតខាង ដើម្បីពង្រឹងទំនាក់ទំនង និងកំណត់ឥទ្ធិពលរបស់ចិនក្នុងតំបន់។ នេះបើតាមព័ត៌មានសិង្ហបុរី The Straits Times ចេញផ្សាយដោយស្រង់ប្រភពពីសារព័ត៌មាន Bloomberg ។
នៅក្នុងពិធីចុះហត្ថលេខា ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ៀនតូ (Prabowo Subianto) បានជួបជាមួយនាយករដ្ឋមន្ត្រីអូស្ត្រាលី លោក អាន់តូនី អាល់បានីស (Anthony Albanese) ដែលបានថ្លែងមុនដំណើរទស្សនកិច្ចរបស់លោកទៅកាន់ទីក្រុងហ្សាកាតាថា កិច្ចព្រមព្រៀងនេះ គឺជាពេលវេលាដ៏សំខាន់ក្នុងទំនាក់ទំនង វាតំណាងឱ្យការពង្រីកដ៏សំខាន់នៃកិច្ចសហប្រតិបត្តិការសន្តិសុខ និងការពារជាតិរបស់យើង និងបង្ហាញថា ទំនាក់ទំនងរបស់យើងគឺរឹងមាំដូចដែលវាធ្លាប់មានកន្លងមក។
សូមជម្រាបថា រដ្ឋាភិបាលកណ្តាលឆ្វេងនិយមរបស់អូស្ត្រាលី បានចុះហត្ថលេខាលើកិច្ចព្រមព្រៀងការពារជាតិ ប៉ូលិស និងជំនួយជាបន្តបន្ទាប់ទូទាំងតំបន់ប៉ាស៊ីហ្វិក ចាប់តាំងពីឡើងកាន់តំណែងក្នុងឆ្នាំ ២០២២ ដោយព្យាយាមបង្កើនឥទ្ធិពលរបស់ខ្លួន និងកំណត់ឥទ្ធិពលរបស់ចិនក្នុងតំបន់។ កិច្ចខិតខំប្រឹងប្រែងនេះ រីកសាយភាយកាន់តែខ្លាំងឡើងក្រោមរដ្ឋបាលរបស់លោកប្រធានាធិបតី ដូណាល់ ត្រាំ (Donald Trump) ខណៈដែលសហរដ្ឋអាមេរិកពឹងផ្អែកលើបណ្តាសម្ព័ន្ធមិត្តរបស់ខ្លួន ដើម្បីទទួលយកបន្ទុកក្នុងការទប់ស្កាត់អំណាចយោធារបស់ចិនដែលកំពុងកើនឡើង។
តួយ៉ាង នៅចុងឆ្នាំ ២០២៥ អូស្ត្រាលីបានបញ្ចប់កិច្ចព្រមព្រៀងសន្តិសុខជាមួយប្រទេសប៉ាពួញូហ្គីណេ (Papua New Guinea) ដែលស្ថិតនៅភាគខាងជើងប្រទេសអូស្ត្រាលី និងភាគខាងកើតប្រទេសឥណ្ឌូណេស៊ី ហើយលោក អាល់បានីស បានបន្តទស្សនកិច្ចទៅកាន់ប្រទេសទីម័រខាងកើតកាលពីចុងខែមករា ដោយចុះហត្ថលេខាលើកិច្ចព្រមព្រៀងថ្មីមួយ ដើម្បីផ្តល់ជំនួយ និងការគាំទ្រជាច្រើនផ្សេងទៀត។
ក្រឡេកមកទំនាក់ទំនងរវាងឥណ្ឌូណេស៊ី និងអូស្ត្រាលីវិញ បានផ្លាស់ប្តូរពីភាពតានតឹងកម្រិតខ្ពស់ អំឡុងសង្គ្រាមត្រជាក់ និងបន្ទាប់ពីការដួលរលំនៃរបបដឹកនាំរបស់លោក ស៊ូហាតូ (Suharto) ប្រែទៅជាទំនាក់ទំនងដ៏កក់ក្តៅជាងមុនក្នុងប៉ុន្មានឆ្នាំថ្មីៗនេះ។ ស្របពេលឥណ្ឌូណេស៊ីបានស្វែងរកជាយូរមកហើយដើម្បីឱ្យមានតុល្យភាពគោលនយោបាយការបរទេសរបស់ខ្លួន ដោយរក្សាទំនាក់ទំនងស្និទ្ធស្នាលជាមួយប្រទេសលោកខាងលិច ក៏ដូចជាប្រទេសកំពុងអភិវឌ្ឍន៍ដទៃទៀត៕
ចែករំលែកព័តមាននេះ