ទីក្រុងហ្សាការតា ៖ ប្រទេសឥណ្ឌូណេស៊ី ដែលជាប្រទេសមានសេដ្ឋកិច្ចធំជាងគេនៅអាស៊ីអាគ្នេយ៍ បានស្វាគមន៍ភ្ញៀវទេសចរបរទេសចំនួន ១៥,៣៩ លាននាក់ កាលពីឆ្នាំ ២០២៥ ដែលលើសពីគោលដៅរបស់ខ្លួនត្រឹមចំនួន…
ទីក្រុងហ្សាការតា ៖ ប្រទេសឥណ្ឌូណេស៊ី ដែលជាប្រទេសមានសេដ្ឋកិច្ចធំជាងគេនៅអាស៊ីអាគ្នេយ៍ បានស្វាគមន៍ភ្ញៀវទេសចរបរទេសចំនួន ១៥,៣៩ លាននាក់ កាលពីឆ្នាំ ២០២៥ ដែលលើសពីគោលដៅរបស់ខ្លួនត្រឹមចំនួន ១៤ ទៅ ១៥ លាននាក់។
រដ្ឋមន្ត្រីក្រសួងទេសចរណ៍ លោកស្រី Widiyanti Putri Wardhana បានថ្លែងនៅក្នុងកិច្ចប្រជុំមួយ នៅក្នុងទីក្រុងហ្សាការតា កាលពីថ្ងៃទី៤ ខែកុម្ភៈ ឆ្នាំ២០២៦ និងស្រង់មកចេញផ្សាយដោយទីភ្នាក់ងារសារព័ត៌មានឥណ្ឌូណេស៊ី អង់តារា (Antara) ដូច្នេះថា «យើងបានដើរលើសពីគោលដៅរបស់យើង ហើយបានអនុវត្តបានល្អជាងការព្យាករណ៍ពីមុនរបស់យើង»។
តួលេខរបស់រដ្ឋាភិបាលឥណ្ឌូណេស៊ីបង្ហាញថា ការចំណាយជាមធ្យមក្នុងភ្ញៀវទេសចរបរទេសម្នាក់បានឈានដល់ ១ ២៦៧ ដុល្លារអាមេរិក នៅឆ្នាំ ២០២៥ ដែលលើសពីគោលដៅចំនួន ១ ២២០ ដុល្លារ។ ប្រទេសម៉ាឡេស៊ី នៅតែជាអ្នករួមចំណែកដ៏ធំបំផុតចំពោះប្រាក់ចំណូលទេសចរណ៍របស់ប្រទេសឥណ្ឌូណេស៊ី ខណៈដែលប្រទេសអារ៉ាប់រួមបង្ហាញកំណើនលឿនបំផុតនៃចំនួនភ្ញៀវទេសចរមកកាន់ឥណ្ឌូណេស៊ី។
ចំនួនភ្ញៀវទេសចរមកពីប្រទេសចិនបានកើនឡើងយ៉ាងខ្លាំង ដោយឈានដល់ ១.៣៤ លាននាក់នៅឆ្នាំ ២០២៥ ដែលជាកម្រិតខ្ពស់បំផុតក្នុងរយៈពេល ៦ ឆ្នាំចុងក្រោយ។ នេះបើតាមរបាយការណ៍ពីទីភ្នាក់ងារសារព័ត៌មានចិន ស៊ីនហួ (Xinhua) បានចេញផ្សាយ។ ទិន្នន័យបង្ហាញថា ការធ្វើដំណើរពីប្រទេសចិនទៅកាន់ប្រទេសឥណ្ឌូណេស៊ី មិនត្រឹមតែបានស្ទុះងើបឡើងវិញប៉ុណ្ណោះទេ ប៉ុន្តែថែមទាំងបានកើនលើសពីកម្រិតមុនផ្ទុះជំងឺកូវីដ១៩ទៀតផង។
ដោយសម្លឹងទៅមុខឥតងាកក្រោយ ប្រទេសឥណ្ឌូណេស៊ីរំពឹងថានឹងទទួលស្វាគមន៍ភ្ញៀវទេសចរបរទេសរហូតដល់ ១៧ លាននាក់ នៅឆ្នាំនេះ ដែលតំណាងឱ្យការកើនឡើង ១១% ធៀបនឹងឆ្នាំមុន៕ ប្រភព ៖ VnExpress
ចែករំលែកព័តមាននេះ