សង្គ្រាមអ៊ុយក្រែន ៖ បណ្ដាអ្នកទទួលខុសត្រូវរុស្ស៊ី អ៊ុយក្រែននិងអាមេរិក នាថ្ងៃទី៥ កុម្ភៈ បានចរចាគ្នាថ្ងៃទី២ នៅទីក្រុងអាប៊ូដាប៊ី សំដៅបញ្ចប់សង្គ្រាមអ៊ុយក្រែនដែលកើតមាន៤ឆ្នាំមកហើយ ។…
សង្គ្រាមអ៊ុយក្រែន ៖ បណ្ដាអ្នកទទួលខុសត្រូវរុស្ស៊ី អ៊ុយក្រែននិងអាមេរិក នាថ្ងៃទី៥ កុម្ភៈ បានចរចាគ្នាថ្ងៃទី២ នៅទីក្រុងអាប៊ូដាប៊ី សំដៅបញ្ចប់សង្គ្រាមអ៊ុយក្រែនដែលកើតមាន៤ឆ្នាំមកហើយ ។ ការចរចាគ្នាថ្ងៃទី២នោះ ចាប់ផ្ដើមក្រោយការព្រមព្រៀងដោះដូរឈ្លើយសឹកគ្នា៣១៤នាក់ ។
ប្រធានាធិបតីអ៊ុយក្រែន លោកវ៉ូឡូឌីមៀរហ្សេឡេនស្គី អះអាងនាថ្ងៃទី៤ កុម្ភៈ ថា ក្នុងថ្ងៃទី១នៃការចរចាគ្នានៅអារ៉ាប់រួម អ៊ុយក្រែននិងរុស្ស៊ី បានបង្ហើយការងារពីការដោះដូរឈ្លើយសឹកគ្នា ដែលលោកចាត់ទុកថានោះជាលទ្ធផលសំខាន់មួយ ។
លោកSTEVE WITKOFF បេសកជនពិសេស លោកដូណាល់ត្រាំ ក៏អះអាងដែរ នាថ្ងៃទី៥ កុម្ភៈ ពីការដោះដូរឈ្លើយសឹកគ្នា៣១៤នាក់ នាពេលខាងមុខ រវាងក្រុងគៀវនិងក្រុងមូស្គូ ។ លោកថា នោះជាលទ្ធផលដែលទទួលបានពីការចរចាសន្តិភាពដោយលម្អិតនិងស្ថាបនា ។ លោកថា ទោះបីនៅមានការងារច្រើនទៀត ត្រូវធ្វើក៏ដោយ លទ្ធផលនោះបង្ហាញថា ការស្វែងរកដំណោះស្រាយការទូតផ្ដល់លទ្ធផលបណ្ដើរៗ ហើយជួយជម្រុញថែមទៀតការខិតខំប្រឹងប្រែងបញ្ចប់សង្ក្រាមនៅអ៊ុយក្រែន ។ ការពិភាក្សាគ្នានឹងបន្តហើយការឈានមុខថ្មីៗនឹងសម្រេចបានក្នុងបណ្ដាសប្ដាហ៍ខាងមុខ ។
ទោះបីយ៉ាងណា វិមានក្រឹមឡាំងអះអាងរួចហើយនាថ្ងៃទី៤ កុម្ភៈ ថា បើដរាបណារបបក្រុងគៀវ ពុំធ្វើសេចក្ដីសម្រេចសមស្របទេ នោះប្រតិបត្តិការយោធាពិសេសនឹងបន្តទៀត។ នាពេលថ្មីៗនេះ វិមានក្រឹមឡាំងធ្លាប់អះអាងថា លក្ខខណ្ឌសំខាន់បំផុតមួយក្នុងចំណោមលក្ខខណ្ឌទាំងអស់ ដើម្បីបញ្ចប់ជម្លោះគឺកងទ័ពអ៊ុយក្រែន ត្រូវដកចេញទាំងអស់ពីបណ្ដាតំបន់ដែលខ្លួននៅត្រួតត្រានៅដុនបាស់ភាគខាងកើតអ៊ុយក្រែននៅឡើយ ។ រហូតមកទល់ពេលនេះ ក្រុងគៀវនៅតែបដិសេធមិនព្រមបោះបង់ដែនដីទាំងនេះ។
ចំណែករុស្ស៊ី និងអាមេរិកវិញ បានសម្រេចក្នុងឱកាសនៃការចរចា ស្ដីពីសង្គ្រាមនៅអ៊ុយក្រែន នៅក្រុងអាប៊ូដាប៊ី ធ្វើការចរចាគ្នាខាងយោធាកម្រិតខ្ពស់ឡើងវិញ ដែលនោះជាជំហានទៅមុនចម្បងមួយក្នុងទំនាក់ទំនងរវាងប្រទេសទាំង២ ខណៈសន្ធិសញ្ញារំសាយអាវុធនុយក្លេអ៊ែរ ទាក់ទិនមហាអំណាចទាំង២លើកមុនត្រូវផុតកំណត់ ៕
ចែករំលែកព័តមាននេះ