ខេត្តកំពង់ស្ពឺ៖ មុខសញ្ញាចែកចាយគ្រឿងញៀម្នាក់ត្រូវបានកម្លាំងនគរបាលស្រុកគងពិសីធ្វើការឃាត់ខ្លួនបានជាមួយគ្រឿងញៀនចំនួន៧កញ្ចប់ ខណៈដែលជនសង្ស័យកំពុងចរាចរណ៍គ្រឿងញៀនហើយកម្លាំងនគរបាលល្បាតប្រទះឃើញក៏ឃាត់តែម្តង។
ការឃាត់ខ្លួនមុខសញ្ញាខាងលើដោយអនុវត្តតាមការណែនាំដ៏ខ្ពង់ខ្ពស់ ពីលោកស្នងការនគរបាលខេត្ដកំពង់ស្ពឺ និងដឹកនាំដោយលោកអធិការនគរបាលស្រុកគងពិសី កាលពីវេលាម៉ោង១១និង២០នាទីព្រឹកថ្ងៃទី០៥ ខែកុម្ភៈ ឆ្នាំ២០២៦ នៅក្នុងភូមិគគ្រួស ឃុំពេជ្រមុនី ស្រុកគងពិសី ខេត្តកំពង់ស្ពឺ។
នគរបាលស្រុកគងពិសីបាននិយាយឱ្យដឹងថា នៅមុនពេលឃាត់ខ្លួនមុខសញ្ញាចែកចាយគ្រឿងញៀនបានគឺកម្លាំងរបស់អធិការដ្ឋាននគរបាលស្រុកគងពិសី បានធ្វើការល្បាតតាមមូលដ្ឋានងាយរងគ្រោះ លុះល្បាតដល់ចំណុចផ្លូវលំភូមិគគ្រួស ឃុំពេជ្រមុនី ស្រុកគងពិសី ប្រទះឃើញជនសង្ស័យខាងលើក៏បានឃាត់ខ្លួនមុនសញ្ញាសង្ស័យ០១នាក់ ឈ្មោះ ប៊ុន ម៉េន ភេទប្រុស អាយុ ៣៨ឆ្នាំ ស្នាក់នៅបន្ទប់ជួលភូមិគគ្រួស ឃុំពេជ្រមុនី ស្រុកគងពិសី ខេត្តកំពង់ស្ពឺ ត្រួតពិនិត្យដកហូតបានម្សៅក្រាមពណ៌សថ្លាសង្ស័យជាគ្រឿងញៀនចំនួន៧កញ្ចប់ (តូច៦កញ្ចប់ និងមធ្យម០១កញ្ចប់) ទូរស័ព្ទដៃចំនួន០១គ្រឿង និង ឧបករណ៍ប្រើប្រាស់គ្រឿងញៀនមួយចំនួន ។
នគរបាលស្រុកគងពិសីបានបញ្ជាក់ក្រោយឃាត់ខ្លួនជនសង្ស័យរួមជាមួយនឹងវត្ថុតាងគ្រឿងញៀនចំនួន៧កញ្ចប់ សមត្ថកិច្ចនគរបាលជំនាញបានកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ