ចំណេះដឹង៖ យោងតាមការផ្សាយរបស់សារព័ត៌មានបរទេស ការសរសេរប្រវត្តិរូបសង្ខេប (CV) មិនមែនគ្រាន់តែជាការរាយរាប់ពីប្រវត្តិសិក្សានោះទេ ប៉ុន្តែវាគឺជាការ “លក់” សមត្ថភាពរបស់អ្នកទៅកាន់និយោជក។ ដើម្បីឱ្យ CV របស់អ្នកលេចធ្លោជាងបេក្ខជនដទៃ អ្នកត្រូវដឹងពីចំណុចគន្លឹះដែលអ្នកជ្រើសរើសបុគ្គលិក (HR) តែងតែសម្លឹងមើល ដែលរួមមានភាពច្បាស់លាស់ វិជ្ជាជីវៈ និងភាពត្រឹមត្រូវ។

ជំហានដំបូងដែលបង្កើតចំណាប់អារម្មណ៍ដំបូងគឺ “រូបថតផ្លូវការ”។ ចូរជៀសវាងការប្រើរូបថត Selfie ឬរូបថតក្នុងឈុតសិក្សា ប៉ុន្តែត្រូវប្រើរូបថតដែលស្លៀកពាក់សមរម្យតាមបែបវិជ្ជាជីវៈ និងមានទឹកមុខញញឹមស្រស់ថ្លា។ បន្ទាប់មក គឺការរៀបចំ “អត្ថបទឱ្យស្អាត និងសាមញ្ញ”។ CV ដែលល្អមិនមែនជា CV ដែលឆើតឆាយពេកនោះទេ ប៉ុន្តែជា CV ដែលមានប្លង់ស្អាត ងាយស្រួលអាន ប្រើពណ៌ត្រឹមតែ ២ ទៅ ៣ ពណ៌ដែលស៊ីគ្នានឹងស្ដង់ដាក្រុមហ៊ុន និងប្រើពុម្ពអក្សរផ្លូវការ។ អ្នកគួរទុកកន្លែងតែ ១០% ប៉ុណ្ណោះសម្រាប់ព័ត៌មានផ្ទាល់ខ្លួន ហើយចំណែកដែលសល់ត្រូវផ្ដោតខ្លាំងលើជំនាញ និងសមត្ថភាពដែលពាក់ព័ន្ធនឹងការងារ។

ចំណុចពិសេសដែលធ្វើឱ្យអ្នកមានប្រៀបជាងគេ គឺ “ជំនាញពិសេស​”។ ការមានវិញ្ញាបនបត្រពីការសិក្សាអនឡាញ ឬសមត្ថភាពភាសាទីបី (ដូចជាភាសាចិន ឬអង់គ្លេសកម្រិតខ្ពស់) គឺជាសំបុត្រមាសដែលជួយឱ្យ HR ចាប់អារម្មណ៍លើអ្នកភ្លាមៗ។ ជំនាញទាំងនេះបង្ហាញថាអ្នកគឺជាមនុស្សដែលចូលចិត្តអភិវឌ្ឍខ្លួនឯងមិនឈប់ឈរ។ ទន្ទឹមនឹងនោះ អ្នកត្រូវ “សិក្សាពីការពិពណ៌នាការងារ​” ឱ្យបានច្បាស់ ដើម្បីទាញយកបទពិសោធរបស់អ្នកមកសរសេរឱ្យស៊ីគ្នាទៅនឹងអ្វីដែលក្រុមហ៊ុនកំពុងត្រូវការ។ សម្រាប់និស្សិតទើបបញ្ចប់ការសិក្សា អ្នកអាចលើកយកសកម្មភាពស្ម័គ្រចិត្ត ឬកម្មសិក្សាមកបញ្ជាក់ពីសមត្ថភាពរបស់ខ្លួន។

ជាចុងក្រោយ ចំណុចដែលហាមខុសដាច់ខាតគឺ “អក្ខរាវិរុទ្ធ និងវេយ្យាករណ៍”។ កំហុសអក្ខរាវិរុទ្ធតូចតាចអាចធ្វើឱ្យ HR វាយតម្លៃថាអ្នកជាមនុស្សខ្ជីខ្ជា និងមិនយកចិត្តទុកដាក់។ ដូច្នេះ មុននឹងផ្ញើ CV ចេញ ចូរពិនិត្យមើលរាល់ពាក្យពេចន៍ឱ្យបានហ្មត់ចត់បំផុត។ ការរៀបចំ CV ប្រកបដោយវិជ្ជាជីវៈ និងភាពស្មោះត្រង់ គឺជាគ្រឹះដ៏រឹងមាំបំផុតដែលនឹងនាំអ្នកទៅកាន់តុសម្ភាសន៍ការងារដោយទំនុកចិត្ត៕

​