ខេត្តស្ទឹងត្រែង ៖ ភាពចម្រូងចម្រាស បានកើតឡើងក្នុងកិច្ចប្រតិបត្តិការអនុវត្តច្បាប់មួយ កាលពីថ្ងៃទី៥ ខែកុម្ភៈ ឆ្នាំ២០២៦ នៅក្រុងស្ទឹងត្រែង ខណៈពេលដែលរដ្ឋបាលខេត្តបានចេញមុខរារាំងការប្រគល់ដី តាមសាលក្រមតុលាការ…
ខេត្តស្ទឹងត្រែង ៖ ភាពចម្រូងចម្រាស បានកើតឡើងក្នុងកិច្ចប្រតិបត្តិការអនុវត្តច្បាប់មួយ កាលពីថ្ងៃទី៥ ខែកុម្ភៈ ឆ្នាំ២០២៦ នៅក្រុងស្ទឹងត្រែង ខណៈពេលដែលរដ្ឋបាលខេត្តបានចេញមុខរារាំងការប្រគល់ដី តាមសាលក្រមតុលាការ ដោយអះអាងថា ដីនោះ ជាសម្បត្តិរដ្ឋ។
លោក នាង គឹមលី មន្ត្រីទទួលបន្ទុកកិច្ចការអាជ្ញាសាលា នៃសាលាដំបូងខេត្តស្ទឹងត្រែង បានដឹកនាំកម្លាំងចម្រុះ ចុះអនុវត្តសាលក្រមរដ្ឋប្បវេណីលេខ ១០៩៦ “ខ១” ចុះថ្ងៃទី២៤ ខែធ្នូ ឆ្នាំ២០២១ របស់សាលាដំបូងរាជធានីភ្នំពេញ ។
សាលក្រមនេះបង្គាប់ឱ្យឈ្មោះ ឃឹម សុណា(ចុងចម្លើយ) ប្រគល់ដីទំហំ ៣០ម៉ែត្រ x ៦០ម៉ែត្រ ស្ថិតក្នុងក្រុងស្ទឹងត្រែង (តំបន់សត្តឃាត
ដ្ឋាន) ទៅឱ្យឈ្មោះ ជា គួង ដែលជាដើមបណ្តឹង និងត្រូវជាអតីតស្វាមី ។
ទាក់ទិនករណីខាងលើនេះ ទោះជាយ៉ាងណា កិច្ចដំណើរការនេះ ត្រូវបានរាំងស្ទះ បន្ទាប់ពីលោក អ៊ុត អរុណ មេធាវីតំណាងឱ្យរដ្ឋបាលខេត្តស្ទឹងត្រែង បានធ្វើការតវ៉ា ជាផ្លូវការ នៅចំពោះមុខអាជ្ញាសាលា។ លោកមេធាវីបានអះអាងដោយផ្អែកលើមូលដ្ឋានច្បាប់ថា ដីដែលកំពុងអនុវត្តសាលក្រមនោះ ជាកម្មសិទ្ធិស្របច្បាប់របស់រដ្ឋបាលខេត្តស្ទឹងត្រែង។ ដ្ឋបាលខេត្តមានប្លង់រឹង ជាភស្តុតាងបញ្ជាក់ច្បាស់លាស់ថាជាដីរដ្ឋ មិនមែនជាកម្មសិទ្ធិរបស់លោក ជា គួង ដូចដែលបានចែងក្នុងសាលក្រមនោះឡើយ ។
ពាក់ព័ន្ធនឹងវិវាទដណ្តើមកម្មសិទ្ធិរវាងរដ្ឋ និងឯកជននេះ លោក នាង គឹមលី ក្នុងនាមអាជ្ញាសាលា បានសម្របសម្រួលដោយអនុញ្ញាតឱ្យភាគីដើមបណ្តឹង (លោក ជា គួង) ដាក់ពាក្យប្តឹង និងដាក់ភស្តុតាងបន្ថែមទៅកាន់សាលាដំបូងខេត្តស្ទឹងត្រែង ដើម្បីឱ្យតុលាការពិនិត្យ និងសម្រេចឡើងវិញតាមនីតិវិធី ដើម្បីស្វែងរកយុត្តិធម៌ ៕
ចែករំលែកព័តមាននេះ