ខេត្តប៉ៃលិន ៖ រហូតមកដល់ថ្ងៃទី០៥ ខែកុម្ភៈ ឆ្នាំ២០២៦នេះ ប្រជាពលរដ្ឋ ដែលប្រកបមុខរបរដាំដំណាំស្វាយកែវរមៀត បាននាំគ្នាជួលកម្មករឱ្យចូលទៅប្រមូលផលផ្លែលក់ឱ្យឈ្មួញ ដឹកយកទៅលក់ដូរនៅរោងចក្រក្នុងខេត្តប៉ៃលិន ខេត្តបាត់ដំបង…
ខេត្តប៉ៃលិន ៖ រហូតមកដល់ថ្ងៃទី០៥ ខែកុម្ភៈ ឆ្នាំ២០២៦នេះ ប្រជាពលរដ្ឋ ដែលប្រកបមុខរបរដាំដំណាំស្វាយកែវរមៀត បាននាំគ្នាជួលកម្មករឱ្យចូលទៅប្រមូលផលផ្លែលក់ឱ្យឈ្មួញ ដឹកយកទៅលក់ដូរនៅរោងចក្រក្នុងខេត្តប៉ៃលិន ខេត្តបាត់ដំបង ហើយមួយចំនួនទៀត ដឹកយកទៅលក់នៅក្រៅប្រទេសផងដែរ ។
បើតាមប្រភពព័ត៌មានពីកសិករម្នាក់ ឈ្មោះ កប វិចិត្រ អាយុ៣៧ឆ្នាំ រស់នៅក្រុងប៉ៃលិន ខេត្តប៉ៃលិន បានឱ្យភ្នាក់ងារយើងដឹងថា ៖ គាត់បានដាំដំណាំស្វាយកែវរមៀត ជាង១០ហិកតា នៅលើដីចំការរបស់ខ្លួន ត្រង់ចំណុចខកមូស ក្នុងភូមិសួនអំពៅកើត សង្កាត់ប៉ៃលិន ក្រុងប៉ៃលិន ហើយមកដល់ពេលនេះ បន្ទាប់ពីផ្លែស្វាយកែវរមៀតខ្ចី ធំល្មមអាចប្រមូលផលបាន ហើយស្របពេល ដែលក្រុមឈ្មួញចាប់ផ្តើមដើររកទិញនៅតាមចំការនានា គាត់ក៏បានស្វែងរកជួលឱ្យកម្មករចូលទៅបេះប្រមូលផលលក់តែម្តង ។
ប្រភពព័ត៌មានបានបន្តទៀតថា បច្ចុប្បន្ននេះ ទោះបីជាច្រកទ្វារព្រំដែនរវាងប្រទេសកម្ពុជា ត្រូវបានបិទជិតទាំងស្រុងជាមួយនឹងប្រទេសថៃ ដែលមិនអាចទាក់ទងចេញចូលទៅធ្វើការងារដូចសព្វមួយដងបាន។ តែក្រុមឈ្មួញ បន្តចូលទិញកសិផលផ្លែស្វាយកែវរមៀតយកទៅលក់ដូរបន្តឱ្យរោងចក្រនៅក្នុងខេត្តប៉ៃលិន ក៏មានឈ្មួញខ្លះទៀត ដឹកយកទៅឯរោងចក្រនៅក្នុងខេត្តបាត់ដំបង ពោធិ៍សាត់ ហើយមិនត្រឹមតែប៉ុណ្ណោះ ទីផ្សារផ្លែស្វាយកែវរមៀតខ្ចី ត្រូវបានគេនាំចេញទៅលក់ដូរនៅប្រទេសវៀតណាមថែមទៀតផងដែរ។ ដូច្នេះពួកគាត់ពិតជាមិនភ័យខ្លាចផ្លែស្វាយទុំជ្រុះចោលនៅតាមដើមនោះទេ ដោយជារៀងរាល់ថ្ងៃ ខិតខំប្រឹងប្រែងថែទាំកាត់ស្មៅ ដាក់ជី និងបាញ់ថ្នាំសម្លាប់សត្វល្អិត រហូតដល់ប្រមូលផលលក់ទាន់ពេលវេលា ។
លោកបញ្ជាក់ទៀតថា បច្ចុប្បន្នផ្លែស្វាយកែវរមៀតខ្ចី ឈ្មួញទិញ១គីឡូក្រាមតម្លៃ៦០០រៀល ខណៈដែលពីមុនឈ្មួញទិញតម្លៃលើសនេះ ឬទាបជាងនេះ ទៅតាមសភាពជាក់ស្តែង ថាតើផ្លែស្វាយល្អ ឬមិនសូវល្អ។ ទោះបីជាយ៉ាងណាក៏ដោយ ឱ្យតែក្រុមឈ្មួញចូលទៅទិញដល់ក្នុងចំការរបស់ខ្លួន ទោះជាផ្លែស្វាយថោក ឬបានថ្លៃខ្ពស់ ក៏អាចឱ្យគាត់លក់បានថវិកាសម្រាប់ផ្គត់ផ្គង់ជីវភាពប្រចាំថ្ងៃ និងសងជំពាក់បំណុលគេមួយចំនួនថែមទៀត។
ចំណែកកសិករម្នាក់ទៀត ឈ្មោះ បឿក ភេទប្រុស បានឱ្យដឹងដែរថា លោកដាំដំណាំស្វាយកែវរមៀតជាច្រើនដើម ហើយក៏បានប្រមូលផលជាបន្តបន្ទាប់លក់ឱ្យឈ្មួញ បើទោះបីជាបញ្ហាព្រំដែនកម្ពុជាថៃ ប្រឈមនឹងការបិទទ្វាររយៈពេលយូរ។ តែដំណាំកសិផលរបស់ខ្លួន មិនមានការខូចខាតអ្វីឡើយ ដោយមានក្រុមឈ្មួញខ្មែរទិញយកទៅលក់ដូរបន្តឱ្យក្រុមហ៊ុនវៀតណាម និងក្រុមហ៊ុនចិនយកទៅចម្រាញ់ផលិតជាគ្រឿងកំប៉ុងរក្សាទុកបានយូរ។
គាត់ក៏លើកទឹកចិត្តដល់កសិករដែលដាំដំណាំគ្រប់ប្រភេទ ត្រូវតែព្យាយាមថែរក្សាដំណាំរបស់ខ្លួនឱ្យបានល្អ ព្រោះបច្ចុប្បន្ននេះ យើងមានឈ្មួញអ្នកដើររកទិញជាច្រើន ដោយមិនទុកសល់ចោលនោះឡើយ ហើយដំណាំកសិផលខ្លះទៀត ឡើងថ្លៃគួរឱ្យកត់សម្គាល់ថែមទៀតផងដែរ៕
ចែករំលែកព័តមាននេះ