ទីក្រុងតេហេរ៉ង់ ៖ ការផ្តាច់អ៊ីនធឺណិតទាំងស្រុងនៅក្នុងប្រទេសអ៊ីរ៉ង់ បានធ្វើឱ្យប្រទេសអាស៊ីខាងលិចមួយនេះ ស្ថិតក្នុងភាពឯកោស្ទើរតែទាំងស្រុង ខណៈដែលអាជីវកម្មជាច្រើនជាប់គាំង ប្រជាជនធ្លាក់ចូលទៅក្នុងវិបត្តិជីវភាព និងបណ្តាលឱ្យខូចខាតសេដ្ឋកិច្ចរាប់សិបលានដុល្លារអាមេរិកជារៀងរាល់ថ្ងៃ។ យោងតាមការចេញផ្សាយពីសារព័ត៌មាន Aljazeera…
ទីក្រុងតេហេរ៉ង់ ៖ ការផ្តាច់អ៊ីនធឺណិតទាំងស្រុងនៅក្នុងប្រទេសអ៊ីរ៉ង់ បានធ្វើឱ្យប្រទេសអាស៊ីខាងលិចមួយនេះ ស្ថិតក្នុងភាពឯកោស្ទើរតែទាំងស្រុង ខណៈដែលអាជីវកម្មជាច្រើនជាប់គាំង ប្រជាជនធ្លាក់ចូលទៅក្នុងវិបត្តិជីវភាព និងបណ្តាលឱ្យខូចខាតសេដ្ឋកិច្ចរាប់សិបលានដុល្លារអាមេរិកជារៀងរាល់ថ្ងៃ។
យោងតាមការចេញផ្សាយពីសារព័ត៌មាន Aljazeera កាលពីថ្ងៃទី២ ខែកុម្ភៈ ឆ្នាំ២០២៦ បានរាយការណ៍ថា ការដាក់ចេញវិធានការផ្តាច់អ៊ីនធឺណិតរបស់រដ្ឋាភិបាលអ៊ីរ៉ង់ បានធ្វើឱ្យប្រទេសនេះស្ទើរតែផ្តាច់ខ្លួនចេញពីពិភពខាងក្រៅ ដែលបំផ្លាញសេដ្ឋកិច្ចយ៉ាងធ្ងន់ធ្ងរ និងធ្វើឱ្យប្រតិបត្តិការអាជីវកម្មជាច្រើនជាប់គាំង។ ជាង៣សប្តាហ៍ បន្ទាប់ពីរដ្ឋាភិបាលបានចាប់ផ្តើមបិទអ៊ីនធឺណិតទូទាំងប្រទេស និងរយៈពេលយូរបំផុតមួយក្នុងប្រវត្តិសាស្ត្រនោះ វាបានប៉ះពាល់ដោយផ្ទាល់ដល់ប្រជាជនជាង ៩០ លាននាក់ ហើយទស្សនវិស័យសេដ្ឋកិច្ចអ៊ីរ៉ង់ក៏កាន់តែអាប់អួរខ្លាំងផងដែរ។
អាជ្ញាធរអ៊ីរ៉ង់បានកាត់ផ្តាច់អ៊ីនធឺណិត និងទំនាក់ទំនងទាំងអស់ទូទាំងប្រទេសភ្លាមៗ នៅយប់ថ្ងៃទី៨ ខែមករា ឆ្នាំ២០២៦ ចំពេលផ្ទុះការតវ៉ាទូទាំងប្រទេសកាន់តែខ្លាំងឡើង ដែលអង្គការសហប្រជាជាតិ និងអង្គការសិទ្ធិមនុស្សអន្តរជាតិបានអះអាងអំពីការបង្ក្រាបដោយការប្រើប្រាស់កងកម្លាំងដ៏សាហាវមួយ។
កម្រិតអ៊ីនធឺណិតភាគច្រើនរបស់អ៊ីរ៉ង់ ក៏ដូចជាសេវាទូរស័ព្ទទាំងក្នុង និងក្រៅស្រុក ព្រមទាំងសារ SMS ត្រូវបានបើកដំណើរការឡើងវិញក្នុងរយៈពេលប៉ុន្មានថ្ងៃថ្មីៗនេះ ប៉ុន្តែភាគច្រើននៅតែមិនអាចភ្ជាប់ទៅអ៊ីនធឺណិតសកលដោយសេរី ចំពេលមានការគ្រប់គ្រងដ៏តឹងរ៉ឹងដោយរដ្ឋ។ ប្រសិនអ្នកប្រើប្រាស់ចង់គេចផុតពីការរឹតបន្តឹងនេះ ពួកគេត្រូវដំណើរការតាមរយៈបណ្តាញឯកជននិម្មិត ដែលត្រូវបានស្គាល់ថា VPN ជាច្រើនប្រភេទ ប៉ុន្តែដំណោះស្រាយបែបនេះច្រើនតែមានតម្លៃថ្លៃ និងប្រើបានបណ្តោះអាសន្នប៉ុណ្ណោះ។
កាលពីសប្តាហ៍មុន រដ្ឋមន្ត្រីក្រសួងបច្ចេកវិទ្យាព័ត៌មាន និងទំនាក់ទំនងរបស់អ៊ីរ៉ង លោក Sattar Hashemi បានប្រាប់អ្នកយកព័ត៌មានថា ក្រសួងប៉ាន់ប្រមាណថា សេដ្ឋកិច្ចអ៊ីរ៉ង់បានរងការខូចខាតយ៉ាងហោចណាស់ ៥០ ទ្រីលានរៀលអ៊ីរ៉ង់ ឬប្រហែល ៤២ លានដុល្លារអាមេរិកជារៀងរាល់ថ្ងៃ អំឡុងពេលការដាច់ចរន្តអគ្គិសនី។ ទោះយ៉ាងណាក៏ដោយ លោកបានទទួលស្គាល់ថា តួលេខពិតប្រាកដទំនងខ្ពស់ជាងនេះទៅទៀត ដោយបង្ហាញថា រដ្ឋមន្ត្រីមួយចំនួន និងមន្ត្រីសេដ្ឋកិច្ចផ្សេងទៀតបានផ្តល់ការប៉ាន់ស្មានតួលេខខ្ពស់ជាងនេះ នៅក្នុងការពិភាក្សាឯកជន។
អំឡុងពេលកាត់ផ្តាច់អ៊ីនធឺណិត សូម្បីតែអាជ្ញាធរអ៊ីរ៉ង់ខ្លួនឯង ក៏បានតស៊ូដើម្បីរក្សាសេវាកម្មជាមូលដ្ឋានតាមរយៈអ្វីដែលពួកគេហៅថា បណ្តាញព័ត៌មានជាតិ និងអ៊ីនធឺណិតក្នុងស្រុក។ ការតភ្ជាប់យឺត និងមិនគួរឱ្យទុកចិត្តបានរារាំងអាជីវកម្មជាច្រើនពីការប្រើប្រាស់ប្រព័ន្ធនេះ។ យោងតាមការប៉ាន់ស្មានរបស់ក្រសួង អាជីវកម្មអនឡាញរបស់អ៊ីរ៉ង់អាចបន្តដំណើរការបានត្រឹមតែប្រហែល ២០ ថ្ងៃប៉ុណ្ណោះ ក្រោមការកាត់ផ្តាច់ បង្ខំឱ្យរដ្ឋស្តារការចូលប្រើអ៊ីនធឺណិតឡើងវិញបន្តិចម្តងៗ។
ដោយឡែក លោក Abazar Barari សមាជិកសភាពាណិជ្ជកម្មអ៊ីរ៉ង់ ជឿជាក់ថា តួលេខខូចខាតដែលបានបោះពុម្ពផ្សាយគ្រាន់តែឆ្លុះបញ្ចាំពីការខាតបង់ដែលអាចមើលឃើញប៉ុណ្ណោះ ហើយមិនបានរាប់បញ្ចូលការខាតបង់លាក់កំបាំងនោះទេ។ លោកអះអាងថា សកម្មភាពនាំចូល និងនាំចេញពឹងផ្អែកខ្លាំងលើអ៊ីនធឺណិត រាប់ចាប់ពីការចរចាតម្លៃ និងការចេញវិក្កយបត្រ រហូតដល់ការសម្របសម្រួលដឹកជញ្ជូន និងការផ្ទៀងផ្ទាត់ឯកសារ។ ដូច្នេះការបិទអ៊ីនធឺណិតស្ទើរតែធ្វើឱ្យពាណិជ្ជកម្មបរទេសខ្វិន ស្របពេលអតិថិជនអន្តរជាតិជាច្រើនក៏បានចាកចេញពីទីផ្សារអ៊ីរ៉ង់ផងដែរ៕ ប្រភព ៖ Aljazeera
ចែករំលែកព័តមាននេះ