វៀតណាម ៖ អាជ្ញាធរ​ក្នុង​ទីក្រុង​ហៃ​ហ្វុ​ង (Hai Phong) បាន​រឹបអូស និង​កម្ទេច​សណ្តែកបណ្តុះ​ជាង​៥ តោន ដែល​ត្រូវ​បាន​គេ​ដាក់​សារធាតុ​គីមី ប៊ែ​ន​ស៊ី​ល​អា​មី​ណូ​ភី​រី​ន (Benzylaminopurine) ដែល​ជួយ​ឱ្យ​សណ្តែកបណ្តុះ​ទាំងនោះ​នៅ​តែ​រក្សា​ភាព​ស្រស់​ដដែល បើ​ទោះបីជា​រក្សា​ទុក​រយៈពេល​មួយ​ខែ​ក៏​ដោយ ។ នេះ​បើ​យោង​តាម​ការ​ចុះ​ផ្សាយ​របស់​សារព័ត៌មាន VTC News​។

ក្រុមការងារ​លេខ​១ នៃ​នាយកដ្ឋាន​គ្រប់គ្រង​ទីផ្សារ ចំណុះ​មន្ទីរ​ឧស្សាហកម្ម និង​ពាណិជ្ជកម្ម សហការ​ជាមួយ​ក្រុមការងារ​លេខ​៥ នៃ​នាយកដ្ឋាន​នគរបាល​សេដ្ឋកិច្ច ទីក្រុង​ហៃ​ហ្វុ​ង បាន​ចុះ​រឹបអូស និង​បំផ្លាញ​សណ្តែកបណ្តុះ​ដែល​មាន​ផ្ទុក​សារធាតុ​គីមី​ខាងលើ ។

ជាក់ស្តែង អាជ្ញាធរ​បាន​រក​ឃើញ​ថា សណ្តែកបណ្តុះ​ទាំងនេះ ត្រូវ​បាន​ផលិត​ឡើង​ដោយ​ការ​ត្រាំ​ក្នុង​សារធាតុ​គីមី ដែល​ហៅ​ឱ្យ​ងាយ​យល់​ថា ទឹក​ថ្នាំ​បំប៉ន​សណ្តែក ដែល​ត្រូវ​បាន​ផ្អាប់​ទុក​ក្នុង​ធុង​ជ័រ​ប្លា​ស្ទិ​ក​ជាង​៧០០​ធុង នៅ​ទីតាំង​សិប្បកម្ម​ចំនួន​ពីរ​កន្លែង​ផ្សេង​គ្នា ដែល​ជា​កម្ម​សិទ្ធ​របស់​លោក Nguyen Cong Bien និង​លោក Nguyen Van Thinh ស្ថិត​ក្នុងភូមិ Dai Luong ឃុំ Gia Phuc ទីក្រុង​ហៃ​ហ្វុ​ង ។ សារធាតុ​គីមី​ដែល​គេ​យក​ទៅ​ត្រាំ​សណ្តែកបណ្តុះ គឺ​ថ្នាំ​គីមី​ជំរុញ​ការ​លូតលាស់ ដែល​ត្រូវ​បាន​ប្រើប្រាស់​ជា​ញឹក​ញ៉ាប់​ក្នុង​វិស័យ​កសិកម្ម ទោះបីជា​សារធាតុ​គីមី​ទាំងនេះ​ត្រូវ​បាន​ច្បាប់​ហាមឃាត់​មិន​ឱ្យ​ប្រើប្រាស់​ក្នុង​ការ​ផលិត​ចំណីអាហារ​ក៏​ដោយ​ចុះ ។

អ្វី​ដែល​គួរ​ឱ្យ​តក់ស្លុត​នោះ យោង​តាម​អ្នកជំនាញ​សុខភាព​បាន​អះអាង​ថា ទោះបីជា​សារធាតុ​ទាំងនេះ​មិន​បង្ក​ឱ្យ​មានការ​ពុល​ស្រួច​ស្រាវ ដូច​ជា វិលមុខ ចង្អោរ ភ្លាម​ៗ​ក៏​ដោយ ប៉ុន្តែ​វា​មាន​ផល​ប៉ះពាល់​រយៈពេល​វែង​ដល់​រាង​កាយ ។ ពួក​វា​នឹង​ជ្រាប​ចូល​ទៅ​ក្នុង​សរីរាង្គ​បន្ត​ពូជ រំញោច​ការ​លូតលាស់​ខុស​ប្រក្រតី និង​ធ្វើ​ឱ្យ​ប៉ះពាល់​ដល់​សុខភាព​មនុស្ស និង​បង្ក​ជា​ជំងឺ​ផ្សេង​ៗ ដែល​បង្ក​គ្រោះថ្នាក់​ដល់​អាយុជីវិត ។

យ៉ាងណាមិញ នេះ​មិនមែន​ជា​លើក​ទី​មួយ​ទេ ដែល​អាជ្ញាធរ​វៀតណាម បាន​រក​ឃើញ​ការ​ប្រើប្រាស់​សារធាតុ​គីមី ប៊ែ​ន​ស៊ី​ល​អា​មី​ណូ​ភី​រី​ន (Benzylaminopurine) ក្នុង​ទ្រង់ទ្រាយ​ធំ​បែប​នេះ ។ កន្លង​មក ករណី​ស្រ​ដៀង​គ្នា​នេះ ត្រូវ​បាន​រក​ឃើញ​នៅ​ក្នុង​ខេត្ត​មួយ​ចំនួន​ដូច​ជា Dak Lak, Thua Thien Hue, និង Quang Ngai ជាដើម ។

ដោយឡែក​តែ​ក្នុង​ខេត្ត Dak Lak តែ​មួយ មាន​ទីតាំង​ផលិត​ចំនួន​៦ បាន​បញ្ចេញ​សណ្តែកបណ្តុះ​ត្រាំ​សារធាតុ​គីមី​ប្រហែល ២,៩០០​តោន​ទៅ​កាន់​ទីផ្សារ ដោយ​ជា​មធ្យម​មានការ​ប្រើប្រាស់​ប្រហែល ៨-១០ តោន​ក្នុង​មួយ​ថ្ងៃ ។

តាម​រយៈ​ការ​រក​ឃើញ​នេះ វា​ពិតជា​ពិបាក​ខ្លាំង​ណាស់​សម្រាប់​អ្នក​ប្រើប្រាស់​ក្នុង​ការ​បែងចែក​ដោយ​ភ្នែក​ទទេ រវាង​សណ្តែកបណ្តុះ​ដែល​មាន​សុវត្ថិភាព និង​សណ្តែកបណ្តុះ​ដែល​ដាំ​ដុះ​ដោយ​ប្រើ​សារធាតុ​គីមី​ហាមឃាត់ ។ នៅ​តាម​ទីផ្សារ ប្រជាពលរដ្ឋ​ភាគច្រើន​នៅ​តែ​ជ្រើសរើស​ទិញ​ផលិតផល​ដោយ​ផ្អែក​លើ​រូបរាង និង​តម្លៃ ដោយ​មិនសូវ​យកចិត្តទុកដាក់​លើ​លក្ខណៈ​វិនិច្ឆ័យ​ដូច​ជា ប្រភព​ដើម និង​ការ​ត្រួតពិនិត្យ​គុណភាព​នោះ​ទេ ជា​ពិសេស​ពួក​គេ​ចូល​ចិត្ត​ទិញ​បន្លែ​ណា​ដែល​ស្រស់​ៗ​យក​មក​ទទួលទាន ដោយ​ពុំ​បានដឹង​ថា មាន​សារធាតុ​គ្រោះថ្នាក់​អ្វីខ្លះ បង្កប់​នូវ ពី​ភាព​ស្រស់​ទាំង​អស់នេះ​ទេ?