រាជធានីភ្នំពេញ ៖ ក្មេងៗស្ទាវមួយក្រុម គ្រាន់តែអ្នកភូមិក្នុងបុរីស្រែកអោយរឿងជិះម៉ូតូលឿន ស្រាប់តែនាំគ្នាត្រឡប់មកវិញយកដុំថ្មគប់ស្រោចលើដំបូលផ្ទះប្រជាពលរដ្ឋ បណ្តាលឲ្យរងការខូចខាត រួចនាំគ្នាគេចខ្លួនចូលទៅក្នុងឃ្លាំងមួយកន្លែងនៅក្បែរនោះបាត់អស់ ។
ហេតុការណ៍ខាងលើនេះបង្កឲ្យមានការភ្ញាក់ផ្អើលកាលពីម៉ោង១២អធ្រាត្រថ្ងៃទី៤ ខែកុម្ភៈ ឆ្នាំ២០២៦ បុរីសាន់នី ភូមិព្រៃល្ង សង្កាត់ចោមចៅទី២ ខណ្ឌពោធិ៍សែនជ័យ ។
តាមប្រភពពីប្រជាពលរដ្ឋដែលរស់នៅក្នុងបុរី បានអោយដឹងថា មុនពេលកើតហេតុ ពួកគាត់មានអ្នកខ្លះសំរាន្តក្នុងផ្ទះ ហើយមានអ្នកខ្លះទៀតអង្គុយហូបចុកនៅម្តុំនោះ គាប់ជួនពេលនោះ ក៍ស្រាប់តែក្រុមក្មេងស្ទាវមួយក្រុម ដែលគេស្គាល់ថាជាកម្មករ នៅក្នុងឃ្លាំងក្បែរនោះ បានជិះម៉ូតូចំនួន៣គ្រឿង មានគ្នា៦នាក់ ជិះលឿនៗនៅក្នុងបុរី ។ ពេលនោះពលរដ្ឋនៅក្នុងបុរីស្រែកកុំអោយជិះម៉ូតូលឿនៗ ស្រាប់តែក្មេងស្ទាវៗទាំងនោះខឹងសម្បារ បានស្រែកតមាត់វិញ ហើយជិះម៉ូតូទៅបាត់អស់ ។
តាមប្រភពដដែលបន្តទៀតថា លុះមួយសន្ទុះក្រោយមក ខណៈដែលពួកគាត់ជាប្រជាពលរដ្ឋបានចូលសំរានក្នុងផ្ទះអស់ ស្រាប់តែបក្ខពួកក្មេងស្ទាវៗទាំងនោះ ត្រឡប់មកវិញបានយកដុំថ្មគប់ស្រោចលើដំបូលផ្ទះរបស់ពួកគាត់ បណ្តាលឲ្យខូចខាតដំបូលអស់ចំនួន២ផ្ទះ ហើយក្មេងស្ទាវទាំងនោះនាំគ្នាជិះរត់គេចចូលទៅក្នុងឃ្លាំងក្បែរនោះបាត់អស់ទៅ ។
ជុំវិញករណីខាងលើនេះដែរ មួយសន្ទុះក្រោយមក កម្លាំងសមត្ថកិច្ចមូលដ្ឋានបានចុះទៅកន្លែងកើតហេតុ សួរនាំប្រជាពលរដ្ឋ និងឃើញវត្ថុតាង ដុំថ្មមួយចំនួន និងដំបូលផ្ទះពលរដ្ឋខូចខាតអស់២ផ្ទះពិតប្រាកដមែន ។
ក្រោយកើតហេតុ សមត្ថកិច្ចបានណែនាំអោយប្រជាពលរដ្ឋជាម្ចាស់ផ្ទះរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋចោមចៅទី២ ដើម្បីអោយសមត្ថកិច្ចស្រាវជ្រាវរកក្មេងស្ទាវទាំងនោះមកចាត់ការតាមនិតិវិធី ៕
ចែករំលែកព័តមាននេះ