រាជធានីភ្នំពេញ ៖ យុវជនវ័យក្មេង២នាក់ជាបុគ្គលិកលក់មាន់ជិះម៉ូតូលឿនបុកជាមួយបុរសម្នាក់ជិះម៉ូតូមួយគ្រឿងយ៉ាងពេញទំហឹង បណ្ដាលអោយរងរបួសយុវជនសន្លប់ស្ដូកស្ដឹង និងបុរសម្នាក់បានស្លាប់ក្រោយពីរថយន្តសង្គ្រោះបន្ទាន់ដឹកទៅមន្ទីរពេទ្យ ។ ហេតុការណ៍ខាងលើនេះ បានកើតឡើងកាលពីវេលាម៉ោង៩យប់ថ្ងៃទី៤ ខែ កុម្ភ:…
រាជធានីភ្នំពេញ ៖ យុវជនវ័យក្មេង២នាក់ជាបុគ្គលិកលក់មាន់ជិះម៉ូតូលឿនបុកជាមួយបុរសម្នាក់ជិះម៉ូតូមួយគ្រឿងយ៉ាងពេញទំហឹង បណ្ដាលអោយរងរបួសយុវជនសន្លប់ស្ដូកស្ដឹង និងបុរសម្នាក់បានស្លាប់ក្រោយពីរថយន្តសង្គ្រោះបន្ទាន់ដឹកទៅមន្ទីរពេទ្យ ។
ហេតុការណ៍ខាងលើនេះ បានកើតឡើងកាលពីវេលាម៉ោង៩យប់ថ្ងៃទី៤ ខែ កុម្ភ: ឆ្នាំ ២០២៦ នៅចំណុចក្បែរវត្តពោធិញាណ ផ្លូវ៧៧បេតេ សង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ ។
ប្រភពព័ត៍មានពីប្រជាពលរដ្ឋដែលលក់ដូរក្បែរកន្លែងកើតហេតុបានឲ្យដឹងថា មុនពេលកើតហេតុ បុគ្គលិកលក់មាន់ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ តាមផ្លូវ៧៧បេតេ ក្នុងទិសដៅពីកើតទៅលិចក្នុងល្បឿនលឿនជ្រុលបុកបុរសវ័យ៤០ឆ្នាំម្នាក់ជិះម៉ូតូPCX ពណ៌ខ្មៅ ធ្វើដំណើរតាមផ្លូវ៧៧បេតេ ក្នុងទិសដៅបញ្ច្រាសគ្នា យ៉ាងពេញទំហឹង បណ្តាលឲ្យយុវជន២នាក់រងរបួសធ្ងន់ស្រាល២នាក់ ត្រូវមិត្តភក្តិហៅកង់បីដឹកទៅព្យាបាល ចំណែកបុរសជិះម៉ូតូPCXបោកក្បាលហូរឈាមស្លាប់ ប៉ុន្តែប្រជាពលរដ្ឋមិនអស់ចិត្ត ភ្លាមៗនោះក៏នាំគ្នាទូរស័ព្ទហៅរថយន្តសង្គ្រោះបន្ទាន់របស់មន្ទីរពេទ្យមិត្តភាពខ្មែរសូវៀត(ពេទ្យរុស្ស៊ី) បានចុះមកដល់កន្លែងកើតហេតុ តែគ្រូពេទ្យបញ្ជាក់ថាជនរងគ្រោះស្លាប់បាត់ទៅហើយ។
ជនរងគ្រោះដែលស្លាប់ឈ្មោះ ប៊ុន យូរ៉ា ភេទប្រុស អាយុ៤០ឆ្នាំ ជាបុគ្គលិកក្រុមហ៊ុនឯកជន ស្នាក់នៅបន្ទប់ជួលក្បែរកន្លែងកើតហេតុ សង្កាត់បឹងទំពុនទី១ ខណ្ឌមានជ័យ រាជធានីភ្នំពេញ ។
ក្រោយកើតហេតុ ប្រពន្ធនិងកូនរបស់ជនរងគ្រោះបានមកដល់កន្លែងកើតហេតុ និងស្រែកយំដោយក្តីសោកស្តាយយ៉ាងខ្លាំង ។
បន្ទាប់មក សមត្ថកិច្ចធ្វើការវាស់វែងម៉ូតូទាំង២គ្រឿងប្រគល់ឲ្យការិយាល័យជំនាញចរាចរណ៍យកទៅរក្សាទុកបណ្ដោះអាសន្ន រង់ចាំកសាងឯកសារបញ្ជូនទៅតុលាការចាត់ការតាមច្បាប់ ។ ចំណែកសពជនរងគ្រោះត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅឯស្រុកកំណើត ៕
ចែករំលែកព័តមាននេះ