ទីក្រុងកៀវ៖ ប្រធានក្រុមអ្នកចរចាអ៊ុយក្រែន លោក រូស្តេម អ៊ូមេរ៉ូវ បានវាយតម្លៃខ្ពស់ចំពោះកិច្ចពិភាក្សាត្រីភាគីក្នុងទីក្រុងអាប៊ូដាប៊ីថា មានខ្លឹមសារស៊ីជម្រៅ និងផ្ដោតលើដំណោះស្រាយជាក់ស្ដែង ដើម្បីបញ្ចប់ជម្លោះ។ នេះបើយោងតាមសារព័ត៌មាន Xinhua, Reuters និងប្រភពដទៃទៀត ចុះផ្សាយនៅថ្ងៃទី៥ ខែកុម្ភៈនេះ។

កិច្ចចរចានៅក្នុងប្រទេសអារ៉ាប់រួមនាពេលនេះ មិនត្រឹមតែជាការជួបពិភាក្សាធម្មតាប៉ុណ្ណោះទេ ប៉ុន្តែបានឈានដល់ការបង្កើតក្រុមការងារបច្ចេកទេស ដើម្បីបន្តរៀបចំជំហានបន្ទាប់ដាក់ជូនប្រធានាធិបតី ហ្សេឡែនស្គី។ ទោះបីជាព័ត៌មានលម្អិតនៃដំណោះស្រាយមិនទាន់ត្រូវបានបញ្ចេញ ប៉ុន្តែការប្រើពាក្យថា «មានផ្លែផ្កា» ពីសំណាក់ភាគីអ៊ុយក្រែន បានក្លាយជាសញ្ញាវិជ្ជមានដ៏កម្រមួយសម្រាប់សន្តិសុខសកល។

​សូមបញ្ជាក់ថា ចាប់តាំងពីសង្គ្រាមទ្រង់ទ្រាយធំបានផ្ទុះឡើងក្នុងឆ្នាំ ២០២២ កិច្ចចរចារវាងអ៊ុយក្រែន និងរុស្ស៊ីបានជាប់គាំងស្ទើរតែទាំងស្រុង ដោយសារភាគីទាំងពីរមានលក្ខខណ្ឌខុសគ្នាដាច់ស្រឡះជុំវិញបញ្ហាទឹកដី។ ទីក្រុងអាប៊ូដាប៊ី នៃប្រទេសអារ៉ាប់រួម បានដើរតួជាម្ចាស់ផ្ទះ និងជាអ្នកសម្របសម្រួលដ៏សំខាន់ដែលត្រូវបានទុកចិត្តពីគ្រប់ភាគី រួមទាំងសហរដ្ឋអាម៉េរិកផងដែរ។ ការវិលត្រឡប់មកតុចរចាដែលមានវត្តមានមហាអំណាចអាម៉េរិកចូលរួមដោយផ្ទាល់នៅពេលនេះ ត្រូវបានគេមើលឃើញថាជាការផ្លាស់ប្តូរយុទ្ធសាស្ត្រថ្មី ដើម្បីស្វែងរក​ច្រកចេញប្រកបដោយមោទនភាពសម្រាប់ភាគីជម្លោះ ចំពេលដែលពិភពលោកកំពុងរងសម្ពាធសេដ្ឋកិច្ច និងសន្តិសុខកាន់តែខ្លាំងពីសង្គ្រាមដែលអូសបន្លាយយូរមកនេះ៕