ខេត្តស្ទឹងត្រែង៖មន្ត្រីជំនាញនៃនាយកដ្ឋានបុរាណវិទ្យា និងបុរេប្រវត្តិវិទ្យា នៃក្រសួងវប្បធម៌ និងវិចិត្រសិល្បៈ បានបង្ហាញលទ្ធផលនៃការវិភាគបឋមលើសំណាកឡបុរាណដែលបានរកឃើញនៅក្នុងស្រុកបុរីអូរស្វាយសែនជ័យដោយបញ្ជាក់ថា នេះគឺជាបច្ចេកវិទ្យាដុតកំបោរដ៏ទំនើបរបស់មនុស្សសម័យដើម ទោះបីជាអាយុកាលពិតប្រាកដមិនទាន់ត្រូវបានកំណត់ក៏ដោយ។
លោក ឡុង វិទូ ប្រធាននាយកដ្ឋានបុរាណវិទ្យា និងបុរេប្រវត្តិវិទ្យា បានបញ្ជាក់កាលពីថ្ងៃទី៣ ខែកុម្ភៈ ឆ្នាំ២០២៦ថា បន្ទាប់ពីការធ្វើពិសោធន៍លើសំណាកអស់រយៈពេលជាងមួយខែ ក្រុមការងារបានរកឃើញនូវចំណុចសំខាន់ៗនៃរចនាសម្ព័ន្ធឡទាំងនោះ រួមមាន៖ រាងសណ្ឋាន ឡ ត្រូវបានសាងសង់ដោយការជីកដីចុះក្រោមមានបាតធំ រួមតូចនៅផ្នែកកណ្ដាល និងមាត់ខាងលើរួមតូចដូចក្អម។ ជញ្ជាំង ឡធ្វើពីដីឥដ្ឋបិទជិតទាំងបាត និងផ្នែកខាងលើ ដោយទុកប្រឡោះមួយសម្រាប់ដាក់អុសដុត។ ឡនេះមានរន្ធខ្យល់ (Diameter 6cm) ដែលអាចបង្កើនសីតុណ្ហភាពភាពបានលើសពី ១,០០០អង្សាសេ (1000^{\circ}C) ដែលជាកម្រិតកម្ដៅអាចរំលាយរ៉ែថ្មពណ៌ ស យកមកធ្វើជាកំបោរបាន។
បើតាមការបញ្ជាក់របស់លោក ភោគ សុវិសិដ្ឋ អភិបាលរងស្រុកបុរីអូរស្វាយសែនជ័យ ឡបុរាណទាំងនេះត្រូវបានផុសឡើងបន្ទាប់ពីមានការបាក់ច្រាំងទន្លេនៅចុងឆ្នាំ២០២៥។ សរុបមានចំនួន ១២ ឡ ចែកចេញជា ៤ទីតាំងធំៗ៖កន្ទុយកោះហាន: ចំនួន ៧ ឡ កោះកី: ចំនួន ២ ឡ កំពង់ដសាលាឃុំកោះស្នែង: ចំនួន ១ ឡ កោះខ្លី និងកោះស្រឡៅ ចំនួន ២ ឡ។
បច្ចុប្បន្ន ស្ថានភាពឡទាំងនេះកំពុងប្រឈមនឹងការខូចខាតទាំងស្រុងដោយសារការបាក់ច្រាំងទន្លេ។ ក្រុមការងារជំនាញបានស្នើសុំកិច្ចសហការពីខាងរដ្ឋបាលខេត្តស្ទឹងត្រែង ដើម្បីមានវិធានការអភិរក្សតំបន់អេកូទេសចរណ៍សម្រស់កោះហាននេះ និងត្រៀមធ្វើកំណាយស្រាវជ្រាវបន្ថែម។
ទាក់ទិនករណីខាងលើ គោលដៅបន្ទាប់របស់អ្នកបុរាណវិទ្យា គឺស្វែងរកអាយុកាលពិតប្រាកដនៃឡទាំងនេះ ដើម្បីបង្ហាញពីទេពកោសល្យរបស់បុព្វបុរសខ្មែរ មិនត្រឹមតែក្នុងការផលិតកំបោរប៉ុណ្ណោះទេ ប៉ុន្តែអាចឈានដល់ការស្លដែក ស្ពាន់ និងលង្ហិន ដើម្បីធ្វើជាអាវុធ និងឧបករណ៍ប្រើប្រាស់ផ្សេងៗ ដែលជាមរតកចំណេះដឹងសម្រាប់យុវជនជំនាន់ក្រោយ ៕
ចែករំលែកព័តមាននេះ