ខេត្តស្ទឹងត្រែង ៖ រដ្ឋបាលក្រុងស្ទឹងត្រែង បានផ្តើមយុទ្ធនាការរៀបចំសណ្តាប់ធ្នាប់សាធារណៈឡើងវិញ នៅថ្ងៃទី០៣ ខែកុម្ភៈ ឆ្នាំ២០២៦ ដោយផ្តោតលើការលុបបំបាត់ការលក់ដូរ អនាធិបតេយ្យ ដែលបង្កការកកស្ទះចរាចរណ៍…
ខេត្តស្ទឹងត្រែង ៖ រដ្ឋបាលក្រុងស្ទឹងត្រែង បានផ្តើមយុទ្ធនាការរៀបចំសណ្តាប់ធ្នាប់សាធារណៈឡើងវិញ នៅថ្ងៃទី០៣ ខែកុម្ភៈ ឆ្នាំ២០២៦ ដោយផ្តោតលើការលុបបំបាត់ការលក់ដូរ អនាធិបតេយ្យ ដែលបង្កការកកស្ទះចរាចរណ៍ និងប៉ះពាល់ដល់សោភ័ណភាពក្រុង ។
អភិបាលរងក្រុងស្ទឹងត្រែងលោក ថាវ ប៊ុនថេន បានបញ្ជាក់ថា អាជ្ញាធរនឹងបង្កើនប្រសិទ្ធភាពការងារតាមបណ្តាសង្កាត់ ដោយអនុវត្តយុទ្ធ
សាស្ត្រ “ធ្វើឱ្យដាច់ស្រឡះតាមគោលដៅ” ដើម្បីទុកជាគំរូ។ លោកបានព្រមានចំៗដល់ម្ចាស់ផ្ទះ ដែលយកចិញ្ចើមផ្លូវទៅជួលបន្តឱ្យអាជីវករ និងអ្នកលក់ដូរ ដែលរឹងចចេសមិនព្រមចូលរួមសហការ ។
ជុំវិញផ្សារសាមគ្គីស្ទឹងត្រែង ជាពិសេសប៉ែកខាងជើង ខាងត្បូង និងខាងកើត គឺជាចំណុចក្តៅ ដែលអាជីវករតែងតែលក់រំលោភលើទ្រូងផ្លូវ
។ លោក សឺន មុន្នីរ័ត្ន ប្រធានគណៈអាជីវករផ្សារ បានលើកឡើងថា ទោះមានការណែនាំជាច្រើនលើក ក៏អាជីវករមួយចំនួន នៅតែអនុវត្តតាមតែមួយភ្លែត រួចត្រឡប់មកលក់លើផ្លូវវិញដដែល ។
ដោយឡែក តំណាងអាជីវករ លោកស្រី ហ៊ឹម អ៊ីម បានទទួលស្គាល់កំហុសឆ្គង ប៉ុន្តែបានលើកឡើងពីការលំបាកដោយសារក្នុងផ្សារគ្មានកន្លែងលក់ដូរ និងសុំឱ្យអាជ្ញាធរជួយរៀបចំទីតាំងសមរម្យណាមួយជុំវិញផ្សារ ដើម្បីឱ្យពួកគាត់អាចបន្តរបរចិញ្ចឹមជីវិតបាន ។
បញ្ហាខ្វះកន្លែងលក់នេះ ធ្លាប់ត្រូវបានសម្តេចតេជោ ដោះស្រាយកាលពីឆ្នាំ២០១៦ ដោយទុកកន្លែងឱ្យអ្នកជនបទលក់ដូរបន្លែបង្ការ ប៉ុន្តែដោយសារតម្រូវការកើនឡើង និងទីតាំងចង្អៀត ទើបបណ្តាលឱ្យកើតមានភាពអនាធិបតេយ្យរហូតមកដល់បច្ចុប្បន្ន ។
រដ្ឋបាលក្រុងស្ទឹងត្រែង អំពាវនាវឱ្យអាជីវករទាំងអស់ចូលរួមគោរពច្បាប់សណ្តាប់ធ្នាប់ ដើម្បីលើកកម្ពស់មុខមាត់ខេត្ត និងភាពងាយស្រួលក្នុងការធ្វើដំណើររបស់ប្រជាពលរដ្ឋទូទៅ ៕
ចែករំលែកព័តមាននេះ