ខេត្តបន្ទាយមានជ័យ ៖ តាមប្រភពព័ត៌មានបានឱ្យដឹងថា រាជរដ្ឋាភិបាលកំពុងរកទីតាំងសម្រាប់រៀបចំសាងសង់ជម្រកបណ្តោះអាសន្ន នៅភូមិសាស្ត្រស្រុកអូរជ្រៅ និងស្រុកថ្មពួក ជូនបងប្អូនភៀសឹក នៅខេត្តបន្ទាយមានជ័យ ។ លោក…
ខេត្តបន្ទាយមានជ័យ ៖ តាមប្រភពព័ត៌មានបានឱ្យដឹងថា រាជរដ្ឋាភិបាលកំពុងរកទីតាំងសម្រាប់រៀបចំសាងសង់ជម្រកបណ្តោះអាសន្ន នៅភូមិសាស្ត្រស្រុកអូរជ្រៅ និងស្រុកថ្មពួក ជូនបងប្អូនភៀសឹក នៅខេត្តបន្ទាយមានជ័យ ។
លោក កែវ តារារស្មី អភិបាលស្រុកអូរជ្រៅថ្លែងថា កាលពីថ្ងៃទី១ ខែកុម្ភៈ ឆ្នាំ២០២៦ កន្លងទៅ ឯកឧត្តមទេសរដ្ឋមន្ត្រី គន់ គីម រួមនឹងមន្ត្រីជាច្រើនរូបទៀត បានស្វះស្វែងរកដីសម្រាប់ការសាងសង់ជម្រកជូនដល់បងប្អូនភៀសសឹកស្នាក់នៅជាបណ្តោះអាសន្ន ខណៈដែលមិនទាន់អាចវិលចូលទៅកាន់លំនៅឋានរបស់ពួកគាត់វិញ ដោយសារមិនអាចរស់នៅក្នុងជំរំប្រមូលផ្តុំអ្នកភៀសសឹកបាននិងខ្លះទៀតផ្ទះសម្បែងត្រូវរងការខូចខាតដោយសង្គ្រាម ។
រាជរដ្ឋាភិបាលមានគម្រោងរៀបចំសាងសង់ជម្រកបណ្តោះអាសន្នជូនបងប្អូនភៀសសឹកចំនួន ១ ៥០០គ្រួសារ លើផ្ទៃដី១៥០ហិកតា នៅចំណុចស្នួលទ្រេត ស្ថិតក្នុងភូមិសុភីជើង ឃុំសុភី ស្រុកអូរជ្រៅ ដែលជនភៀសសឹកបានជម្លៀសចេញពីភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ មកស្នាក់នៅក្នុងវត្តចាន់ស៊ីរតនារាម ។
លោក ឃ្លោក នួយ អភិបាលរងខេត្ត ថ្លែងថា បងប្អូនភៀសសឹកនៅខេត្តបន្ទាយមានជ័យ
ដែលកំពុងស្នាក់នៅក្នុងវត្តកណ្តោល ក្នុងស្រុកថ្មពួក និងវត្តចាន់ស៊ីរតនារាម ក្នុងស្រុកអូរជ្រៅ គឺរាជរដ្ឋាភិបាលមានគម្រោងរកទីតាំងដីសម្រាប់រៀបចំសាងសង់ជម្រកបណ្តោះអាសន្នជូន ដែលនៅស្រុកថ្មពួកចំនួន៤ភូមិ ស្មើនឹង១ ៥៤២គ្រួសារ និងស្រុកអូរជ្រៅចំនួន២ភូមិ ស្មើនឹង ១ ២១៣គ្រួសារ ។
លោកអភិបាលរងខេត្តបន្តថា ក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យដែលមានឯកឧត្តម គន់ គីម ទេសរដ្ឋមន្ត្រី អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ និងឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានដឹកនាំក្រុមការងារចុះពិនិត្យទីតាំងដីសម្រាប់រៀបចំសាងសង់ជម្រក ។
បច្ចុប្បន្ន មានប្រជាពលរដ្ឋជិត៤ពាន់គ្រួសារកំពុងស្នាក់នៅតំបន់ភៀសសឹក ព្រោះមិនទាន់ហ៊ានចូលទៅរស់នៅក្នុងលំនៅឋានរបស់ពួកគាត់វិញ ។ លោក ណៃ ពៅ មេឃុំគោករមៀត ថ្លែងថា ប្រជាពលរដ្ឋដែលកំពុងស្នាក់នៅតំបន់ភៀសសឹកនៅវត្តកណ្តោល ក្នុងស្រុកថ្មពួក មានចំនួន២ ៥៥២គ្រួសារ ស្មើនឹងមនុស្សរាយចំនួន៩ ៩៤០នាក់ ដែលរស់នៅក្នុងភូមិចំនួន៩ និងមានផ្ទះចំនួន ២ ២៦៧ខ្នង ក្នុងនោះមាន ភូមិវល្លិប្រេង ភូមិបឹងសុក្រម ភូមិក្តិបថ្ម ភូមិផ្លូវបំបែក ភូមិបន្ទាយមានឫទ្ធិ ភូមិត្រពាំងសំរោង ភូមិសាមគ្គី ភូមិបឹងតាស្រី និងភូមិតាម៉ាំង ។
លោកមេឃុំបន្តថា ក្នុងចំណោមភូមិដែលប្រជាពលរដ្ឋមិនទាន់ហ៊ានចូលទៅរស់នៅក្នុងភូមិលំនៅឋានរបស់ពួកគាត់វិញមានតែ៤ភូមិទេ ដែលត្រូវទាហានថៃហ៊ុមព័ទ្ធយកអស់ទាំងស្រុង ក្នុងនោះមានផ្សារចំនួន២កន្លែង និងផ្ទះចំនួន១ ៣៦៥ខ្នង ប្រជាពលរដ្ឋចំនួន ១ ៥៣៦គ្រួសារ ស្មើនឹងមនុស្សរាយចំនួន ៦ ០៣២នាក់ គឺមាន ភូមិផ្លូវបំបែក ភូមិបន្ទាយមានឫទ្ធិ ភូមិត្រពាំងសំរោង និងភូមិសាមគ្គី ។
លោក ទូច សីហា អភិបាលរងស្រុកអូរជ្រៅថ្លែងថា ដោយឡែកនៅឃុំអូរបីជាន់ ស្រុកអូរជ្រៅ មានភូមិចំនួន២ ដែលប្រជាពលរដ្ឋមិនទាន់ហ៊ានចូលទៅរស់នៅក្នុងលំនៅឋានវិញនៅឡើយ និងកំពុងស្នាក់នៅតំបន់ភៀសសឹកក្នុងវត្តចាន់ស៊ីរតនារាមក្នុង ដែលមានប្រជាពលរដ្ឋចំនួន១ ១០៣គ្រួសារ ក្នុងនោះមាន ភូមិព្រៃចាន់ប្រជាពលរដ្ឋចំនួន ៣០៣គ្រួសារ និងភូមិជោគជ័យចំនួន ៨០០គ្រួសារ ដែលទាហានថៃហ៊ុមព័ទ្ធយកអស់ទាំងស្រុង និងភូមិព្រៃចាន់អស់ជាងពាក់កណ្តាល ៕
ចែករំលែកព័តមាននេះ