ទីក្រុងតូក្យូ៖ ការធ្លាក់ទឹកកកខុសពីធម្មតានៅប្រទេសជប៉ុនបានបណ្ដាលឱ្យមនុស្សយ៉ាងតិច៣០នាក់ស្លាប់ត្រឹមតែរយៈពេល២សប្ដាហ៍កន្លងទៅនេះ។ នេះបើយោងតាមសេចក្ដីប្រកាសរបស់មន្ត្រីរដ្ឋាភិបាលជប៉ុន។ នៅក្នុងចំណោមជនរងគ្រោះទាំងនោះក៏មានលោកយាយចំណាស់ម្នាក់អាយុ៩១ឆ្នាំដេកស្លាប់នៅក្រោមគំនរទឹកកកកម្ពស់បីម៉ែត្រខាងក្រៅផ្ទះរបស់គាត់។
រដ្ឋាភិបាលបានបញ្ជូនកងទ័ពទៅជួយសម្រួលទុក្ខលំបាករបស់ប្រជាជននៅខេត្តអាអូម៉ូរី (Aomori) ដែលកំពុងធ្លាក់ទឹកកកខ្លាំងជាងកន្លែងណាៗទាំងអស់។ នៅទីតាំងខ្លះទឹកកកធ្លាក់ដល់កម្ពស់៤,៥ម៉ែត្រ។ នៅក្នុងស្ថានភាពនេះ នាយករដ្ឋមន្ត្រីជប៉ុន លោកស្រីតាកាអ៊ីឈិ បានកោះប្រជុំពិសេសកាលពីព្រឹកមិញ។ លោកស្រីណែនាំឱ្យមន្ត្រីក្រោមឱវាទចាត់វិធានទាំងអស់ទៅតាមលទ្ធភាពដែលអាចធ្វើទៅបានដើម្បីទប់ស្កាត់ការស្លាប់ និងឧបទ្ទវហេតុផ្សេងៗ។
ខ្យល់ត្រជាក់ដែលប្រមូលផ្ដុំគ្នាច្រើនឡើងៗបានបង្កជាទឹកកកសម្លីធ្លាក់យ៉ាងខ្លាំងនៅតាមតំបន់មាត់សមុទ្រជប៉ុន។ តំបន់ខ្លះមានទឹកកកធ្លាក់ច្រើនជាងរាល់ដងទ្វេមួយជាពីរ។ ចាប់តាំងពីថ្ងៃទី២០ ខែមករារហូតមកដល់ថ្ងៃនេះ មនុស្ស៣០នាក់បានស្លាប់ដោយសារការធ្លាក់ទឹកកក។ នេះបើយោងតាមទីភ្នាក់ងារគ្រប់គ្រងអគ្គិភ័យ និងគ្រោះមហន្តរាយប្រកាសឱ្យដឹង។ មន្ត្រីថ្នាក់មូលដ្ឋានម្នាក់និយាយនៅក្នុងលក្ខខណ្ឌមិនបញ្ចេញឈ្មោះថាលោកយាយដែលស្លាប់នោះឈ្មោះគីណា ជីន (Kina Jiin)រស់នៅខេត្តអាអូម៉ូរី។
នគរបាលជឿជាក់ថាទឹកកកដែលធ្លាក់កកស្រទាប់លើគ្នាកាន់តែច្រើនឡើងៗជាហេតុធ្វើឱ្យដំបូលផ្ទះមិនអាចទ្រទម្ងន់បាន ហើយក៏បាក់សង្កត់ពីលើលោកយាយតែម្ដង។ នៅក្បែរសាកសពរបស់លោកយាយ គេរកឃើញប៉ែលមួយ។ មន្ត្រីដដែលនោះនិយាយបន្តទៀតថានៅពេលសីតុណ្ហភាពឡើងកម្ដៅបន្តិចវិញ ទឹកកកក៏ចាប់ផ្ដើមរលាយ ហើយក៏បង្ហាញសាកសាពរបស់លោកយាយ។
អភិបាលនៃគណៈអភិបាលខេត្តអាអូម៉ូរីថ្លែងថាលោកបានស្នើសុំជំនួយពីពួកយោធាដើម្បីដោះស្រាយទុក្ខលំបាក។ លោកក៏បានស្នើសុំឱ្យពួកគេជួយយកអាសាមនុស្សចាស់ៗដែលរស់នៅម្នាក់ឯងផងដែរ។ លោកថ្លែងថាគ្រោះថ្នាក់ដល់អាយុជីវិតដូចជាគ្រោះថ្នាក់បណ្ដាលមកពីទឹកកកធ្លាក់លើដំបូលផ្ទះ ឬការបាក់អគារជាដើមគឺជាបញ្ហាដែលត្រូវយកចិត្តទុកដាក់ខ្ពស់៕ ប្រភព៖ អាអែហ្វប៉េ (AFP) និងប្រភពដទៃទៀត
ចែករំលែកព័តមាននេះ