អតីតរដ្ឋមន្ត្រីយុត្តិធម៌ចិន ត្រូវបានកា.ត់ទោសឱ្យជាប់ពន្ធនាគារអស់មួយជីវិតពីបទទទួលសំណូក
ប្រទេសចិន ៖ តុលាការប្រជាជនកម្រិតមធ្យមទីក្រុងស៊ាមៀន (Xiamen) ខេត្តហ្វូជាន (Fujian) ភាគខាងកើតប្រទេសចិន កាលពីថ្ងៃទី៣ ខែកុម្ភៈ ឆ្នាំ២០២៦…
ប្រទេសចិន ៖ តុលាការប្រជាជនកម្រិតមធ្យមទីក្រុងស៊ាមៀន (Xiamen) ខេត្តហ្វូជាន (Fujian) ភាគខាងកើតប្រទេសចិន កាលពីថ្ងៃទី៣ ខែកុម្ភៈ ឆ្នាំ២០២៦ បានកាត់ទោសអតីតរដ្ឋមន្ត្រីក្រសួងយុត្តិធម៌ លោក ថាង យីជុន (Tang Yijun) ឱ្យជាប់ពន្ធនាគារអស់មួយជីវិតពីបទទទួលសំណូក។ នេះបើតាមប្រភពពីទីភ្នាក់ងារសារព័ត៌មានចិន ស៊ីនហួ (Xinhua) និង Reuters បានចេញផ្សាយ។
លោក ថាង យីជុន អតីតប្រធានគណៈកម្មាធិការខេត្តជាំងស៊ី (Jiangxi) សន្និសីទប្រឹក្សានយោបាយប្រជាជនចិន ត្រូវបានកាត់ទោសឱ្យជាប់ពន្ធនាគារអស់មួយជីវិតពីបទទទួលសំណូក។ លោក ថាង ក៏ត្រូវបានដកហូតសិទ្ធិនយោបាយសម្រាប់រយៈពេលនៅសល់នៃជីវិតរបស់លោកផងដែរ ហើយទ្រព្យសម្បត្តិផ្ទាល់ខ្លួនក៏នឹងត្រូវរឹបអូស និងប្រាក់ចំណូលខុសច្បាប់នឹងត្រូវដកហូតត្រឡប់មកវិញទាំងអស់ ហើយប្រគល់ទៅឱ្យរតនាគាររដ្ឋ។
តុលាការបានរកឃើញថា លោក ថាង បានទាញយកអត្ថប្រយោជន៍ពីមុខតំណែងផ្សេងៗរបស់លោកចន្លោះឆ្នាំ ២០០៦ ដល់ ២០២២ រួមទាំងមុខតំណែងធំនៅក្នុងខេត្តហ្សឺជាំង (Zhejiang) និងខេត្តលាវនីង (Liaoning) ក៏ដូចជាមុខតំណែងជារដ្ឋមន្ត្រីក្រសួងយុត្តិធម៌ ដើម្បីផ្តល់ផលប្រយោជន៍ដល់អ្នកដទៃនៅក្នុងបញ្ហាដូចជា ការចុះបញ្ជីក្រុមហ៊ុន ការទិញដីឡើងវិញ ប្រាក់កម្ចីធនាគារ និងការដោះស្រាយសំណុំរឿង ព្រមទាំងទទួលយកប្រាក់ និងអំណោយដោយខុសច្បាប់ ដែលមានតម្លៃជាង ១៣៧ លានយ័ន ឬប្រហែល ១៩,៧ លានដុល្លារអាមេរិកជាថ្នូរ។
ការកាត់ទោសនេះ កើតឡើងនៅពេលប្រធានាធិបតីចិន លោក ស៊ី ជីនពីង (Xi Jinping) កំពុងបន្តយុទ្ធនាការប្រឆាំងអំពើពុករលួយយ៉ាងក្តៅគគុក ដែលបានចាប់មន្ត្រីជាន់ខ្ពស់ជាច្រើននាក់ក្នុងរយៈពេលប៉ុន្មានសប្តាហ៍ថ្មីៗនេះ។ អង្គការឃ្លាំមើលអំពើពុករលួយចិន បានថ្លែងកាលពីចុងសប្តាហ៍មុនថា ខ្លួនបានបើកការស៊ើបអង្កេតលោក វ៉ាង ស៊ាងស៊ី (Wang Xiangxi) រដ្ឋមន្ត្រីក្រសួងគ្រប់គ្រងគ្រាអាសន្ន ដែលនេះជាករណីដ៏កម្រមួយ ដែលរដ្ឋមន្ត្រីកំពុងកាន់អំណាចកំពុងស្ថិតនៅក្រោមការស៊ើបអង្កេត។
កាលពីខែមុន ប្រទេសចិនបានប្រកាសថា ឧត្តមសេនីយ៍ថ្នាក់កំពូល លោក ចាង យូជា (Zhang Youxia) កំពុងត្រូវបានស៊ើបអង្កេតរហូតមកដល់បច្ចុប្បន្ន ដែលជាការបោសសម្អាតថ្នាក់ដឹកនាំយោធាជាន់ខ្ពស់បំផុតប្រឆាំងអំពើពុករលួយ៕
ចែករំលែកព័តមាននេះ