សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសថា លោកបានយល់ព្រមលើកិច្ចព្រមព្រៀងពាណិជ្ជកម្មជាមួយនឹងនាយករដ្ឋមន្ត្រីឥណ្ឌា…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសថា លោកបានយល់ព្រមលើកិច្ចព្រមព្រៀងពាណិជ្ជកម្មជាមួយនឹងនាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) ដោយសហរដ្ឋអាមេរិកនឹងបន្ថយពន្ធលើទំនិញឥណ្ឌាពី ២៥ % មកនៅត្រឹម ១៨%។ នេះបើតាមប្រភពពីសារព័ត៌មាន BBC ចេញផ្សាយនៅថ្ងៃទី៣ ខែកុម្ភៈ ឆ្នាំ២០២៦។
នៅក្នុងការបង្ហោះមួយនៅលើបណ្តាញសង្គម Truth Social លោក ត្រាំ បានអះអាងថា ឥណ្ឌានឹងកាត់បន្ថយរបាំងពាណិជ្ជកម្មជាមួយអាមេរិកដល់សូន្យ ហើយក៏នឹងឈប់ទិញប្រេងពីរុស្ស៊ីផងដែរ។ ស្របពេលការពិន័យពន្ធបន្ថែម ២៥% ដែលអាមេរិកដាក់សម្រាប់ការបដិសេធរបស់ឥណ្ឌាក្នុងការឈប់ទិញប្រេងពីរុស្ស៊ីនោះ ក៏នឹងត្រូវលុបចោល។
នៅក្នុងការបង្ហោះ លោក ត្រាំ បានបញ្ជាក់ថា ការហៅទូរស័ព្ទពេលព្រឹកជាមួយលោក ម៉ូឌី រួមមានការពិភាក្សាអំពីពាណិជ្ជកម្ម និងសង្គ្រាមរុស្ស៊ី-អ៊ុយក្រែន។ លោកថា លោក ម៉ូឌី បានយល់ព្រមឈប់ទិញប្រេងពីរុស្ស៊ី និងងាកមកទិញប្រេងបន្ថែមពីសហរដ្ឋអាមេរិក និងអាចមកពីប្រទេសវ៉េណេស៊ុយអេឡាផងដែរ។
លោក ត្រាំ បានបន្ថែមថា តាមសំណើរបស់លោក ម៉ូឌី លោកបានយល់ព្រមភ្លាមៗចំពោះកិច្ចព្រមព្រៀងពាណិជ្ជកម្ម ដែលនឹងឃើញពន្ធគយត្រូវបានបន្ទាប ហើយពន្ធ និងរបាំងមិនមែនពន្ធគយរបស់ឥណ្ឌាត្រូវបានកាត់បន្ថយមកនៅសូន្យ។ លើសពីនេះ លោក ត្រាំ បាននិយាយថា លោក ម៉ូឌី បានប្តេជ្ញាទិញទំនិញអាមេរិកដែលមានតម្លៃជាង ៥០០ ពាន់លានដុល្លារ រួមទាំងថាមពល បច្ចេកវិទ្យា កសិកម្ម និងផលិតផលធ្យូងថ្ម។
ទន្ទឹមជាមួយគ្នានោះ លោក ម៉ូឌី បានប្រកាសនៅលើបណ្តាញសង្គម X ផងដែរថា លោករីករាយដែលកិច្ចព្រមព្រៀងជាមួយសហរដ្ឋអាមេរិកត្រូវបានសម្រេច។
ការប្រកាសនេះ ធ្វើឡើងតិចជាង១សប្តាហ៍បន្ទាប់ពីឥណ្ឌា និងសហភាពអឺរ៉ុប (EU) បានប្រកាសពីកិច្ចព្រមព្រៀងពាណិជ្ជកម្មដ៏សំខាន់មួយ ដោយបានបិទបញ្ចប់ការចរចាអស់ពេលជិត ២ ទសវត្សរ៍។
សូមជម្រាបថា ទំនាក់ទំនងពាណិជ្ជកម្មរវាងសហរដ្ឋអាមេរិក និងឥណ្ឌាមានភាពតានតឹង ចាប់តាំងពីសហរដ្ឋអាមេរិកបានដាក់ពន្ធគយ ៥០% លើទំនិញពីឥណ្ឌា ដែលជាចំនួនខ្ពស់បំផុតសម្រាប់ប្រទេសនៅអាស៊ីមួយនេះ កាលពីខែសីហា ឆ្នាំមុន រួមទាំងការដាក់ពិន័យពន្ធ ២៥% របស់អាមេរិកដែលទាក់ទងនឹងការទិញប្រេងរបស់ឥណ្ឌាពីរុស្ស៊ី៕
ចែករំលែកព័តមាននេះ