សហរដ្ឋអាម៉េរិក៖អាកាសធាតុត្រជាក់កកដល់ឆ្អឹងដែលកំពុងគ្របដណ្ដប់ទីក្រុងញូវយ៉កអស់រយៈពេលមួយសប្តាហ៍មកនេះ បានបណ្ដាលឱ្យមនុស្សយ៉ាងហោចណាស់ ១៤ នាក់បាត់បង់ជីវិតនៅតាមទីសាធារណៈ ដែលក្នុងនោះ ៨ នាក់ត្រូវបានបញ្ជាក់ថា ស្លាប់ដោយសារស្ថានភាពចុះកម្ដៅក្នុងរាងកាយខ្លាំង។ នេះបើយោងតាម​សារព័ត៌មាន Xinhua និងប្រភពផ្សេងទៀត ចុះផ្សាយនៅថ្ងៃទី២ ខែមករានេះ។

ដើម្បីទប់ទល់នឹងស្ថានភាពដ៏អាក្រក់នេះ អាជ្ញាធរក្រុងបានប្រើប្រាស់អំបិលរហូតដល់ ១៨៨ លានផោន ដើម្បីរំលាយទឹកកកនៅលើផ្លូវថ្នល់ និងបានដាក់ចេញនូវវិធានការសង្គ្រោះជាបន្ទាន់ ដោយការរៀបចំមជ្ឈមណ្ឌលផ្ដល់ភាពកក់ក្ដៅ និងរថយន្តក្រុងចល័តសម្រាប់ជួយដល់ជនអនាថា ដែលកំពុងប្រឈមមុខនឹងគ្រោះថ្នាក់បំផុត។

​សោកនាដកម្មនេះបានកើតឡើងបន្ទាប់ពីព្យុះរដូវរងាដ៏កំណាចមួយ បានវាយប្រហារទីក្រុងញូវយ៉កកាលពីថ្ងៃទី២៥ ខែមករា ដោយបានបង្កឱ្យមានការធ្លាក់ទឹកកកក្នុងកម្រិតកំណត់ត្រាដែលមិនធ្លាប់មានពីមុនមក។ ស្ថានភាពនេះបានប្រែក្លាយទីក្រុងដ៏មមាញឹកមួយនេះ ឱ្យទៅជាតំបន់គ្រោះថ្នាក់ ដោយសារផ្លូវថ្នល់ និងចិញ្ចើមផ្លូវពោរពេញដោយភក់ទឹកកកដែលរអិល និងត្រជាក់ខ្លាំង។ ចំនួនអ្នកស្លាប់ក្នុងឆ្នាំនេះ បានបង្កឱ្យមានការជជែកដេញដោលយ៉ាងខ្លាំងអំពីប្រសិទ្ធភាពនៃប្រព័ន្ធគ្រប់គ្រងទីជម្រកសម្រាប់ជនអនាថា ខណៈដែលរដ្ឋបាលក្រុងថ្មីកំពុងព្យាយាមបង្កើនចំនួនមជ្ឈមណ្ឌលសង្គ្រោះចល័ត ដើម្បីកាត់បន្ថយចំនួនជនរងគ្រោះបន្ថែមទៀត៕