សុខភាព៖ យោងតាមការផ្សាយរបស់សារព័ត៌មានបរទេស ការជ្រើសរើសរវាងតែ និងកាហ្វេនៅពេលព្រឹក គឺអាស្រ័យលើគោលដៅផ្ទាល់ខ្លួន និងប្រតិកម្មនៃរាងកាយរបស់អ្នកចំពោះជាតិកាហ្វេអ៊ីន ព្រោះភេសជ្ជៈទាំងពីរនេះសុទ្ធតែសម្បូរទៅដោយសារធាតុប្រឆាំងអុកស៊ីតកម្មដែលទ្រទ្រង់ខួរក្បាល បេះដូង និងប្រព័ន្ធមេតាប៉ូលីស។

កាហ្វេ គឺជាជម្រើសដ៏វិសេសសម្រាប់អ្នកដែលត្រូវការភាពស្វាហាប់ខ្លាំងភ្លាមៗ និងការផ្ដោតអារម្មណ៍ខ្ពស់ ព្រមទាំងជួយដល់ដំណើរការបន្សាបជាតិពុលក្នុងថ្លើម។ ទោះជាយ៉ាងណាក៏ដោយ កាហ្វេអាចបង្កឱ្យមានអារម្មណ៍ភ័យអរ ឬប៉ះពាល់ដល់ប្រព័ន្ធរំលាយអាហារចំពោះអ្នកដែលងាយរងគ្រោះជាមួយជាតិកាហ្វេអ៊ីន។

​ផ្ទុយទៅវិញ តែ (ជាពិសេសតែបៃតង និងតែខ្មៅ) ផ្ដល់នូវថាមពលបែបស្រទន់ និងយូរអង្វែងជាង ដោយសារសារធាតុ L-theanine ដែលជួយឱ្យស្មារតីភ្លឺស្វាងដោយមិនបង្កឱ្យមានអារម្មណ៍ញ័រទ្រូង ឬកើនឡើងអ័រម៉ូនស្រ្តេស​ខ្លាំងក្លាដូចកាហ្វេឡើយ។ តែគឺជាជម្រើសដ៏ល្អសម្រាប់អ្នកដែលចង់រក្សាតុល្យភាពអ័រម៉ូន សុខភាពពោះវៀន ឬអ្នកដែលមានអារម្មណ៍តានតឹងនៅពេលក្រោកពីគេង។

អ្នកជំនាញអាហារូបត្ថម្ភបានបញ្ជាក់ថា មិនមានភេសជ្ជៈណាមួយល្អដាច់គេនោះទេ ព្រោះអត្ថប្រយោជន៍ចុងក្រោយគឺអាស្រ័យលើរបៀបរស់នៅទាំងមូលរបស់អ្នក។ គន្លឹះសំខាន់គឺត្រូវស្ដាប់សញ្ញារបស់រាងកាយ៖ បើអ្នកចង់បានកម្លាំងខ្លាំងក្លា ចូរជ្រើសរើសកាហ្វេ ប៉ុន្តែបើអ្នកចង់បានភាពស្ងប់ស្ងាត់និងស្មារតីផ្ដោតបានយូរ ចូរជ្រើសរើសតែ។ ការប្ដូរចុះឡើងរវាងភេសជ្ជៈទាំងពីរនេះ ក៏មិនបង្កឱ្យមានផលប៉ះពាល់អវិជ្ជមានអ្វីដល់សុខភាពយូរអង្វែងនោះដែរ​៕