ហាណូយ ៖ ខណៈពេលដែលការទទួលទានស៊ុបហតផត ស៊ុបស៊ីឈាន់ កំពុងមានភាពពេញនិយមយ៉ាងខ្លាំងពីសំណាក់យុវវ័យ និងក្រុមគ្រួសារ មិនថា ឡើយនៅកម្ពុជា ឬនៅបណ្តាប្រទេសជិតខាងនោះទេ ប៉ុន្តែនៅពីក្រោយរសជាតិដ៏ឈ្ងុយឆ្ងាញ់…
ហាណូយ ៖ ខណៈពេលដែលការទទួលទានស៊ុបហតផត ស៊ុបស៊ីឈាន់ កំពុងមានភាពពេញនិយមយ៉ាងខ្លាំងពីសំណាក់យុវវ័យ និងក្រុមគ្រួសារ មិនថា ឡើយនៅកម្ពុជា ឬនៅបណ្តាប្រទេសជិតខាងនោះទេ ប៉ុន្តែនៅពីក្រោយរសជាតិដ៏ឈ្ងុយឆ្ងាញ់ និងភាពទាក់ទាញនៃទឹកស៊ុបទាំងនោះ ក៏មានការលួចលាក់ចែកចាយនូវគ្រឿងផ្សំខូចគុណភាព ដែលបង្កគ្រោះថ្នាក់ដល់សុខភាពយ៉ាងធ្ងន់ធ្ងរផងដែរ ។
ជាក់ស្តែងថ្មីៗនេះ សមត្ថកិច្ចក្រុងហាណូយ បានវាយលុកបង្ក្រាបឃ្លាំងស្តុកគ្រឿងផ្សំស៊ុប និងសាច់បង្កកខូចគុណភាព សរុបជាង៧៦តោន ដែលត្រៀមនឹងចែកចាយលើទីផ្សារក្នុងឱកាសបុណ្យចូលឆ្នាំថ្មីប្រពៃណីចិនដែលខិតជិតមកដល់ ។
ប្រភពពីសារព័ត៌មានវៀតណាម បានឱ្យដឹងថា កាលពីថ្ងៃទី៣០ ខែមករា ឆ្នាំ២០២៦ នាយកដ្ឋាននគរបាលសេដ្ឋកិច្ចក្រុងហាណូយ សហការជាមួយផ្នែកគ្រប់គ្រងទីផ្សារ បានចុះឆែកឆេរទីតាំងផលិតរបស់ក្រុមហ៊ុន BBB Thăng Long ស្ថិតក្នុងតំបន់ឧស្សាហកម្ម Nam Thăng Long។
ជាលទ្ធផល សមត្ថកិច្ចបានរកឃើញ និងដកហូតទំនិញល្មើសច្បាប់ចំនួន១,១៤១ មុខ (ស្មើនឹងប្រមាណ១,៥ តោន) ដែលជាប្រភេទគ្រឿងផ្សំស៊ុបហតផល ទឹកម្ទេស និងទឹកជ្រលក់ផ្សេងៗ… ដែលនាំចូលពីក្រៅប្រទេស និងគ្មានឯកសារបញ្ជាក់ប្រភពច្បាស់លាស់។ ក្រៅពីគ្រឿងផ្សំ កម្លាំងសមត្ថកិច្ចក៏បានរឹបអូសសាច់កែច្នៃរួចចំនួន៥០០គីឡូក្រាម បន្ថែមទៀត ដែលមិនមានស្តង់ដារសុវត្ថិភាពចំណីអាហារ ។
យ៉ាងណាមិញ ការរឹបអូសគ្រឿងផ្សំស៊ុបហតផលរបស់នៅក្រុមហ៊ុន BBB Thăng Long គឺជាផ្នែកមួយនៃយុទ្ធនាការទ្រង់ទ្រាយធំ នៅទីក្រុងហាណូយ ដែលសមត្ថកិច្ចបានរកឃើញអាហារខូចគុណភាពសរុបជាង៧៦តោន ក្នុងរយៈពេលប៉ុន្មានថ្ងៃចុងក្រោយនេះ ដោយរួមមាន ៖
១. គ្រឿងក្នុងជ្រូកស្អុយរលួយជាង៦០ តោន ៖ កាលពីថ្ងៃទី២៩ មករា សមត្ថកិច្ចបានឆែកឆេរក្រុមហ៊ុន Dũng Phát ដោយរកឃើញគ្រឿងក្នុងជ្រូកបង្កកទុកចោល ពី ៤ទៅ ៦ ខែរហូតដល់ប្រែពណ៌ និងជះក្លិនស្អុយ សរុបជិត៦៤ តោន (ទាំងគ្រឿងក្នុងឆៅ និងកែច្នៃរួច) ។
២. ពងមាន់ និងឆ្អឹងមាន់ខ្ចី ១២,៣ តោន ៖ កាលពីថ្ងៃទី២៩ មករា សមត្ថកិច្ចបានស្ទាក់ចាប់រថយន្តកុងតឺន័រ ៣គ្រឿងដែលដឹកពងមាន់ និងឆ្អឹងខ្ចី ដែលមិនមានឯកសារត្រឹមត្រូវ និងមិនធានាអនាម័យ ។ បច្ចុប្បន្ន វត្ថុតាងដែលជាចំណីអាហារខូចគុណភាព និងគ្រឿងផ្សំស៊ុបទាំងអស់ត្រូវបានដកហូត ដើម្បីបំផ្លាញចោល និងបន្តនីតិវិធីច្បាប់ចំពោះម្ចាស់ទីតាំងដែលពាក់ព័ន្ធ ។
អាជ្ញាធរបានអំពាវនាវដល់ប្រជាពលរដ្ឋឱ្យមានការប្រុងប្រយ័ត្នខ្ពស់ក្នុងការជ្រើសរើសទិញគ្រឿងឧបភោគបរិភោគ ជាពិសេសគ្រឿងផ្សំអាហារដែលនាំចូលពីបរទេស និងសាច់បង្កកដែលមិនមានប្រភពច្បាស់លាស់ ដើម្បីជៀសវាងគ្រោះថ្នាក់ដល់សុខភាពក្នុងអំឡុងពេលបុណ្យទានខាងមុខនេះ៕
ចែករំលែកព័តមាននេះ