កម្ពុជាត្រូវប្រយ័ត្នរឿងកាហ្វេក្លែងក្លាយវៀតណាមឆ្មក់ចូលមកកាន់ប្រទេសកម្ពុជា ពីព្រោះវៀតណាមបានរកឃើញ និងបង្ក្រាបការផលិតកាហ្វេក្លែងក្លាយ ។ ក្រសួងសន្តិសុខសាធារណៈវៀតណាមបានប្រកាស កាលពីថ្ងៃព្រហស្បតិ៍ថា ប៉ូលិសវៀតណាមបានបើកការស៊ើបអង្កេតព្រហ្មទណ្ឌមួយទៅលើឃ្លាំងមួយដែលត្រូវបានចោទប្រកាន់ ពីបទផលិតកាហ្វេក្លែងក្លាយដែលផលិតពីសណ្តែកសៀង បន្ទាប់ពីការឆ្មក់ចូលកាលពីដើមសប្តាហ៍នេះ ។…
កម្ពុជាត្រូវប្រយ័ត្នរឿងកាហ្វេក្លែងក្លាយវៀតណាមឆ្មក់ចូលមកកាន់ប្រទេសកម្ពុជា ពីព្រោះ
វៀតណាមបានរកឃើញ និងបង្ក្រាបការផលិតកាហ្វេក្លែងក្លាយ ។
ក្រសួងសន្តិសុខសាធារណៈវៀតណាមបានប្រកាស កាលពីថ្ងៃព្រហស្បតិ៍ថា ប៉ូលិសវៀតណាមបានបើកការស៊ើបអង្កេតព្រហ្មទណ្ឌមួយទៅលើឃ្លាំងមួយដែលត្រូវបានចោទប្រកាន់ ពីបទផលិតកាហ្វេក្លែងក្លាយដែលផលិតពីសណ្តែកសៀង បន្ទាប់ពីការឆ្មក់ចូលកាលពីដើមសប្តាហ៍នេះ ។ នេះបើតាមសេចក្តីរាយការណ៍របស់សារព័ត៌មានVN Express។
ក្រសួងនេះបាននិយាយនៅក្នុងសេចក្តីថ្លែងការណ៍មួយថា ប៉ូលិសបានរឹបអូសផលិតផលកាហ្វេក្លែងក្លាយចំនួន៤,១តោន និងវត្ថុធាតុដើមចំនួន៣តោនក្នុងអំឡុងពេលឆ្មក់ចូល ដែលបានធ្វើឡើងនៅក្នុងខេត្តឡាំដុងនៃតំបន់ខ្ពង់រាបកណ្តាល ។
យោងតាមសេចក្តីថ្លែងការណ៍ លោក លួង វៀតគៀម ម្ចាស់ឃ្លាំងបានសារភាពចំពោះប៉ូលិសថា ក្រុមហ៊ុនរបស់គាត់បានលាយសណ្តែកសៀង និងរសជាតិជាមួយគ្រាប់កាហ្វេ ដើម្បីផលិតកាហ្វេកិនសម្រាប់ទីផ្សារក្នុងស្រុក ។ ប៉ូលិសបាននិយាយថា ការឆ្មក់ចូលឃ្លាំងនេះបានកើតឡើងបន្ទាប់ពីការឆែកឆេរនៅថ្ងៃអង្គារ៍លើឡានដឹកទំនិញមួយគ្រឿងដែលដឹកកាហ្វេកិនចំនួន១.០៥៦ថង់ ដែលមានទម្ងន់៥២៨គីឡូក្រាម ដែលមិនមានឯកសារភ្ជាប់មកជាមួយ ។
លោក ឃ្ចៀន ក្វាងធឹ ពាណិជ្ជករកាហ្វេម្នាក់ដែលមានទីតាំងនៅដាឡាត់បានលើកឡើងថា ផលិតផលកាហ្វេក្លែងក្លាយមិនមែនជារឿងកម្រនោះទេ ហើយវាអាចផលិតពីសណ្តែកសៀង ឬពោត ឬសូម្បីតែទាំងពីរ ។ លោកបានអះអាងថា សណ្តែកសៀង និងពោតអាចបរិភោគបាន និងមានតម្លៃថោកជាងគ្រាប់កាហ្វេពិត ប៉ុន្តែអ្នកណាដឹងថា វាមានសុវត្ថិភាពសម្រាប់សុខភាព ក្នុងការផឹកផលិតផលកាហ្វេក្លែងក្លាយទាំងនេះ ឬអត់ ។
កាលពីឆ្នាំ២០១៨ ប៉ូលិសនៅតំបន់ខ្ពង់រាបកណ្តាលវៀតណាមដដែលនេះ បានចាប់ខ្លួនមនុស្ស៥នាក់ដែលសង្ស័យថា បានប្រើប្រាស់សារធាតុគីមីពីថ្មពិល ដើម្បីជ្រលក់ពណ៌គ្រាប់កាហ្វេក្លែងក្លាយនេះ ។
ចែករំលែកព័តមាននេះ