រាជធានីភ្នំពេញ ៖ ស្ត្រីអត់សាច់ញាតិម្នាក់បានសម្រាលកូនដោយខ្លួនឯង​​ក្នុងសួនច្បារ បង្កការភ្ញាក់​ផ្អើលដល់ប្រជា​ពលរដ្ឋរាយការណ៍ជូនសមត្ថកិច្ចមូលដ្ឋានហៅរថយន្តសាមុយនិងក្រុមគ្រូពេទ្យមកទទួលយកទៅសង្គ្រោះ កាលពីម៉ោង៤ទៀបភ្លឺ​ថ្ងៃទី២ ខែមករា ឆ្នាំ២០២៦ នៅលើសួនច្បារក្បែរវត្តភ្នំ ផ្លូវ៦៩ សង្កាត់វត្តភ្នំ ខណ្ឌដូនពេញ ។

តាម​ប្រភពព័ត៌មានបានអោយដឹងថា ស្ត្រីខាងលើមិនដឹងថា មានសាច់ញាតិនៅទីណាអោយប្រាកដនោះទេ លុះដល់ម៉ោង​​កើតហេតុ​ មាន​ប្រជា​ពលរដ្ឋដែលធ្វើដំណើរឆ្លងកាត់នៅទីនោះបានឮសំឡេង​ក្មេងយំ ដោយមានការងឿងឆ្ងល់ក៏ដើររកមើល ស្រាប់តែប្រទះឃើញស្ត្រីខាងលើបានដេកឆ្លងទន្លេតែម្ដងឯងនៅលើសួនច្បារក្បែរវត្តភ្នំ ដោយបានកូនស្រីម្នាក់ផងដែរ ។

​តាមប្រភពព័ត៌មានបានបន្តថា ក្រោយឃើញស្ថានភាពបែបនេះ ប្រជា​ពលរដ្ឋក៏​បានរាយការណ៍ជូនកម្លាំងសមត្ថកិច្ចមូលដ្ឋានចុះទៅពិនិត្យកន្លែងកើតហេតុ បាន​ឃើញពិតប្រាកដ​ថាមានស្ត្រីម្នាក់ឆ្លងទន្លេតែម្នាក់ឯងពិតមែន ទើបទាក់ទងហៅរថយន្តសាមុយរបស់មន្ទីរពេទ្យ អោយក្រុមគ្រូពេទ្យ​ជួយ​សង្គ្រោះ​ស្ត្រីជាម្តាយនិងទារិកា យកទៅមន្ទីរពេទ្យបង្អែកចតុមុខ ៕