ទីក្រុងហ្សាកាតា៖ បណ្ដាញសង្គមប្រហែលជាមិនស័ក្ដិប៉ុន្មានទេសម្រាប់កុមារមិនទាន់គ្រប់អាយុ។ ជាពិសេស ប្រសិនបើពួកគេប្រើប្រាស់នៅក្នុងផ្លូវខុស ឬក៏ចំណាយពេលប្រើប្រាស់បណ្ដាញនេះច្រើនពេករហូតដល់ភ្លេចដេក ភ្លេចពួន និងភ្លេចការរៀនសូត្រ។ បើប្រើប្រាស់ចំគោលដៅ និងមានប្រយោជន៍មិនអីទេ។ ប្រសិនបើពួកគេប្រើប្រាស់ពាក់ព័ន្ធនឹងការរៀនសូត្រមុខវិជ្ជាដែលរៀននៅសាលា។…
ទីក្រុងហ្សាកាតា៖ បណ្ដាញសង្គមប្រហែលជាមិនស័ក្ដិប៉ុន្មានទេសម្រាប់កុមារមិនទាន់គ្រប់អាយុ។ ជាពិសេស ប្រសិនបើពួកគេប្រើប្រាស់នៅក្នុងផ្លូវខុស ឬក៏ចំណាយពេលប្រើប្រាស់បណ្ដាញនេះច្រើនពេករហូតដល់ភ្លេចដេក ភ្លេចពួន និងភ្លេចការរៀនសូត្រ។ បើប្រើប្រាស់ចំគោលដៅ និងមានប្រយោជន៍មិនអីទេ។ ប្រសិនបើពួកគេប្រើប្រាស់ពាក់ព័ន្ធនឹងការរៀនសូត្រមុខវិជ្ជាដែលរៀននៅសាលា។ ឧទាហរណ៍ បើកមើលការបង្រៀនអង់គ្លេស គណិតវិទ្យា រូបវិទ្យា។ល។ តាមយូធូប ឬហ្វេសប៊ុក រឹតតែធ្វើឱ្យរីកចម្រើន។ ប៉ុន្តែបើក្មេងៗបើកមើលគេជេរបញ្ចោរគ្នាតាមអនឡាញ វានឹងក្លាយជាគំរូអាក្រក់បំផុតសម្រាប់ពួកគេ។
បញ្ហាបណ្ដាញសង្គមនេះមិនលេងសើចទេ ប្រទេសអូស្ត្រាលីទើបតែអនុម័តច្បាប់ថ្មីហាមក្មេងក្រោមអាយុ១៦ឆ្នាំប្រើប្រាស់បណ្ដាញសង្គម។ ក្រោយមក ប្រទេសមួយចំនួននៅអឺរ៉ុបក៏ចាប់ផ្ដើមគិតគូរអំពីបញ្ហានេះផងដែរ។ ថ្ងៃនេះ ប្រទេសឥណ្ឌូណេស៊ីចុះហត្ថលេខាលើបទបញ្ញត្តិរបស់រដ្ឋាភិបាលដើម្បីហាមក្មេងក្រោមអាយុ១៦ឆ្នាំប្រើប្រាស់បណ្ដាញសង្គម។ បើដូច្នេះមែន ឥណ្ឌូណេស៊ីជាប្រទេសទីមួយនៅអាស៊ីអាគ្នេយ៍ដែលចេញច្បាប់នេះ។ នេះបើយោងតាមរដ្ឋមន្ត្រីក្រសួងទំនាក់ទំនង និងឌីជីថល លោកស្រីមូត្យា ហាហ្វីត (Meutya Hafid)។
លោកស្រីទើបតែចុះហត្ថលេខាលើបទបញ្ញត្តិរបស់រដ្ឋាភិបាលដើម្បីកំណត់ថាក្មេងក្រោមអាយុ១៦ឆ្នាំមិនអនុញ្ញាតឱ្យមានខ្ទង់គណនី (account) ចូលទៅប្រើប្រាស់បណ្ដាញសង្គមដែលផ្ដល់ផលអាក្រក់សម្រាប់អនាគតរបស់ពួកគេទេ។ ក្នុងនោះមានយូធូប, ទីកតុក, ហ្វេសប៊ុក, អ៊ីនស្តាក្រាម, ស្រិត (Threads), អ៊ិច (X), ប៊ីហ្គោឡាយ (Bigo Live) និងរ៉ូប្លក់ (Roblox)។ បទបញ្ញត្តិនេះនឹងអនុវត្តជាបណ្ដើរៗចាប់ពីថ្ងៃទី២៨ ខែមីនារហូតដល់បណ្ដាញសង្គមទាំងនេះបំពេញគ្រប់កាតព្វកិច្ចរបស់ខ្លួន១០០%។
លោកស្រីហាហ្វីតថ្លែងថាគោលការណ៍របស់យើងគឺច្បាស់លាស់ណាស់។ កុមារតូចៗរបស់យើងកំពុងប្រឈមនឹងការគំរាមកំហែងកាន់តែខ្លាំងឡើងៗ។ រាប់ចាប់តាំងពីលទ្ធភាពទទួលបានរូប, វីឌីអូ ឬភាសាអាសអាភាស, ការគំរាមតាមអនឡាញ, ការឆបោកតាមអនឡាញ។ ហើយអ្វីដែលសំខាន់បំផុតនោះគឺការញៀននឹងប្រើប្រាស់បណ្ដាញសង្គម។ តាមពិត ញៀនផ្លូវកាយដូចជាញៀនគ្រឿងញៀនអាចផ្ដាច់បាន។ ប៉ុន្តែញៀនផ្នែកផ្លូវចិត្តមិនងាយផ្ដាច់បាន ឬផ្ដាច់មិនបានតែម្ដង។
លោកស្រីហាហ្វីតថ្លែងថាកាលពីមុននេះអ្នកអាណាព្យាបាល ឬឪពុកម្ដាយរបស់ក្មេងខំតស៊ូតែម្នាក់ឯងដើម្បីប្រយុទ្ធប្រឆាំងនឹងឥទ្ធិពលអាក្រក់របស់បណ្ដាញសង្គមមកលើកូនៗរបស់ពួកគេ។ ប៉ុន្តែពេលនេះ ពួកគេមិននៅតែឯងទៀតទេ។ ពួកគេមានរដ្ឋាភិបាលចាំជួយជ្រោមជ្រែងពីក្រោយខ្នង។ រដ្ឋាភិបាល (ឥណ្ឌូណេស៊ី) ចាត់វិធានការនេះជាផ្នែកមួយនៃកិច្ចខិតខំប្រឹងប្រែងដើម្បីទប់ទល់នឹងការពង្រីកឥទ្ធិពលកាន់តែធំឡើងៗរបស់ប្រព័ន្ធឌីជីថលទៅលើអនាគតរបស់កុមារ៕ ប្រភព៖ អារ៉ាប់ ញូស៍ (Arab News) និងប្រភពដទៃទៀត
ចែករំលែកព័តមាននេះ