ខេត្តកំពង់ចាម ៖ គិតរហូតមកដល់ថ្ងៃទី៦ មីនា ឆ្នាំ២០២៦ កម្លាំងសមត្ថកិច្ចមិនទាន់ស្រាវជ្រាវរកឃើញអ្នករើសកាបូបលុយនៅក្នុងបន្ទប់ទឹកផ្សារសាមគ្គី(ផ្សារសាលាចិន) ស្ថិតក្នុងសង្កាត់កំពង់ចាម ក្រុងកំពង់ចាមនៅឡើយទេ។ ដែលគិតមកដល់ពេលនេះគឺរយៈពេលលើសពី ២ខែហើយ…
ខេត្តកំពង់ចាម ៖ គិតរហូតមកដល់ថ្ងៃទី៦ មីនា ឆ្នាំ២០២៦ កម្លាំងសមត្ថកិច្ចមិនទាន់ស្រាវជ្រាវរកឃើញអ្នករើសកាបូបលុយនៅក្នុងបន្ទប់ទឹកផ្សារសាមគ្គី(ផ្សារសាលាចិន) ស្ថិតក្នុងសង្កាត់កំពង់ចាម ក្រុងកំពង់ចាមនៅឡើយទេ។ ដែលគិតមកដល់ពេលនេះគឺរយៈពេលលើសពី ២ខែហើយ ជាមួយនោះម្ចាស់កាបូបគាត់មានសង្ឃឹមភាគរយតិចណាស់ដែលនឹងរកឃើញវិញ ព្រោះថាស្ទើរពេញមួយជីវិតទៅហើយដែលប្រឹងសន្សំលុយតាំងពីបាតដៃទទេ ដោយដាក់លុយនឹងគ្រឿងអលង្ការក្នុងកាបូបតាមខ្លួនសរុបជាង៥០០០ដុល្លារ។មិនដឹងថាតើគាត់ត្រូវចំណាយពេលប៉ុន្មានឆ្នាំទៀតដើម្បីឲ្យបានលុយដូចដើមនោះ។
ស្ត្រីអាជីវករឈ្មោះស៊ុន ប៊ុនធី អាយុ៦៧ ឆ្នាំ មានទីលំនៅក្នុងសង្កាត់កំពង់ចាមក្រុងកំពង់ចាម ជាអ្នកលក់បង្អែមនៅផ្សារសាមគ្គីបានរៀបរាប់ថា មានកម្លាំងនគរបាលជាច្រើនអ្នកបាននាំគ្នាមកសួរនាំគាត់ដល់តូបលក់ដូរនៅក្នុងផ្សារ ដោយនិយាយនៅពាក្យសមរម្យគួរឱ្យគោរពគឺចង់ដឹងពីការភ្លេចបាត់កាបូបលុយក្នុងបន្ទប់ទឹកផ្សារសាមគ្គី ក្នុងគោលបំណងស្រាវជ្រាវរកមុខអ្នករើសកាបូបលុយ។ហើយបើគិតចាប់តាំងពីពេលដែលភ្លេចកាបូបក្នុងបន្ទប់ទឹកផ្សារសាមគ្គីរហូតមកដល់ពេលនេះលើស២ខែហើយ នៅមិនទាន់ឃើញអ្នករើសបានស្ម័គ្រចិត្តយកមកប្រគល់ជូនគាត់ ក្នុងករណីកម្លាំងសមត្ថកិច្ចចុះស្រាវជ្រាវបើរកឃើញនោះអ្នករើសបានអាចត្រូវមានទោសទៀតផង។
គួររំលឹកថា ពេលដែលគាត់កំពុងតែអង្គុយលក់បង្អែមនៅក្នុងតូបរបស់គាត់គ្រានោះនៅវេលាម៉ោងប្រហែល១២ ថ្ងៃត្រង់ បានដើរទៅបត់ជើងតូចនៅបន្ទប់ទឹកចម្ងាយពីកន្លែងលក់ប្រមាណ៥០ម៉ែត្រ ពេលចូលទៅគាត់បានយកកាបូបស្ពាយនិងស្មាដោយដាក់ព្យួរជញ្ជាំងហើយក៏ប្រញាប់មកកន្លែងលក់វិញ។
អាជីវកររូបនេះបានរៀបរាប់ស្ទើរតែបង្ហូរទឹកភ្នែកឲ្យដឹងទៀតថា ស្របពេលមកដល់អង្គុយលាងចានក្នុងតូបលក់ដូរវិញបានបន្តិចស្រាប់តែមានគេមកទិញបង្អែមគាត់មួយចាន ពេលស្ទាបនិងចង្កេះមិនឃើញកាបូប ទើបដឹងថាភ្លេចនៅបន្ទប់ទឹករួចក៏រត់ទៅមើលតែមិនឃើញកាបូបនោះទេ មិនដឹងអ្នកណារើសបានឬយកចេញទៅ។ ចំពោះទ្រព្យដែលមាននៅក្នុងកាបូបនោះមានប្រាក់ដុល្លារចំនួន៧៥០ដុល្លារ លុយខ្មែរ៥០ម៉ឺនរៀល ខ្សែក ខ្សែដៃ ជាងមួយដំឡឹងសរុបគិតជាលុយប្រមាណជាង ៥០០០ដុល្លារ។
ជារៀងរាល់ថ្ងៃគាត់ពុំដែលទុកបូបដាក់លុយនៅនឹងផ្ទះនោះទេ ព្រោះមិនមានសុវត្ថិភាព ជានិច្ចកាលតែងតែយកជាប់តាមខ្លួន។ចំពោះលុយដែលលក់បានសន្សំទិញមាសម្ដងមួយហ៊ុនគឺប្រឹងសន្សំទម្រាំបានប៉ុណ្ណឹងគឺជាង ២០ឆ្នាំមកហើយ ថ្ងៃដែលបាត់កាបូបនោះគឺថ្ងៃទី៥មករា ឆ្នាំ២០២៦ គាត់បានយំហូរទឹកភ្នែកសោកស្ដាយរបស់ទ្រព្យមិនគួរណាបាត់បែបនេះសោះព្រោះជាស្ត្រីមេម៉ាយមានកូនបីនាក់ ដោយរាល់ថ្ងៃនេះគឺនៅជាមួយកូនប្រុសម្នាក់
ហើយផ្ទះដែលគាត់ទិញគឺនៅក្រោយធនាគារឯកជនមួយកន្លែងក្នុងសង្កាត់កំពង់ចាម ចម្ងាយពីផ្សារសាមគ្គីមកផ្ទះប្រហែលជា៣០០ម៉ែត្រ។ បន្ទាប់ពីបាត់ហើយគាត់បានប្រាប់គណៈអាជីវករផ្សារឈ្មោះប៉ុន ក៏ទូរសព្ទទៅប្រធានគណៈអាជីវករផ្សារឈ្មោះតាថុង ពេលដែលទូរសព្ទចូលគាត់លើកនិយាយថាចេញមកផ្ទះហើយមិនមកផ្សារវិញទេ។
ស្ត្រីអាជីវករលក់ដូររូបនេះបានបញ្ជាក់ថាប្រធានគណៈអាជីវករផ្សារគឺមិនបានត្រឡប់មកផ្សារ ដើម្បីប្រកាសតាមមេក្រូដើម្បីឱ្យអាជីវករលក់ដូរក្នុងផ្សារទាំងអស់មានអ្នកណាដែលរើសបានកាបូបលុយរបស់គាត់ សូមមេត្តាយកមកប្រគល់ជូនម្ចាស់វិញ។ គិតទៅស្ទើរពេញមួយជីវិតទម្រាំសន្សំលុយបានបែបនេះ ដូច្នេះគាត់ត្រូវចាប់ផ្ដើមប្រឹងសន្សំឡើងវិញហើយណាមួយចាស់ទៅហើយមិនដឹងថាតើត្រូវប្រើពេលប៉ុន្មានឆ្នាំតទៅមុខទៀត ៕
ចែករំលែកព័តមាននេះ