សុខភាព៖ យោងតាមការផ្សាយរបស់សារព័ត៌មានបរទេស ការទទួលទានកាហ្វេ និងតែលាយគ្នា ឬញ៉ាំទន្ទឹមគ្នាក្នុងពេលតែមួយ គឺជាចំណង់ចំណូលចិត្តផ្ទាល់ខ្លួន ហើយជាទូទៅត្រូវបានចាត់ទុកថា មិនមានគ្រោះថ្នាក់អ្វីឡើយ។

ភេសជ្ជៈទាំងពីរប្រភេទនេះសុទ្ធតែជាប្រភពនៃសារធាតុប្រឆាំងអុកស៊ីតកម្ម ដែលជួយបង្កើនថាមពល ជួយគ្រប់គ្រងទម្ងន់ និងធ្វើឱ្យស្មារតីស្វាង​។ លើសពីនេះ ការសិក្សាបានបង្ហាញថាជាតិកាហ្វេអ៊ីន ក្នុងកម្រិតសមល្មម អាចជួយការពារជំងឺវង្វេងវង្វាន់ និងជំងឺថ្លើមខ្លាញ់បានទៀតផង។
​
ចំណុចពិសេសនៃការលាយភេសជ្ជៈទាំងពីរនេះ គឺតុល្យភាពនៃឥទ្ធិពលលើប្រព័ន្ធប្រសាទ។ ខណៈពេលដែលកាហ្វេផ្ដល់ជាតិកាហ្វេអ៊ីនខ្ពស់ធ្វើឱ្យយើងស្វាហាប់ តែមានផ្ទុកនូវអាស៊ីតអាមីណូ ដែលជួយឱ្យអារម្មណ៍ស្ងប់ និងកាត់បន្ថយភាពតានតឹង។ ការរួមបញ្ចូលគ្នានេះអាចជួយឱ្យអ្នកញ៉ាំមានអារម្មណ៍ស្រស់ថ្លា ប៉ុន្តែមិនញ័រទ្រូងខ្លាំងដូចការញ៉ាំកាហ្វេតែមួយមុខឡើយ។

ទោះជាយ៉ាងណា លោកអ្នកគួរប្រុងប្រយ័ត្នលើ “បរិមាណ”។ ការញ៉ាំជាតិកាហ្វេអ៊ីនច្រើនហួសកម្រិតអាចនាំឱ្យមានការញៀន ឬប៉ះពាល់ដល់ដំណេក។ សម្រាប់អ្នកដែលមានប្រតិកម្មខ្លាំងជាមួយជាតិកាហ្វេអ៊ីន គួរកម្រិតការទទួលទានឱ្យនៅតិចតួចបំផុត។

ជារួម ការលាយកាហ្វេ និងតែចូលគ្នាគឺជារឿងធម្មតា ប៉ុន្តែអ្វីដែលសំខាន់បំផុតគឺការស្ដាប់តាមប្រតិកម្មរាងកាយរបស់លោកអ្នក ដើម្បីធានាថាវាមិនធ្វើឱ្យអ្នកមានអារម្មណ៍ថប់បារម្ភ ឬពិបាកសម្រាកនៅពេលយប់៕