ខេត្តបាត់ដំបង ៖ អំពើ«ប្លន់»ដែលធ្លាប់មាន នាប៉ុន្មានឆ្នាំចុងក្រោយនេះ ប៉ុន្តែពេលនេះអំពើ«ប្លន់»ដែលយើងនឹងស្មានមិនដល់ត្រឹមរយៈពេល៤០នាទីប៉ុណ្ណោះ ជនដែលគេមិនស្កាល់អត្តសញ្ញាណបានធ្វើសកម្មភាព«ប្លន់» ដល់ក្នុងលំនៅឋានចំនួន០២លើកផ្ទួនៗក្នុងករណីផ្សេងគ្នាទាំងកណ្ដាលថ្ងៃត្រង់ និងចំកណ្ដាលក្រុងបាត់ដំបង ដោយជនសង្ស័យបានប្រើប្រាស់ត្រឹមកូនកាំបិត០១ប៉ុណ្ណោះ ។
ជុំវិញអំពើ«ប្លន់»ក្នុងលំនៅឋានទាំងកណ្ដាលថ្ងៃត្រង់ ដែលសមត្ថកិច្ចខានជួបយូរឆ្នាំកន្លងនេះបានធ្វើឲ្យមហាជន និងសមត្ថកិច្ចមានការភ្ញាក់ផ្អើលយ៉ាងខ្លាំង ព្រោះតែខានជួបអំពើ«ប្លន់»បែបនេះយូរឆ្នាំកន្លងមក ។ ជាពិសេសករណីចូល«ប្លន់»ផ្ទះជាងស្លរមាស ដែលអស់ជាង៥០តំឡឹង ខណៈមួយករណីទៀត អស់ប្រហែលជិត៤០០០ដុល្លារ តែធ្វើឲ្យជនរងគ្រោះរងរបួសទាំង០២ករណី ដោយសារស្នាដៃលោកចោរប្រើកាំបិតចា.ក់ និងកា.ប់ ។
សមត្ថកិច្ចមិនទាន់បង្ហាញរបាយការណ៍ជាក់លាក់ស្ដីពីអំពើ«ប្លន់» ទាំង០២ករណីផ្ទូនៗគ្នានេះនៅឡើយទេ ព្រោះគេអះអាងថា កំពុងមមាញឹកខ្លាំងក្នុងការតាមដានមុខសញ្ញា«ប្លន់»នេះ ។ ប៉ុន្តែប្រភពក្រៅផ្លូវការ បានឲ្យដឹងថា ករណីទី១ ជនសង្ស័យដែលគេមិនស្កាល់អត្តសញ្ញាណបានដើរចូលទៅធ្វើសកម្មភាពកា.ប់ស្ត្រីម្នាក់ដល់ក្នុងផ្ទះរួច«ប្លន់»យកលុយខ្មែរ លុយដុល្លារ និងគ្រឿងអលង្ការ ដែលគិតជាទឹកប្រាក់អស់ប្រហែល៤០០០ដុល្លារ ។
បើតាមប្រភពដដែល ៖ ហេតុការណ៍នេះបានកើតឡើង នៅម៉ោង១២ថ្ងៃត្រង់ ថ្ងៃទី០១ ខែកុម្ភៈ នៅចំណុចភូមិកាប់គោថ្មី សង្កាត់អូរចា ក្រុងបាត់ដំបង ។ ជនរងគ្រោះឈ្មោះ គឿន ម៉ារីយ៉ា អាយុ៣៩ឆ្នាំ បណ្ដាលឲ្យរងរបួស និងដួលសន្ល.ប់ ហើយជនសង្ស័យក៏ដណ្ដើមយកកាបូបស្ពាយពីជនរងគ្រោះ ដែលមានលុយ និងគ្រឿងអលង្ការ ហើយបានរត់ចេញដោយសុវត្ថិភាព ។
ក្រោយជនមិនស្គាល់មុខនេះ«ប្លន់»ស្ត្រីរងគ្រោះមិនបានមួយដង្ហើមចង្រឹតផង ស្រាប់តែនៅម៉ោង១២និង៤០នាទីថ្ងៃដដែល មានសេចក្ដីរាយការណ៍យ៉ាងទន់ហន់ថា មានជនសង្ស័យម្នាក់ចូល«ប្លន់»នៅផ្ទះ«ជាងមាស»ដ៏ល្បីមួយកន្លែងទៀត ស្ថិតក្នុងភូមិព្រែកព្រះស្ដេច សង្កាត់ព្រែកព្រះស្ដេច ក្រុងបាត់ដំប (ត្រើយខាងកើតស្ទឹង ទល់មុខសាលាខេត្តបាត់ដំបង)។
ប្រភពពីសមត្ថកិច្ចបានបង្ហើបព្រាលៗថា ជនសង្ស័យតែម្នាក់ទេ ដែលចូល«ប្លន់»ផ្ទះជាងមាសនេះ ។ ជននោះប្រដាប់ដោយកូនកាំបិតបានដើរចូលទៅកាន់មន្ទប់ជាង«ស្លរមាស» ហើយភ្លាមៗជនដៃដល់បានធ្វើសកម្មភាពវាយ និងចាក់ទៅលើជនរងគ្រោះត្រូវក្រោមឆ្អឹងជំនី ០១កាំបិត រួច«ប្លន់»យកមាសសន្លឹក ដែលគេប៉ាន់ស្មានជាបឋមថា អស់ប្រហែល៥៥តំឡឹង ។
ជនរងគ្រោះឈ្មោះ អ៊ុំ សុខចំរើន ភេទប្រុស អាយុ៣០ឆ្នាំ មានមុខរបរជាងស្លរមាស ។ ក្រោយធ្វើសកម្មភាព ជនសង្ស័យបានវេចខ្ចប់មាសដ៏សន្ធឹកសន្ធាប់នោះរត់ចេញគេចខ្លួនដោយសុវត្ថិភាពទៀត ។
ពាក់ព័ន្ធអំពើ«ប្លន់»ដ៏គគ្លើនទាំងកណ្ដាលថ្ងៃត្រង់ និងចំកណ្ដាលបេះដូងក្រុងបាត់ដំបងទាំង០២ករណីផ្ទូនៗនេះ មិនមានមន្ត្រីទទួលខុសត្រូវណាម្នាក់បានបំភ្លឺលំអិតទេ ក្រៅពីប្រភពសុំមិនបញ្ចេញឈ្មោះ ។ គេបានត្រឹមនិយាយថា សមត្ថកិច្ចកំពុងតាមតាមរាល់កាមេរ៉ាសុវត្ថិភាពតាមផ្ទះ ឬនៅតាមដងផ្លូវសាធារណៈ ។ ប៉ុន្តែបើតាមប្រភពព័ត៏មានពីសមត្ថកិច្ចដែរថា គេមានតម្រុយខ្លះៗហើយពីមុខសញ្ញាជនសង្ស័យ ជាពិសេសករណីទី១ ដែលចូល«ប្លន់»ស្ត្រីម្នាក់ដល់ក្នុងផ្ទះ ។
យ៉ាងណា នេះគ្រាន់តែជាសេចក្ដីរាយការណ៍បឋមដែលកោះសន្តិភាពទទួលបានលក្រៅផ្លូវការពីសមត្ថកិច្ចផង និងសាច់ញាតិជនរងគ្រោះផង ឬប្រជាពលរដ្ឋខ្លះៗផង រីឯរបាយការណ៍ជាក់លាក់យ៉ាងណានោះគេកំពុងរង់ចាំលទ្ធផលពីកម្លាំងសមត្ថកិច្ច ដែលកំពុងធ្វើការស៊ើបអង្កេត៕
ចែករំលែកព័តមាននេះ