រាជធានីភ្នំពេញ ៖ គំនរអេតចាយមួយកន្លែងដែលភាគច្រើនគឺជាគ្រឿងជ័រ ត្រូវបានភ្លើងឆាបឆេះសន្ធោសន្ធៅ និងផ្សែងហុយឡើងលើយ៉ាងឃ្មួលខ្មាញ់ បង្កឲ្យមានការភ្ញាក់ផ្អើលទាំងថ្ងៃ ដែលសង្ស័យបណ្ដាលមកពីក្មេងៗដុតលេង ភ្លាមៗនោះម្ចាស់អេតចាយខាងលើបានយកគ្រឿងចក្រអេស្កាវ៉ាទ័រកាយអេតចាយផ្ដាច់គំនរអេតចាយចេញពីគ្នានិងកាយដីលុបភ្លើងព្រមទាំងយកទុយោបាញ់ទឹកពន្លត់ ភ្លើង ។ ចំណែករថយន្តពន្លត់អគ្គិភ័យក៏បានចេញទៅជួយអន្តរាគមន៍ដែរ ព្រោះខ្លាចឆេះរាលដល់កន្លែងផ្សេង ឆេះស្មៅក្រាស់ៗ និងរាលដល់ផ្ទះនៅជិតនោះច្រើនខ្នង ប៉ុន្តែពេលទៅដល់ត្រូវបានម្ចាស់អេតចាយរារាំហាមឃាត់មិនឲ្យរថយន្តពន្លត់អគ្គិភ័យបាញ់ទឹកពន្លត់ទេ គាត់ចង់ពន្លត់ខ្លួនឯងទាំងភ្លើងកំពុងឆេះខ្លាំង ។ រហូតដល់មានការអន្តរាគមន៍ពីលោកចៅសង្កាត់ត្រពាំងក្រសាំង ទើបគាត់យល់ព្រមឲ្យនគរបាលពន្លត់អគ្គិភ័យបាញ់ពន្លត់ភ្លើងនោះ ហើយបាញ់អស់១រថយន្តភ្លើងក៏រលត់ទៅវិញទាំងស្រុង ។
ហេតុការណ៍នោះបានកើតឡើងកាលពីវេលាម៉ោង១២ និង២០នាទីថ្ងៃត្រង់ថ្ងៃទី០១ ខែកុម្ភៈ ឆ្នាំ២០២៦ នៅកន្លែងស្តុកអេតចាយ នៅលើដីទំនេរមួយកន្លែង ស្ថិតនៅក្នុងភូមិត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
ប្រជាការពារបានប្រាប់ថា ទីតាំងស្តុកអេតចាយខាងលើនោះ ពុំមានរោងនោះទេ គឺគេគរទុកនៅកណ្ដាលវាលនៅក្លើដីទំនេរ ដែលមានស្មៅដុះទ្រុបទ្រុលវែងៗ ហើយនៅជិតទីនោះក៏មានផ្ទះច្រើនខ្នងផងដែរ ។
ដោយឡែកនៅមុនពេលកើតហេតុមានក្មេងៗលេងភ្លើងនៅទីនោះ ហើយក្រោយមកក៏ស្រាប់តែមានភ្លើងឆេះអេតចាយសន្ធោសន្ធៅ ហុយផ្សែងខ្មៅឃ្មួលខ្មាញ់ឡើងអាកាស ដែលសង្ស័យថាក្មេងៗទាំងនោះដុតលេង ។
ប្រភពដដែលបានប្រាប់ទៀតថា បន្ទាប់ពីមានហេតុការណ៍នេះ ម្ចាស់អេតចាយបានយកទុយោបាញ់ទឹកពន្លត់ ព្រមទាំងយកគ្រឿងចក្រអេស្កាវ៉ាទ័រកាយផ្ដាច់គំនរអេតចាយចេញពីគ្នា និងកាយដីលុបភ្លើងផងដែរ ។ ប៉ុន្តខណៈនោះភ្លើងឆេះខ្លាំងណាស់ ព្រោះអេតចាយដែលភ្លើងកំពុងឆេះនោះសុទ្ធតែគ្រឿងជ័តងាយនិងឆេះទោះជាខំប្រឹងពន្លត់ក៏មិនបានរលត់ភ្លាមៗនោះឡើយ ។
ប្រភពខាងលើបានប្រាប់បន្ថែមថា ពេលរថយន្តពន្លត់អគ្គិភ័យដែលប្រចាំការនៅសាលាខណ្ឌពោធិ៍សែនជ័យទៅដល់ ម្ចាស់បានហាមឃាត់មិនបាញ់ទឹកពន្លត់នោះទេគាត់ចង់ពន្លត់ខ្លួនឯង ។ ដោយមានការព្រួួយបារម្ភខ្លាចម្ចាស់នោះពន្លត់អត់ឈ្នះឆេះរាលដល់ទៅកន្លែងផ្សេងទៀតនោះ លោកចៅសង្កាត់ត្រពាំងក្រសាំងបានអន្តរាគមន៍លើរឿងនេះ ទើបម្ចាស់អេតចាយព្រមឲ្យរថយន្តពន្លត់អគ្គិភ័យបាញ់ពន្លត់ ។
ខណៈនោះកម្លាំងនគរបាលពន្លត់អគ្គិភ័យបានបាញ់ទឹកអស់១រថយន្ត ភ្លើងរលត់ទៅវិញទាំងស្រុង មិនឆេះរាលដល់កន្លែងផ្សេង និងផ្ទះសម្បែងដែលស្ថិតនៅជិតនោះឡើយ ។ បន្ទាប់មកអាជ្ញាធរនិងសមត្ថកិច្ចសង្កាត់ត្រពាំងក្រសាំងបានអញ្ជើញម្ចាស់អេតចាយនោះទៅណែនាំ ធ្វើកំណត់ហេតុនិងធ្វើកិច្ចសន្យា ចំពោះការរារាំងដល់កម្លាំងនគរបាលពន្លត់អគ្គិភ័យមិនឲ្យបាញ់ពន្លត់នោះហើយ ៕
ចែករំលែកព័តមាននេះ