រាជធានីភ្នំពេញ ៖ លោក កង វងចៅសង្កាត់ចោមចៅទី១ ខណ្ឌពោធិ៍សែនជ័យ ដែលកន្លងមកធ្លាប់មានរឿងអាស្រូវនៅក្នុងអង្គភាពជាហូរហែ និងមិនសូវមានការពេញចិត្តពីមន្ត្រីក្រោមឱវាទផងនោះ ពេលនេះបានធ្វើឲ្យមហាជនជាច្រើនសម្ដែងការហួសចិត្តយ៉ាងខ្លាំងជាថ្មីទៀត ។…
រាជធានីភ្នំពេញ ៖ លោក កង វងចៅសង្កាត់ចោមចៅទី១ ខណ្ឌពោធិ៍សែនជ័យ ដែលកន្លងមកធ្លាប់មានរឿងអាស្រូវនៅក្នុងអង្គភាពជាហូរហែ និងមិនសូវមានការពេញចិត្តពីមន្ត្រីក្រោមឱវាទផងនោះ ពេលនេះបានធ្វើឲ្យមហាជនជាច្រើនសម្ដែងការហួសចិត្តយ៉ាងខ្លាំងជាថ្មីទៀត ។ បន្ទាប់ពីបានឃើញវីដេអូឃ្លីបដែលលោកចៅសង្កាត់រូបនេះឡាយលើទំព័រហ្វេសប៊ុករបស់ខ្លួនទាំងកំហឹងដោយប្រើពាក្យសម្ដីអសុរសនិងប្រមាថជាច្រើនដាក់អ្នកដទៃ ធ្វើឲ្យបាត់បង់អស់នូវភាពជាអ្នកដឹកនាំ ។
គាត់បាននិយាយបណ្ដើរ និងហូបសណ្ដែកដីបណ្ដើរ រយៈពេលជិត១ម៉ោង នាវេលាជិតភ្លឺថ្ងៃទី៣១ ខែមករា ឆ្នាំ២០២៦ ដែលនៅខណៈនោះទំនងជាស្រវឹងស្រាទៀតផង ។ លោកកង វងបានហៅភាគីជម្លោះរបស់ខ្លួនសុទ្ធតែអាមឹង អ្ហែង អាថោក អាល្ងង់ អាពងក្ដ ជាដើម ដែលនេះមិនមែនជាពាក្យពេចន៍របស់មន្ត្រីរាជការត្រូវប្រើទាល់តែសោះ ហើយគេសង្ស័យថាលោកនិយាយសំដៅទៅកាន់រូបលោកអភិបាលរងខណ្ឌពោធិ៍សែនជ័យ ប៉ាង លីដា ដែលទើបមានទំនាស់គ្នាជាមួយគាត់នាប៉ុន្មានថ្ងៃចុងក្រោយនេះ ។
លោកចៅសង្កាត់រូបនេះ បានលើកឡើងថា លោកមានជម្លោះជាមួយមនុស្ស២នាក់ ប៉ុន្តែមិនបានហៅឈ្មោះពិតអ្នកទាំង២នោះទេគឺលោកហៅតាមបែបប្រមាថអាយុជីវិតថា «អាស្ករជិតងាប់ និងអាបេះដូងជិតងាប់» មិនតែប៉ុណ្ណោះលោកចៅសង្កាត់នេះ ក៏បានបបួលគូជម្លោះ២នាក់នោះវាយតប់គ្នានៅក្នុងសង្វៀនថែមទៀតផង ។ ពុំមាននរណាបានដឹងនិងស្គាល់ច្បាស់ថាមនុស្សទាំង២នាក់ដែលថ្លើមធំពាសមេឃហ៊ានឈ្លោះជាមួយលោកចៅសង្កាត់ចោមចៅទ១ រហូតធ្វើឲ្យលោកខឹង ហើយបបួលវាយគ្នានោះជានរណា មានបុណ្យស័ក្ដិធំប៉ុនណានោះទេ ប៉ុន្តែគេមានការសង្ស័យថា ក្នុងចំណោមអ្នកទាំង២នោះមានម្នាក់អាចជាមេនោះហើយ ។
នៅក្នុងការឡាយលោកចៅសង្កាត់រូបនេះមានការក្ដៅក្រហាយជាមួយគូទំនាស់ដល់កម្រិត១,០០០អង្សាទៅហើយ ទើបលោកដេកមិនលក់បក់មិនល្ហើយ ទ្រាំរង់ចាំដល់មេឃភ្លឺថ្ងៃរះមិនបាន ហើយក៏ចេញវីដេអូឡាយទាំងមេឃមិនទាន់ភ្លឺ មាន់មិនទាន់ជុះអាចម៍ផងទេ ។ ចំណែកមហាជនបានរិះគន់ខ្លាំងៗ និងចាត់ទុកថាទង្វើរបស់លោកចៅសង្កាត់រូបនេះប្រាស់ចាកពីក្រមសីលធម៌ និងវិជ្ជាជីវៈមន្ត្រីរាជការ មិនសមធ្វើជាចៅសង្កាត់ ដែលជាមន្ត្រីបម្រើរាស្ត្រផ្ទាល់ ឬក៏ជាគំរូល្អសម្រាប់សង្គមខ្មែរទាល់តែសោះ ។ ខ្លួនជាបុគ្គលសាធារណៈតែចូលចិត្តឈ្លោះប្រកែកគ្នាដូចកូនក្មេងលេងដី រីឯពាក្យសម្ដីវិញនិយាយចេញមក១ម៉ាត់ណា ក៏ដៀលត្មះគេសុទ្ធតែ អាមឹង អ្ហែង អាថោក អាពងក្ដ អាល្ងង់ មិនដាច់ពីមាត់សោះ ។ មិនតែប៉ុណ្ណោះគាត់ក៏បានព្រមានដល់គូទំនាស់របស់ខ្លួនទៀតថា បើអ្ហែងធ្វើខុស អញខ្ទេច អ្ហែងក៏ខ្ទេចដែរ អាថោកអញប្រាប់ប្រពន្ធកូនអញរួចហើយ ដែលពាក្យនេះស្មើនឹងការកម្ទេចដៃគូទំនាស់របស់ខ្លួនចោល ។
លោកចៅសង្កាត់រូបនេះថាលោកមានគំនុំជាមួយមនុស្សម្នាក់តាំងពីឆ្នាំ២០១៩មកម្ល៉េះ និងថាជុងវាអត់ដែលភ្លេចកុកទេ ជេរម៉ែអញតាំងពីឆ្នាំ២០១៩ ដៀលអញដូចឆ្កែដូចឆ្មារ អ្ហែងច្រឡំហើយអានាងមើលអាវងឲ្យច្បាស់ ។ អញសប្បាយចិត្តមែនទែនអញប្រាប់អ្ហែង១ម៉ាត់ណា គុកគេធ្វើមកសម្រាប់ដាក់មនុស្ស ទ្រុងណាគេធ្វើសម្រាប់ដាក់សត្វ អ្ហែងចងចាំតែប៉ុណ្ណេះទៅបានហើយអាថោក (អ្នកដែលមានគំនុំជាមួយលោកចៅសង្កាត់នោះ ទំនងជាមេហើយមើលទៅ) ។
សូមរំលឹកផងដែរថា កាលពីថ្ងៃទី២៩ ខែមករា ឆ្នាំ២០២៦ ខណៈកំពុងមានទំនាស់ជាមួយលោកប៉ាង លីដា គេឃើញលោកកង វង បើករថយន្តបណ្ដើរឡាយវីដេអូបណ្ដើរថា កាលពីឆ្នាំ២០២២ ពេលដែលខ្លួនជួលគ្រឿងចក្រកាយប្រឡាយបារាំង លោកបានចាយលុយខ្លួនឯងរាប់ម៉ឺនដុល្លារក្នុងការដោះស្រាយ ស្រាប់តែលោកប៉ាង លីដា ស្ដីឲ្យលោកថាយកអេស្កាវ៉ាទ័រតូចស្ដារមិនកើតដូចពងក្ដគេ ចៅសង្កាត់ចរិកថោក ។
លោកកង វង ក៏បានចោទប្រកាន់គូទំនាស់របស់ខ្លួនថាសសើរប្រទសថៃដែលកំពុងឈ្លានពានកម្ពុជាយើងមិនដាច់ពីមាត់ ដោយលោកនិយាយដូច្នេះថា អញអត់ដូចពាក្យខ្លះអ្ហែងមកជួបគេជួបឯងថាអ្ហែងរស់រានមានជីវិតដោយសារប្រទេសថៃទេ ណូ ! អញរស់រានមានជីវិតដោយសារសម្ដេចនាយករដ្ឋមន្ត្រីពីមុននិងជាតិ សាសនា ព្រះមហាក្សត្រ អញអត់ដែលយកខ្មែរខ្លួនឯងទៅប្រៀបជាមួយអ្នកដទៃទេ ។ អញអត់ល្ងង់ទេ មានតែអ្ហែងទេវាល្ងង់ អាល្ងង់ អញប្រាប់អ្ហែងត្រង់ អ្ហែងស្បថទេបើអ្ហែងអត់បាននិយាយ? អ្ហែងថាអញខ្លាចអ្ហែង គេស្អប់អ្ហែងច្រើនណាស់ ក្នុងជួរជាមួយគ្នានោះ ប៉ុន្តែគេមិនហ៊ាននិយាយ ដោយសារគេអត់ទាន់ដែលបានបទពិសោធន៍ដូចអញ ។
មើលទៅចៅសង្កាត់រូបនេះហាក់ក្រពុលមុខខ្លាំងណាស់គាត់និយាយបន្តថា អញបានប្រាប់ហើយប្រាប់ទៀតជួបរបស់ពិតហើយ ហុឹសអាពួកម៉ាក អាប្អូន(លោកហៅគូទំនាស់) រាល់ថ្ងៃអត់មានអីទេមានតែពងក្ដ៣ទេ និងបំណុលជាច្រើនគឺជំពាក់ប្រជាពលរដ្ឋនៅក្នុងមូលដ្ឋាន រាល់ថ្ងៃយាយៗទាររាល់ថ្ងៃអត់ដឹងថាជួបមុខគាត់យ៉ាងម៉េចផង ។ អត់ដូចអាពងក្ដឯងក្នុងម៉ោងរដ្ឋបាលទៅអង្គុយផឹកកាហ្វេសើចក្អាកក្អាយនិយាយពីរឿងស្រីទេអាអើយ អញគ្មានទេ ចំណែកប្រាក់ខែអស់លោកទាំងអស់ក្រោម២លានដូចគ្នាជាមួយខ្ញុំហ្នឹង អស់លោកមានសមត្ថភាពទៅកាយលូ កាយប្រឡាយបួនដប់ម្ភៃម៉ែត្រហ្នឹងមែន? ខ្ញុំជឿថាលោកអត់ល្ងង់ទេ ហើយលោកក៏មិនបានយកពងក្ដលោកទៅហាលថ្ងៃហាលភ្លៀងដែរ ។
សូមរម្លឹកថា កន្លងមកលោកកង វងធ្លាប់មានរឿងអាស្រូវជាបន្តបន្ទាប់ក្នុងនោះមានដូចជា នៅក្នុងឆ្នាំ២០២៣ អង្គភាពប្រឆាំងអំពើពុករលួយបានចេញលិខិតសុំការបំភ្លឺលោក សួរ ភ័ក្ត្រលំពង្សស្មៀនសង្កាត់ចោមចៅទី១ ។
ក្រោយពីទទួលបានបណ្ដឹងថា ស្មៀនរូបនោះ និងលោកកង វងចៅសង្កាត់ចោមចៅទី១ រូបនេះទារប្រាក់ថ្លៃសេវាផ្សេងៗតាមតែអំពើចិត្ត លើគ្រប់ឯកសារ ។ នៅពេលប្រជាពលរដ្ឋទៅស្នើសុំចុះហត្ថលេខា និងបោះត្រា ដោយមិនអនុវត្តតាមតារាងតម្លៃសេវាច្រកចេញចូលតែមួយ ការស្នើសុំ ជួសជុល ឬសាងសង់ បើសិនគ្មានប្រាក់បង់ជូនទេ លោកចៅសង្កាត់និងស្មៀន តែងតែគំរាមដកហូតសម្ភារៈសាងសង់ របស់ប្រជាពលរដ្ឋ ។ ជាងនេះទៀត លោក កង វង និងស្មៀនមិនបានបើកប្រាក់រង្វាន់លើកទឹកចិត្តជាង២០០លានរៀល ចាប់តាំងពីឆ្នាំ ២០១៩ ដល់ឆ្នាំ ២០២០ ជូនដល់មន្ត្រីក្រោមឱវាទឡើយ ។
នៅក្នុងឆ្នាំ២០២០ សមាជិកក្រុមប្រឹក្សាសង្កាត់ និងគណៈបញ្ជាការឯកភាពសង្កាត់ចោមចៅ១ ព្រមទាំងមេភូមិ អនុភូមិទាំងអស់នៅទូទាំងសង្កាត់ចោមចៅទី១ បានដាក់ពាក្យបណ្តឹងសុំឲ្យថ្នាក់លើផ្លាស់ប្ដូរលោកចៅសង្កាត់រូបនេះចេញ ។ ពាក្យបណ្ដឹងអមដោយស្នាមមេដៃជាង៤០ផងបានប្ដឹងចោទលោកចៅសង្កាត់នោះថា បានប្រព្រឹត្តកំហុសចំនួន៨យ៉ាងរួមមាន៖
១-មានអាកប្បកិរិយា និងសីលធម៌មិនសមរម្យ ដោយតែងតែជេរប្រមាថ តិះដៀល និងមើលងាយមកលើមន្ត្រីក្រោមឱវាទ ។
២-ប្រកាន់បក្ខពួក ដែលនាំឲ្យបែកបាក់សាមគ្គី និងឯកភាពផ្ទៃក្នុង ។
៣-មិនចេះបែងចែកភារកិច្ចដល់សមាជិកក្រុមការងារ និងមន្ត្រីក្រោមឳវាទ
៤-មានភាពពុករលួយ (ប្រាក់ចំណូល និងសម្ភារផ្សេងៗ មិនបានធ្វើការបែងចែកដល់កូនចៅ)
៥-ទិសដៅការងារអ្វីមួយ មិនមានដាក់ក្នុងកិច្ចពិភាក្សានៅក្នុងអង្គប្រជុំនោះទេ គឺធ្វើការងារដោយអត្តនោម័តដោយខ្លួនឯង ។
៦-គ្មានចរិកភាពជាអ្នកដឹកនាំរដ្ឋបាលសាធារណៈ និងសហគមន៍
៧-ចំពោះការងារសាធារណៈមានការយឺតយ៉ាវ និងពន្យាពេលវេលាឲ្យយូរដើម្បីទារប្រាក់ពីប្រជាពលរដ្ឋ
៨-ចំពោះការងារបក្សចៅសង្កាត់ចោមចៅទី១ មិនបានយកចិត្តទុកដាក់ និងសហការជាមួយគណៈកម្មការបក្សសង្កាត់ឲ្យបានល្អប្រសើរនោះទេ។
ក្រោយពីបានស្ដាប់ការនិយាយរបស់លោកចៅសង្កាត់រូបនោះ បានធ្វើឲ្យមហាជនហួសចិត្តខ្លាំងណាស់ និងបានបានលើកឡើងថា គេពុំចាំបាច់សិក្សាចង់ដឹងអំពីកំរិតវប្បធម៌របស់លោកចៅសង្កាត់រូបនោះថា រៀនដល់ថ្នាក់ណា និងការដឹកនាំសង្កាត់បែបនោះទេ ។ គេមើលតែការសរសេរ និងការនិយាយស្ដីរបស់លោកចៅសង្កាត់នោះគឺដឹងបានហើយថាការដឹកនាំខ្ជីខ្ជារ ហើយអ្វីដែលមហាជនងឿងឆ្ងល់នោះថាតើលោកកង វងនេះឡើងធ្វើជាចៅសង្កាត់បានដោយរបៀបណា? ។ ទន្ទឹមនិងនេះមហាជនបានសំណូមពរដល់ប្រមុខរាជរដ្ឋាភិបាល និងលោកអភិបាលរាជធានីភ្នំពេញជួយពិនិត្យនូវឥរិយាបទនិងកិរិយាមាយាទលោកចៅសង្កាត់នេះផង ។ ក្នុងនាមជាមន្ត្រីបម្រើរាស្ត្រ បែរជាជេរប្រទេច ប្រមាថគេឯងជាសាធារណៈតាមបណ្ដាញសង្គម និងឮតែមានរឿងអត់ឈប់អស់ពីរឿងមួយចូលរឿងមួយបែបនះ តើអាចជាគំរូល្អសម្រាប់ប្រជារាស្ត្រ ឲ្យរាស្ត្រកក់ក្ដៅបានទេ?
ដោយឡែកកាលពីថ្ងៃទី២៨ ខែមករា ឆ្នាំ២០២៦ កន្លងទៅនេះលោកចៅ សង្កាត់រូបនេះបានមានទំនាស់ជាមួយលោកប៉ាង លីដា អភិបាលរងខណ្ឌពោធិ៍សែនជ័យ ព្រោះតែខឹងលោកប៉ាង លីដា សួរនាំនិងស្ដីបន្ទោសរឿងគេចាក់ដីលុបប្រឡាយមេទួលពង្រ បែរជាលោកចៅសង្កាត់រូបនេះឆ្លើយថាអត់ដឹង ។ ពេលនោះលោកចៅសង្កាត់បាននិយាយឡាយវីដេអូផង និងតាមប្រព័ន្ធតេលាក្រាមផងតបតទៅកាន់លោកប៉ាង លីដា ដែលជាមេរបស់ខ្លួនហើយបោះសម្ដីថា «សុំឲ្យមេឯងលាងឲ្យខ្ញុំឲ្យស្អាត បើមិនអញ្ចឹងទេខ្ញុំអត់សុខចិត្តទេ អស់តំណែងចៅសង្កាត់ក៏ខ្ញុំអត់ខ្វល់ ប៉ុន្តែខ្ញុំក៏មិនឲ្យមេឯងបានសុខដែរ»។ ក្រោយមកទំនាស់ខាងលើត្រូវបានជួបដោះស្រាយគ្នានៅសាលារាជធានីភ្នំពេញ ចប់សព្វគ្រប់ហើយដែរ ស្រាប់តែនៅថ្ងៃទី៣១ ខែមករា លោកកង វង បានឡាយវីដេអូបញ្ចេញកំហឹងសារជាថ្មី ហើយខ្លាំងលើសដើមទៀតបែបនេះ ពុំដឹងថាតើភាគីទំនាស់ចាស់ប៉ះពាល់ដល់លោក ឬក៏លោកមានទំនាស់ជាមួយអ្នកថ្មីទៀតនោះឡើយ ។
ព័ត៌មានលម្អិតនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ