ទីក្រុងហាណូយ ៖ ការនាំចេញផ្លែទុរេនរបស់ប្រទេសវៀតណាមទៅកាន់ប្រទេសចិន បានកើនឡើងប្រហែល ១៧% កាលពីឆ្នាំមុន បន្ទាប់ពីប្រទេសអាស៊ីអាគ្នេយ៍មួយនេះ បានដោះស្រាយតម្រូវការអនាម័យរបស់ចិន និងទទួលបានជ័យជម្នះលើដៃគូប្រកួតប្រជែងក្នុងតំបន់ រួមទាំងប្រទេសថៃ…
ទីក្រុងហាណូយ ៖ ការនាំចេញផ្លែទុរេនរបស់ប្រទេសវៀតណាមទៅកាន់ប្រទេសចិន បានកើនឡើងប្រហែល ១៧% កាលពីឆ្នាំមុន បន្ទាប់ពីប្រទេសអាស៊ីអាគ្នេយ៍មួយនេះ បានដោះស្រាយតម្រូវការអនាម័យរបស់ចិន និងទទួលបានជ័យជម្នះលើដៃគូប្រកួតប្រជែងក្នុងតំបន់ រួមទាំងប្រទេសថៃ នៅក្នុងទីផ្សារចិនដែលទទួលបានតម្លៃខ្ពស់។
តាមទិន្នន័យគយចិន ដែលស្រង់ និងចេញផ្សាយដោយកាសែតហុងកុង South China Morning Post បានឱ្យដឹងថា ប្រទេសវៀតណាមបានដឹកជញ្ជូនផ្លៃទុរេនដែលមានតម្លៃ ៣,៤៤ ពាន់លានដុល្លារអាមេរិកទៅកាន់ប្រទេសចិនក្នុងឆ្នាំ ២០២៥ កើនឡើងពី ២,៩៤ ពាន់លានដុល្លារអាមេរិក កាលពីឆ្នាំ ២០២៤។
ចំណែកតួលេខគយដែលចេញផ្សាយកាលពីថ្ងៃទី២៧ ខែមករា បានបង្ហាញថា ប្រទេសថៃដែលជាអ្នកផ្គត់ផ្គង់លេចធ្លោ បានឃើញចំណែករបស់ខ្លួនធ្លាក់ចុះ ខណៈដែលការដឹកជញ្ជូនទៅកាន់ចិនភាគច្រើនមិនមានការប្រែប្រួលរវាងឆ្នាំ ២០២៤ និង ២០២៥ ដោយតួលេខគយកាលពីឆ្នាំមុនមានចំនួនសរុប ៤ ពាន់លានដុល្លារអាមេរិក។
បណ្តាអ្នកវិភាគបានសន្មតថា ការកើនឡើងរបស់វៀតណាមបានមកពីកិច្ចសហប្រតិបត្តិការរបស់ប្រទេសនេះជាមួយអាជ្ញាធរចិន ដើម្បីដោះស្រាយបញ្ហាអនាម័យ ព្រមទាំងអត្ថប្រយោជន៍ផ្នែកភស្តុភារកម្ម កើតចេញពីព្រំដែនគោករួមគ្នាជាមួយប្រទេសចិន និងហេដ្ឋារចនាសម្ព័ន្ធដែលបានបង្កើតឡើង។ រដ្ឋាភិបាលទាំងពីរបានធ្វើការរួមគ្នាដើម្បីដោះស្រាយបញ្ហាទាំងនេះ ហើយបណ្តាអ្នកទិញចិនបានធ្វើដំណើរទៅកាន់ប្រទេសវៀតណាម ដើម្បីផ្តល់ដំបូន្មានដល់អ្នកដាំដុះអំពីការកែលម្អគុណភាព។
ចំណែកទីផ្សារទុរេនរបស់វៀតណាមនៅក្នុងប្រទេសចិន បានកើនឡើងពីគ្មានអ្វីទាល់តែសោះដល់ជាង ៤០% ក្នុងរយៈពេល៣ឆ្នាំនៃការចាប់ផ្តើមការនាំចេញជាផ្លូវការនៅឆ្នាំ ២០២០ ដែលជាការកើនឡើងយ៉ាងរហ័ស បង្កបញ្ហាប្រឈមដោយផ្ទាល់ចំពោះការកាន់កាប់យូរអង្វែងរបស់ប្រទេសថៃក្នុងនាមជាអ្នកផ្គត់ផ្គង់ទុរេនដ៏សំខាន់របស់ប្រទេសចិន។ នេះបើតាមការចេញផ្សាយពីកាសែតថៃ The Nation កាលពីដើមខែនេះ ដោយបន្ថែមថា ប្រទេសដទៃទៀតដែលប្រឈមមុខនឹងឧបសគ្គបែបនេះ ដូចជាម៉ាឡេស៊ី និងឥណ្ឌូនេស៊ីផងដែរ។
ប្រទេសចិនបានស្រូបយកជាង ៩០% នៃការនាំចេញទុរេនទូទាំងពិភពលោក ជាកន្លែងដែលផ្លែឈើមានក្លិនខ្លាំងប្រភេទនេះ ទទួលបានតម្លៃខ្ពស់ ហើយជារឿយៗត្រូវបានផ្តល់ជាអំណោយក្នុងឱកាសបុណ្យសំខាន់ៗ រួមទាំងពិធីមង្គលការផងដែរ។ ទោះជាយ៉ាងណាក៏ដោយ នៅដើមឆ្នាំ ២០២៥ រដ្ឋបាលគយទូទៅរបស់ចិនបានរកឃើញកម្រិតគ្មានសុវត្ថិភាពនៃសមាសធាតុសារធាតុពណ៌លឿងអាល់កាឡាំង (Alkaline Yellow) និងសារធាតុកាដមីញ៉ូមក្នុងផ្លែទុរេនវៀតណាម ដែលជំរុញឱ្យមានការត្រួតពិនិត្យយ៉ាងតឹងរ៉ឹង។
យ៉ាងណាមិញ បណ្តាអ្នកវិភាគបានលើកឡើងថា បើគ្មានការព្រួយបារម្ភអំពីសុខភាពទាំងនេះទេ ប្រទេសវៀតណាមនឹងគ្មានគុណសម្បត្តិជាងប្រទេសផ្គត់ផ្គង់ផ្សេងទៀតនោះទេ ដោយសារតែបណ្តាញអ្នកដាំដុះ អ្នកជួញដូរ ឃ្លាំង និងដំណើរការដឹកជញ្ជូនដែលកំពុងពង្រីក ក៏ដូចជាព្រំដែនប្រវែង ១ ២៨០ គីឡូម៉ែត្រជាមួយនឹងប្រទេសចិន ដែលប្រទេសថៃពុំមាន៕ ប្រភព ៖ VnExpress
ចែករំលែកព័តមាននេះ