ខេត្តកំពង់ឆ្នាំង ៖ បទល្មើសនេសាទដោយប្រើប្រាស់ឧបករណ៍ឆក់ត្រីចំនួន៣ករណី និងបទល្មើសរុញជន ត្រូវបានកម្លាំងតំបន់ប្រតិបត្តិការសឹករងកំពង់ឆ្នាំង សហការជាមួយអង្គភាពកងពលតូចលេខ៧០ ធ្វើការបង្ក្រាបនៅទីតាំងផ្សេងគ្នា ។ ការបង្ក្រាបនេះ គឺកាលពីវេលាម៉ោង៣ទៀបភ្លឺ…
ខេត្តកំពង់ឆ្នាំង ៖ បទល្មើសនេសាទដោយប្រើប្រាស់ឧបករណ៍ឆក់ត្រីចំនួន៣ករណី និងបទល្មើសរុញជន ត្រូវបានកម្លាំងតំបន់ប្រតិបត្តិការសឹករងកំពង់ឆ្នាំង សហការជាមួយអង្គភាពកងពលតូចលេខ៧០ ធ្វើការបង្ក្រាបនៅទីតាំងផ្សេងគ្នា ។ ការបង្ក្រាបនេះ គឺកាលពីវេលាម៉ោង៣ទៀបភ្លឺ និងម៉ោង៥ព្រឹកថ្ងៃទី៣០ ខែមករា ឆ្នាំ២០២៦ នៅឡូត៍លេខ៩ និងក្បាលកោះចោរ ក្នុងភូមិសាស្ត្រស្រុកកំពង់លែង និងស្រុកបរិបូណ៌ ។
លោកវរសេនីយ៍ទោ ម៉ៅ វ៉េ មេបញ្ជាការរងតំបន់ប្រតិបត្តិការសឹករងកំពង់ឆ្នាំង ដែលបានដឹកនាំក្រុមការងារចុះបង្ក្រាបទល្មើសខាងលើ បានឲ្យដឹងថា នៅវេលាទៀបភ្លឺថ្ងៃទី៣០ ខែមករា អង្គភាពរបស់លោក បានសហការជាមួយអង្គភាពកងពលតូចលេខ៧០ ធ្វើការល្បាតរុករកបទល្មើសចេញពីភូមិចុងកោះដល់ឡូត៍លេខ៩ ប្រទះឃើញបទល្មើសរុញជន១គ្រឿង ក៏បានចាប់ឃាត់យកមករក្សាទុកនៅស្នាក់ការអង្គភាពកងពលតូចលេខ៧០ ។
ក្នុងការបន្តប្រតិបត្តិការទៅដល់ភូមិប្រឡាយមាស ត្រង់ចំណុចកោះក្បាលចោរ នៅវេលាម៉ោង៥និង៣០នាទីព្រឹក ក៏បានប្រទះឃើញបទល្មើសឆក់ត្រីចំនួន៣ទូក ហើយដេញស្ទាក់ចាប់ ប៉ុន្តែជនល្មើសបានរត់គេចអស់ នៅសល់តែវត្ថុតាងរួមមាន ទូកបាឡាស្មាច់៣គ្រឿង ដងឆក់ត្រី អាំងវែរទ័រឆក់ត្រី អាគុយ និងត្រីនៅក្នុងទូកតែប៉ុណ្ណោះ ។ វត្ថុតាងទាំងនោះ ត្រូវបានយកមករក្សាទុកនៅអង្គភាព ។
ដោយឡែក កាលពីថ្ងៃទី២៩ ខែមករា ឆ្នាំ២០២៦ កម្លាំងខណ្ឌរដ្ឋបាលជលផល សហការជាមួយតំបន់ប្រតិបត្តិការសឹករងកំពង់ឆ្នាំង និងសហគមន៍នេសាទ ដឹកនាំដោយលោក តាត សីហាក់ នាយខណ្ឌរដ្ឋបាលជលផលស្ដីទីនៃមន្ទីរកសិកម្ម រុក្ខាប្រមាញ់ និងនេសាទខេត្ត បានចុះណែនាំ ដើម្បីទប់ស្កាត់ការនេសាទលៀសដោយខុសច្បាប់ នៅស្នាក់ការសង្កាត់រដ្ឋបាលជលផលបរិបូណ៌ ដើម្បីបញ្ឈប់សកម្មភាពដឹកលៀសខុសច្បាប់ ។
នៅថ្ងៃដដែលនោះដែរ សមត្ថកិច្ចផ្នែករដ្ឋបាលជលផលកំពង់ប្រាសាទ បានសហការជាមួយគណៈបញ្ជាការឯកភាពស្រុកជលគីរី ធ្វើការបង្ក្រាបបទល្មើសនេសាទដាក់របាំងស្បៃមុងនៅទន្លេឫស្សីដង្កួច ឃុំជលសា និងនៅទន្លេក្បាលកន្លង់ ឃុំពាមឆ្កោក ស្រុកជលគិរី ដោយបានធ្វើការបំផ្លាញចោលរបាំងស្បៃមុង៨កន្លែង ប្រវែង ១៦០ម៉ែត្រ លបលូស្បៃមុង៨ បង្គោល៨០ដើម និងចាក់លែងកូនត្រីចម្រុះចូលដែននេសាទវិញចំនួន៥០គីឡូក្រាម ៕
ចែករំលែកព័តមាននេះ