រាជធានីភ្នំពេញ ៖ គិតមកដល់ថ្ងៃនេះ មានអត្តពលិកជិត៣០០០នាក់ហើយដែលបានចុះឈ្មោះរត់ក្នុងទិវារត់ប្រណាំងស្ត្រីចម្ងាយ១០គីឡូម៉ែត្រក្នុងថ្ងៃ៨ មីនា ឆ្នាំ២០២៦ នៅរាជធានីភ្នំពេញ ។ នេះបើតាមការឱ្យដឹងពីឯកឧត្តមវ៉ាត់ចំរើន រដ្ឋលេខាធិការក្រសួងអប់រំ…
រាជធានីភ្នំពេញ ៖ គិតមកដល់ថ្ងៃនេះ មានអត្តពលិកជិត៣០០០នាក់ហើយដែលបានចុះឈ្មោះរត់ក្នុងទិវារត់ប្រណាំងស្ត្រីចម្ងាយ១០គីឡូម៉ែត្រក្នុងថ្ងៃ៨ មីនា ឆ្នាំ២០២៦ នៅរាជធានីភ្នំពេញ ។ នេះបើតាមការឱ្យដឹងពីឯកឧត្តមវ៉ាត់ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជានៅក្នុងសន្និសីទសារព័ត៌មានកាលពីថ្ងៃទី២៩ ខែមករា។
ឯកឧត្តមវ៉ាត់ ចំរើន មានប្រសាសន៍ថា ទិវារត់ប្រណាំងស្ត្រីចម្ងាយយ១០គីឡូម៉ែត្រនាថ្ងៃ៨ មីនា ដើម្បីលើកកម្ពស់ស្ត្រីឱ្យស្មើភាពជាមួយបុរស ព្រមទាំងបានការជ្រោមជ្រែងពីរាជរដ្ឋាភិបាលក៏ដូចជាប្រជាជនកម្ពុជាទាំងមូល ស្របពេលប្រទេសជាតិមានសុខសន្តិភាព ប្រជាពលរដ្ឋអាចប្រកបការងារអ្វីៗបានយ៉ាងល្អ។ ទិវារត់ប្រណាំងស្ត្រីចម្ងាយ១០គីឡូម៉ែត្រដែលមានរយៈពេល៥ឆ្នាំមកនេះជាមួយដៃគូសហការទទួលបានជោគជ័យយ៉ាងខ្លាំង។ ដោយសារតែបច្ចុប្បន្នប្រជាពលរដ្ឋមានការយល់ដឹងពីបញ្ហាសុខភាពនេះហើយដែលធ្វើឱ្យចំនួនអ្នករត់មានការកើនឡើង ជាពិសេសប្រជាពលរដ្ឋក្នុងរាជធានីភ្នំពេញ ។ ជារៀងរាល់ឆ្នាំ មានអ្នកចូលរួមរត់មិនក្រោម៣០០០នាក់នោះទេ។ដោយឡែក សម្រាប់ឆ្នាំនេះរំពឹងថា នឹងមានអ្នកចូលរួមរត់ប្រមាណ៤០០០នាក់ ខណៈពេលនេះមានអ្នកចុះឈ្មោះចូលរួមរត់ប្រមាណ៣០០០នាក់រួចមកហើយ ដោយពេលវេលាចុះឈ្មោះនៅសល់ប្រហែល១ខែទៀត។
ឯកឧត្តមបានបន្តថា អ្នករត់ភាគច្រើនសម្រុកមកចុះឈ្មោះគៀកថ្ងៃរត់តែម្ដង ដូច្នេះហើយបានជាយើងរំពឹងថាចំនួនអ្នកចុះឈ្មោះនឹងមានការកើនឡើងបន្ថែម។
លោកបានឱ្យដឹងបន្តថា ស្ត្រីមានពាក្យថាមេដូចជាមេផ្ទះជាដើម ទន្លេមេគង្អក៏មកពីពាក្យថាមេដែរ។ដូច្នេះតួនាទីស្ត្រីធំធេងណាស់ សមាសភាពរបស់ស្ត្រីគឺស្មើភាពជាមួយបុរស ការងារអ្វីដែលបុរសធ្វើបានស្ត្រីក៏អាចធ្វើបានដូចគ្នា។
លោក សែម ផល្លា នាយកគ្រប់គ្រងព្រឹត្តិការណ៍រត់ប្រណាំង អមគណៈកម្មាធិការជាតិអូឡាំពិកកម្ពុជា មានប្រសាសន៍ថា ពីមួយឆ្នាំទៅមួយឆ្នាំ ទិវារត់ប្រណាំងស្ត្រីចម្ងាយ១០គីឡូម៉ែត្រមានចំនួនអ្នកចូលរួមកើនឡើងជាលំដាប់ ជាពិសេសចំនួនស្ត្រីចូលរួមទាំងចាស់ទាំងក្មេងកើនឡើង៦០ភាគរយនៃចំនួនសរុបរបស់អ្នកចូលរួម។ ម្យ៉ាងវិញទៀត ទិវារត់ប្រណាំងស្ត្រីនេះមិនមែនធ្វើនៅតែកម្ពុជាយើងនោះទេគឺធ្វើនៅគ្រប់ប្រទេសតែម្ដង។
ទិវារត់ប្រណាំងនៅកម្ពុជា គឺដើម្បីលើកកម្ពស់ស្ត្រីនៅក្នុងសង្គមឱ្យកាន់តែមានភាពស្មើមុខស្មើមាត់ទៅនឹងបុរស។យើងដឹងហើយថា តួនាទីស្ត្រីនៅក្នុងសង្គមគឺធំធេងណាស់។ ស្ត្រីមានឱកាសជោគជ័យច្រើនជាងបុរស មិនតែប៉ុណ្ណោះស្ត្រីនៅកម្ពុជាគ្មានរបាំងហាមឃាត់ដូចនៅបណ្ដាប្រទេសមួយចំនួននោះទេ។ ស្ត្រីអាចចូលរួមលេងកីឡាដើម្បីបំបាត់ស្ត្រេស ធូរស្បើយនៅក្នុងអារម្មណ៍តាមរយៈការរត់ប្រណាំងជាដើម ៕
ចែករំលែកព័តមាននេះ